KAMPUNI ZA SIMU SASA KUBANWA KATIKA KODI...

Profesa Makame Mnyaa Mbarawa.

Serikali sasa itaanza kubana kampuni za simu za mkononi nchini katika kodi, baada ya kununua kifaa maalumu cha kujua kila senti inayotokana na simu inayoingia kwa mteja iwe ya ndani au nje ya nchi.
Kwa hatua hiyo, Serikali inatarajia kuongeza mapato katika eneo hilo la kodi hasa baada ya kuwapo na tuhuma kwamba kampuni za simu zinakwepa kodi.
Waziri wa Mawasiliano, Sayansi na Teknolojia, Profesa Makame Mnyaa Mbarawa, alisema hayo jana wakati akitoa taarifa ya utekelezaji wa Ilani ya chama hicho katika Mkutano wa Nane wa CCM mjini hapa.
“Kuhusu kodi isiyo sahihi katika simu za mkononi, tutaweka kifaa maalumu cha kudhibiti hali hiii, na katika kila kampuni ya simu, kila pesa tutaijua kutokana na kifaa hicho,” alisema Profesa Mbarawa.
Nje ya ukumbi wa mkutano, Waziri huyo alisema kuwa kifaa hicho kwa lugha ya kigeni kinajulikana kwa jina la Teleco-traffic Management System, na tayari mchakato wake umeanza.
Alisema zabuni ilikwishatangazwa na kampuni 24 zikajitokeza, zikachujwa na kubaki 10 na kisha zikachujwa tena na kubaki sita, kabla ya kupata kampuni moja ambayo wanazungumza nayo sasa.
Alisema kwa kufunga kifaa hicho, kutakuwa na manufaa makuu matatu; kuangalia simu zinazopigwa kutoka nje ya nchi ili kudhibiti wajanja wanaopiga kutoka nje na simu kuonekana ni za ndani.
Profesa Mbarawa alitaja manufaa mengine kuwa ni kujua simu za ndani zinazopigwa na kudhibiti ubora wa simu.
“Mfumo kama huu umefanikiwa katika nchi za Ghana na Rwanda, na niwatoe hofu wananchi kwamba huu mfumo hauji kwa nia ya kuingilia mawasiliano ya mtu. Ni suala la kudhibiti mtandao,” alisema.
Alisema kabla ya kuanza kwa mfumo huo, kutawekwa kanuni zitakazofuatwa na watumiaji na kampuni husika.
Awali, akizungumza na wajumbe wa mkutano huo, Profesa Mbarawa alisema gharama za simu za mikononi zimezidi kupungua kutokana na kufungwa kwa Mkongo wa Taifa wa Mawasiliano.
Lakini alikiri kuwa vijiji 3,000 nchini havina mawasiliano hayo, na kwamba vitapatiwa hivi karibuni, lakini nia ni ifikapo mwaka 2014, Tanzania iwe na mawasiliano ya simu za mkononi.
Pia alisema Taasisi ya Sayansi na Teknolojia ya Mbeya (MIST) kuanzia Septemba mwaka huu, imepanda hadhi na kuwa Chuo Kikuu cha Sayansi na Teknolojia.
Waziri wa Ujenzi, Dk John Magufuli alisema miradi mikubwa ya ujenzi wa barabara inayoendelea nchini yenye thamani ya Sh trilioni 7.
Alisema miradi hiyo ina urefu wa kilometa 11,154, na asilimia 60 hadi 65 ya fedha za miradi hiyo ni za Serikali ya Tanzania na nchi itakuwa miongoni mwa tano za Afrika zinazotumia fedha zake kujenga barabara.
Alimsifu Rais Jakaya Kikwete kwa kufanya kazi kubwa ya kujenga barabara hizo kwa fedha za ndani na kutaka asikatishwe tamaa na watu ambao wanadai hajafanya lolote katika utawala wake.
Waziri wa Elimu na Mafunzo ya Ufundi, Dk Shukuru Kawambwa alielezea kuhusu mafanikio makubwa ya elimu tangu kuanzia mwaka 2005, ikiwamo kuongezeka kwa udahili wa wanafunzi wa shule za msingi hadi vyuo vikuu na ujenzi wa shule.
Waziri wa Afya na Ustawi wa Jamii, Dk Hussein Mwinyi alisema yamekuwapo mafanikio katika kudhibiti Ukimwi na malaria na pia kuongezeka kwa vyuo na watumishi wa sekta ya afya nchini.
Naibu Waziri wa Uchukuzi, Dk Charles Tizeba alisema Serikali itajenga uwanja wa ndege katika mji wa Mugumu wilayani Serengeti mkoani Mara ili kutumika kuvutia utalii katika ukanda wa Magharibi.
Aidha, alibainisha kuwa uwanja wa ndege wa kimataifa wa Songwe, Mbeya utazinduliwa Desemba   na kwa mujibu wa Rais Kikwete, tayari umeonesha uko katika kiwango cha juu baada ya hivi karibuni kutumika kutua ndege za Jeshi.
Pia Dk Tizeba alizungumzia upanuzi wa viwanja mbalimbali vya ndege nchini, ujenzi wa bandari   na reli kama ilivyoelekezwa katika Ilani ya Uchaguzi ya CCM mwaka 2010 – 2015.
Naibu Waziri wa Nishati na Madini, George Simbachawene alizungumzia mafanikio katika sekta hiyo pamoja na kuanza kwa miradi ya gesi nchini.
Awali, Makamu wa Pili wa Rais wa Zanzibar, Balozi Seif Ali iddi na Waziri Mkuu Mizengo Pinda waliwasilisha mafanikio ya Serikali mbili za Muungano kuhusu utekelezaji wa Ilani iliyowapa ushindi mwaka 2010.
Kutokana na taarifa hiyo, wajumbe waligawanywa makundi kwa mikoa yao jana jioni na kwenda kuzijadili kabla ya leo kutolewa maazimio.

WALIOFELI DARASA LA SABA WAKUTWA MADARASANI SHULE ZA SERIKALI...

Maktaba Kuu ya wilaya ya Mpanda. (Picha kwa hisani ya Maggid Mjengwa).

Idara ya Elimu Sekondari wilayani Mpanda mkoani Katavi, imeshitaki wakuu wa sekondari 10 waliokutwa na  wanafunzi 44, waliofeli mtihani wa Taifa wa darasa la saba unaoruhusu kujiunga na   sekondari za Serikali.
Mbali na kuchukua hatua hiyo, tayari imewafukuza na kusitisha masomo  ya wanafunzi hao 44 huku wakuu wa shule wakifikishwa katika Tume ya Utumishi ya Walimu kujibu tuhuma zinazohusishwa na viashiria vya rushwa.
Ofisa Elimu ya Sekondari wa Wilaya ya Mpanda, Venance Nyamwale  akizungumza jana kwa simu, alikiri kuwa pamoja wa wakuu hao kufikishwa kwenye Tume hiyo,  bado  wanaendelea  na kazi  katika nafasi zao wakisuburi uamuzi wa Tume.
Walimu hao wakuu ni wa sekondari za Usevya, Mamba, Kasokolo, Mpanda ndogo, Ikola, Kabungu, Inyonga, Sitalike, Machimboni na Kambi  ya Wakimbizi ya Mishamo.
Nyamwale alisema Kamati Maalumu  iliyohusisha viongozi waandamizi  kutoka wilayani kwa maagizo ya Wizara ya  Elimu  na Mafunzo  ya Ufundi  Stadi, ilitembelea sekondari 23  wilayani  humo  kuanzia Julai 13, hadi Agosti 2 na kubaini upungufu katika shule hizo 10.
Akifafanua, Nyamwale alisema wanafunzi hao waliokuwa wakisoma kidato cha kwanza ni watano, wanne wa kidato cha pili ambao pia walisajiliwa na kufanya mtihani wa Taifa wa kidato cha pili; 13 wa kidato cha tatu na 14 wa kidato cha nne.
Akifafanua, alisema wanafunzi  hao wote ilibainika hawakufaulu  mitihani  yao ya elimu ya msingi na majina yao hayakuwa kwenye kitabu cha Serikali mkoani Katavi  chenye orodha  ya wanafunzi waliofaulu mtihani wa Taifa  wa kumaliza  elimu  ya msingi.  
“Pia tulifuatilia kama Kamati  Maalumu  ili kuona  kama  walikuwa  na uhamisho rasmi  kutoka  mikoa mingine,  lakini  hata nyaraka  hizo  hazipo  kabisa.
“Naweza  kukiri kuwa pamoja na kukosa ushahidi  wa moja kwa moja, vipo  viashiria  vya rushwa katika udahili wa wanafunzi  hao  wasiokuwa na sifa.
“Inawezekana  wapo  watoto  wa walimu,  marafiki  zao na watumishi serikali lakini Tume  tuiachie wajibu wake  ifanye kazi  kwa uhuru ,“ alisisitiza.
Pia  alibainisha kuwa  tayari Mamati  Maalumu  iliwasilisha taarifa hiyo  rasmi  kwa  Mkaguzi wa Elimu  Kanda  Mjini  Mbeya  tangu Agosti.

KIPANYA CHAJIBAMIZA KWENYE LORI NA KUUA WATU SITA MBEYA...

Watu sita wamekufa na wengine kumi kujeruhiwa baada ya gari ya abiria waliyokuwa wanasafiria kutoka Mbeya kwenda Chimala wilayani ya Mbarali kugongana na lori la mizigo.
Ajali hiyo iliyotokea katika eneo la Mlima Nyoka nje kidogo ya Jiji la Mbeya barabara kuu ya Tanzania - Zambia majira ya saa nne asubuhi, ilihusisha gari aina ya Toyota Hiace yenye namba za usajili T 245 AMH na lori lenye T 276 AHQ.
Muuguzi wa zamu katika Hospitali ya Rufaa ambaye hakutaka jina lake liandikwe, aliwataja watu waliokufa kuwa ni  Steven Kimario (54) Mkazi wa Uyole, Sharifa Abdalah, Simon Mwakalukwa (66), Mariam Mwanginde, pamoja na  Andrew Simbeye (47),  Mkazi wa Mswisi wilayani Mbarali, wakati mwili wa mtu mmoja haujatambuliwa.
Alisema kati ya majeruhi kumi waliofikishwa hospitalini hapo, sita walitibiwa na kuruhusiwa, ambapo majeruhi wanne wanaendelea na matibabu ambao ni Elia Malowe (18), Charles Guman (53),  Dotto Tagala (44) na Fizara Kasim (28), na kwamba waliotibiwa na kuruhusiwa ni  matibabu ni Hajat Abdalah (8), Erika Januari (26), Betta Sanga (52), Maria Anania (32), Isaka Leonard (17) na Erasto Mulwale(34).
Baadhi ya watu walioshuhudia ajali hiyo, walisema chanzo cha ajali hiyo ni dereva wa lori hilo lililokuwa likitoka Dar es Salaam kuelekea Kongo ambaye alikuwa akiyumba njia nzima.
Dereva wa lori hilo aliyejulikana kwa jina la Jofrey Msoma alikamatwa na askari wa usalama barabarani waliofika eneo la tukio.

ADAI WAFUNGWA HULETEWA WANAWAKE NA DAWA ZA KULEVYA GEREZANI...

KUSHOTO: Gereza hilo lenye ulinzi hafifu. KULIA: Lee Chapman.

Wafungwa katika gereza lenye ulinzi hafifu wanaruhusiwa kutembelewa na marafiki wa kike na mara kwa mara wamekuwa wakimiliki dawa za kulevya na simu za mkononi, imedaiwa.
Madai hayo yasiyo ya kawaida yametolewa na Lee Chapman mwenye miaka 34, ambaye alitoroka kutoka gereza la Hollesley Bay, karibu na Woodbridge, huko Suffolk, ambako alikuwa akitumikia kifungo kwa makosa ya uchomaji mali kwa makusudi na ujambazi.
Chapman alitoroka kutoka jela na kupora nyumba sita ndani ya siku 11. Aliongezewa miaka miwili zaidi katika hukumu yake.
Mfungwa huyo kwa hivi karibuni alihamishiwa katika gereza lenye ulinzi hafifu, kabla ya kutoroka na kisha kukutwa na polisi akiwa amejilaza kwenye kichochoro mjini Peterborough na kushitakiwa kwa utoro.
Wakili wa Chapman aliieleza Mahakama ya Ipswich kwamba mfungwa huyo alijikuta kwenye wakati mgumu katika gereza hilo lenye ulinzi hafifu.
Oktoba 8 mfungwa huyo aliondoka chumbani mwake kupitia bomba la kutolea maji machafu na kudandia basi kutoka kwenye viwanja vya gereza hilo.
Wakati akiwa njiani kurudi Cambridgeshire, Chapman alivamia na kupora nyumba sita huko Bury St Edmunds, mjini Suffolk, katika siku 11.
Chapman aliiba vyakula pamoja na mashine za michezo ya Nintendo kutoka katika nyumba moja.
Mmoja wa wamiliki wa nyumba hizo alimkuta Chapman ndani ya nyumba yake akila chokoleti kutoka kwenye jokofu lake.
Mwanamke huyo alipomkabili Chapman, aliomba radhi, akarejesha funguo za nyumba alizozikuta humo na kisha kutokomea kusikojulikana.
Chapman baadaye alikutwa na polisi akiwa amelala mjini Peterborough mnamo Oktoba 9.
Aliieleza mahakama hiyo alikiri kutoroka kutoka jela na kufanya ujambazi.
Jaji David Goodin alimfunga jumla ambapo sasa miaka miwili itaongezwa kwenye hukumu yake ya awali.
Baada ya kesi Msemaji wa Magereza alikanusha kwamba kulikuwa na dawa za kulevya, simu za mikononi na wanawake kwenye Gereza la Hollesley Bay.
Alisema: "Ni kosa la jinai kumiliki dawa za kulevya au simu ya mkononi katika gereza na mfungwa yeyote anayekutwa akimiliki vitu hivyo anakabidhiwa kwa polisi.
"Tunalichukulia suala hili kwa umakini mkubwa mno na wafanyakazi wanashughulika kutoa kila kitu kilichokatazwa gerezani, wakishirikiana na mamlaka husika pamoja na polisi.
Kuhusu madai ya Chapman kwamba wanawake wamekuwa wakilala kwenye gereza hilo, alisisitiza: "Madai haya haya si ya kweli hata kidogo."

JICHO LA TATU...

CHEKA TARATIBU...

Jamaa usiku kucha tumbo linanguruma kwa sauti mara 'gruuuuu….' wakati mwingine 'greeeee…' mara 'truuuuuuu….' Mwishowe mkewe akamuuliza, "Baba Nanihii, vipi mwenzangu?" Jamaa akajibu kwa mkato, "Natafuta RINGTONE ya tumbo langu!" Duh...

JICHO LA TATU EXTRA...

PHILIP MANGULA SASA KUMRITHI PIUS MSEKWA CCM...

Philip Mangula.

Philip Mangula anatarajiwa kurejea tena katika ulingo wa kisiasa katika ngazi za juu za CCM baada ya kuteuliwa kugombea nafasi ya Makamu Mwenyekiti.
Mangula aliyekuwa Katibu Mkuu wa CCM kwa miaka 10 ya utawala wa Serikali ya Awamu ya Tatu chini ya Mwenyekiti Rais mstaafu, Benjamin Mkapa, sasa njia ni nyeupe kurejea katika safu ya juu ya uongozi wa CCM.
Juzi, Kamati Kuu ya Halmashauri Kuu ya Taifa (NEC) pamoja na NEC yenyewe, vilimpitisha mwanasiasa huyo mkongwe kuwania nafasi hiyo katika uchaguzi utakaofanyika kesho na Mkutano Mkuu wa Taifa.
Jana, wakati Mwenyekiti wa CCM Taifa, Rais Jakaya Kikwete alipotangaza jina lake, ukumbi wa Kizota ulilipuka kwa shangwe, kuashiria kukubaliana na uteuzi wa kada huyo kutoka mkoani Njombe.
Awali, Katibu wa NEC wa Itikadi na Uenezi, Nape Nnauye, alitangaza uteuzi huo wa Mangula na Dk Ali Mohammed Shein kwa umakamu wa Zanzibar, kwa waandishi wa habari jana asubuhi Kizota.
Baadaye, Rais Kikwete katika hotuba yake ya ufunguzi aliwatangazia wajumbe wa Mkutano Mkuu wa Nane kuhusu uteuzi huo na kushangiliwa. 
Mangula alikuwa katika uongozi wa Rais Mkapa hadi alipoondoka madarakani kikatiba mwaka 2005 na katika uteuzi wa Sekretarieti ya kwanza ya Rais Kikwete, aliteuliwa Yusuf Makamba.
Makamba, naye alitemwa mwaka jana na kuteuliwa Wilson Mukama, ambaye duru za siasa hapa zinaeleza kuwa uwezekano wa kurudi ni mdogo.
Akizungumzia uteuzi wa Mangula, mwanasiasa mkongwe nchini, Paul Kimiti alisema kada huyo ni mtu mchapakazi, mwadilifu na anayeaminika.
“Huyu ni mtu mwadilifu. Ni zao la Mwalimu Nyerere, mtu asiyekuwa na tuhuma mbalimbali. Ni mtu msafi, mwadilifu, kiongozi anayeaminika,” alisema Kimiti.
Alisema kurejea kwa Mangula katika uongozi wa juu wa CCM kutakuwa msaada mkubwa kwa chama.
Akishinda kesho, Mangula atakuwa ndiye Mwenyekiti wa Kamati ya Maadili ya CCM na anatarajiwa kuwa atarejesha chama hicho ‘katika mstari’ baada ya siku za karibuni kunyooshewa vidole kwa kukosa maadili miongoni mwa wanachama wake.
Uteuzi wa Dk Shein ulitarajiwa hasa baada ya kuwa Rais mstaafu wa Zanzibar, Amani Abeid Karume kuamua kuendelea kushika wadhifa huo hata baada ya kuondoka madarakani mwaka 2010.

MTANDAO HATARI WA KUIBA WATOTO WAIBUKA DAR...

Jamii imetahadharishwa kuwa macho na mtandao wa kuiba watoto baada ya kubainika kuwepo kwa nyumba inayotumika kuhifadhi watoto wanaoibwa jijini Dar es Salaam.
Taarifa za uwepo wa nyumba hiyo na mtandao huo zimebainika  baada ya kuibwa kwa mwanafunzi wa Shule ya Msingi Bokorani, Mtongani katika Wilaya ya Temeke, Dar es Salaam, Zawia Mohamed (7) (pichani), alipokuwa akitoka shuleni zaidi ya miezi minne iliyopita.
Zawia aliibwa na mtu asiyejulikana Juni 18 mwaka huu, nje ya lango la shule hiyo alipokuwa akitoka kwenda nyumbani. Hata hivyo kwa juhudi za wazazi na Polisi, alipatikana Oktoba 20 mwaka huu mkoani Singida.
Wakisimulia tukio hilo kwa nyakati tofauti hivi karibuni walipozungumza baada ya mtoto huyo kupatikana, wazazi wa mtoto huyo wanaoishi Mtoni Kwa Azizi Ally, jijini Dar es Salaam walisema uchunguzi wa Polisi na maelezo ya mtoto, umebaini kuwepo kwa mtandao hatari wa wizi wa watoto.
Kwa mujibu wa Mallya, Zawia aliibwa akitoka shuleni baada ya kuitwa na mtu asiyejulikana aliyejitambulisha kuwa ni baba mdogo na alimvusha barabara akimweleza anampeleka kumnunulia sare za shule kama zawadi yake kwa kufaulu vizuri.
Alisema mjukuu wake huyo, ambaye ni mtundu na mdadisi, alidai mtu aliyemwiba alimwambia amwite Ngasa na alikuwa akiwapa ugali kwa dagaa kila siku walipokuwa katika nyumba hiyo huku wakizuiwa kutoka nje ya nyumba hiyo.
Zawia alithibitisha hayo na kuongeza kuwa, katika nyumba hiyo aliona watu wengi wakija asubuhi katika nyumba hiyo wakipewa vibakuli ambavyo hakujuwa wanawekewa nini na aliwaona wakinywa kila mtu na kibakuli chake.
“Sisi hatukupewa, tuliona wao ndio wanakunywa, siku moja waligombana wenyewe na Ngasa alinichukua tukapakia lori tukaenda hukooo, nikakaa kwa akina God (wasamaria wema) na sikumuona tena Ngasa ndio babu na mama wakaja,” alieleza Zawia.
Mkuu wa Upelelezi wa Mkoa wa Singida, Ayub Tenge akizungumza kwa niaba ya Kamanda wa Polisi wa mkoa huo, Linus Sunzumwa, alithibitisha tukio hilo na kutoa angalizo kwa wazazi, walimu na jamii kuwalinda watoto dhidi ya hatari ya kuibwa.
Kwa upande wake, Kamanda wa Polisi wa Mkoa wa Kinondoni, Charles Kenyela akizungumzia kuwapo kwa mtandao huo wa wizi wa watoto, alisema ni ngumu kuthibitisha uwepo wa mtandao lakini aliahidi kulifanyia kazi suala hilo ili kubaini ukweli wake.
Akifafanua kuhusu tukio hilo, Mallya alisema msamaria mwema Sylvia (mama God) aliyemhifadhi Zawia mkoani Singida, aliwaeleza kuwa mtu huyo alifika nyumbani kwake na kudai yeye ni yatima na mke wake (mama Zawia) amekufa hivyo anatafuta Wasukuma wenzake wamhifadhi kwa muda.
Kwa mujibu wa Sylvia, mtu huyo aliyekuwa na lafudhi ya Kisukuma, wakati mwingine alishindwa kuzungumza lugha hiyo, jambo lililowapa wasiwasi na wakati wote alikuwa akimlinda Zawia ili kutompa nafasi ya kujieleza.
Baba mzazi wa Zawia, Mohamed Kassim na mama yake, Mwanahamisi, walisema taarifa za kupatikana kwa mtoto wao walizipata Oktoba 31, baada ya mtu mmoja kuwatafuta kutoka Singida.
Wazazi hao waliishukuru Polisi na vyombo vya habari kwa kuandika kuhusu tukio hilo tangu mtoto wao apotee.

ZIRO PLUS...

WAZAZI WAKABIDHI BINTI WA MIAKA 13 KWA 'MBAKAJI' MKOA WA KATAVI...

Imani ya wazazi kwa dereva wa basi kuwa angemfikisha mtoto wao wa kike wa miaka 13 katika kituo husika apokewe na ndugu zake, imeharibu maisha ya mtoto huyo baada ya kupitishwa kituo husika na kuishia kunajisiwa
Akisimulia mkasa huo jana, Kaimu Kamanda wa Polisi Mkoa wa Katavi, Joseph Myovela amedai kuwa mtoto huyo alisema wazazi wake, wakazi wa Kijiji cha Tutuo mkoani Tabora, juzi kwa imani walimkabidhi kwa dereva wa kampuni ya mabasi ya Air Bus, Nasibu Ramadhani (33) ili amfikishe anapokwenda.
Kamanda Myovela alidai kuwa mtoto huyo (jina limehifadhiwa), alipandishwa katika basi hilo na wazazi wake na kukabidhiwa kwa Ramadhani ili amshushe katika Kijiji cha Inyonga, wilayani Mlele ambako angepokewa na ndugu zake.
Alidai kuwa dereva huyo alipofika katika Kijiji cha Inyonga, hakusimamisha gari hadi alipofika mjini Mpanda na kumpeleka mtoto huyo moja kwa moja  kwenye  nyumba  ya kulala wageni ya Miami iliyoko katika Mtaa wa Majengo.
Kwa mujibu wa madai ya Kamanda Myovela, mtoto huyo wa kike katika mahojiano yake na Polisi alisema dereva huyo alilipa gharama za chumba katika nyumba hiyo na kuondoka.
Msichana huyo katika maelezo hayo Polisi, alisema baadaye dereva huyo alirejea katika chumba hicho na kumlazimisha afanye naye mapenzi kwa  nguvu  lakini hakuwa tayari ndipo alipompiga makofi  na kumtisha kwa maneno makali na kumuingilia kwa nguvu.
Kutokana na vurugu hizo, inadaiwa mhudumu wa nyumba hiyo alisikia na kutoa taarifa Polisi.
“Baada ya askari Polisi na mhudumu kuingia chumbani  humo walipigwa na  butwaa kumkuta  msichana huyo mwenye umri mdogo akiwa amelala  kitandani chumbani mwa mtuhumiwa, askari wetu walipomhoji  msichana huyo  alieleza kuwa yeye ni mkazi  wa Kijiji cha Tutuo mkoani Tabora ambako anaishi na wazazi wake,” alieleza Kamanda.
Kamanda Myovela alisema mtuhumiwa huyo bado anashikiliwa Polisi na atafikishwa mahakamani  mara baada ya uchunguzi dhidi yake kukamilika.

JICHO LA TATU...

CHEKA TARATIBU...

Jamaa wawili walikuwa wakizungumza kuhusu kazi, ndipo mmoja alipouliza, "Niambie, kwanini msimamizi wako kakufukuza kazi?" Mwenzake akajibu, "Unajua jinsi msimamizi anavyosimama akitazama wengine wakifanya kazi. Msimamizi wangu akaona wivu. Watu walianza kufikiria mimi ndiye msimamizi!" Kasheshe...

MKUTANO MKUU WA CCM MJINI DODOMA MCHANA HUU...

Mwenyekiti wa Taifa wa Chama Cha Mapinduzi, Rais Jakaya Kikwete akisisitiza jambo wakati wa hotuba yake ya ufunguzi wa Mkutano Mkuu wa chama hicho mjini Dodoma mapema leo.

Sehemu ya wajumbe waliohudhuria Mkutano Mkuu wa Chama Cha Mapinduzi (CCM) mjini Dodoma, mapema leo wakifuatilia hotuba ya ufunguzi iliyotolewa na Mwenyekiti wa chama hicho, Rais Jakaya Kikwete.

PRECISION AIR YAWA YA KWANZA DUNIANI KUNUNUA ATR 42-600...

Ndege aina ya ATR 42-600 ya Precision Air ikiwa angani.

Shirika la Ndege la Precision Air limekuwa shirika la kwanza barani Afrika na duniani kumiliki ndege ya kisasa aina ya ATR 42-600 baada ya kukamilisha mchakato wa kuinunua mapema leo.

Mkurugenzi Mtendaji wa Kampuni ya ndege ya ATR iliyopo jijini Toulouse, Ufaransa, Filippo Bagnato alisema hayo mwishoni mwa wiki wakati wa ununuzi wa ndege hiyo.

Ndege hiyo yenye thamani ya dola za Marekani milioni 16.4  takribani Sh bilioni 26.24, ni bora katika sekta ya usafiri wa anga duniani na imezingatia usalama wa abiria kwa hali ya juu pamoja na kutoa aina mbalimbali za burudani kwa abiria wanaosafiri.

Mkurugenzi Mtendaji wa Precision Air, Alfonse Kioko akipokea ndege hiyo alisema kuwa shirika lake litawekeza zaidi ya dola za Marekani milioni 100 kuongeza uwezo pamoja na kuongeza wigo wa safari za shirika hilo katika miaka michache ijayo.

Kioko alisema kuwa ndege hiyo mpya yenye uwezo wa kubeba abiria 50, itatumika kuongeza wigo wa safari za shirika hilo kutoka Dar es Salaam na Kilimanjaro. Safari hizo zitaanza rasmi ndani ya wiki mbili zijazo baada ya kuwasili kwa ndege hiyo jijini Dar es Salaam wiki hii.

“Uwekezaji wa dola milioni 100 utatuwezesha kuwa na ndege mpya tano, nne zikiwa ni ATR 42-600 na moja ikiwa ni ATR 72-600 pamoja na  injini moja mpya  ya dharura katika miaka mitatu ijayo. Ujio wa ndege hizi utaongeza idadi ya ndege zetu za ATR kufikia 14 na kutuwezesha kutoa huduma bora zenye uhakika,” alisema Kioko.

Awali Mkurugenzi Mtendaji wa Kampuni ya ATR, Filippo Bagnato alisema kuwa Tanzania itaendelea kuwa soko muhimu la kampuni yake na kuongeza kuwa atafanya kila jitihada kuhakikisha uhusiano baina nchi hizo unaendelea kuimarika.

 “Utoaji wa ndege ya kwanza ya ATR 42-600 kwa Shirika la Precision ni suala la kihistoria katika Bara la Afrika na duniani. Baada ya kukabidhi ndege hii, Shirika la Ndege la Precision litakuwa miongoni mwa mashirika mengine yanayotoa huduma bora na zenye uhakika.

“Kwa kutumia ATR 42-600, Shirika la Precision litaendelea kujitanua kibiashara na kukumbana na changamoto zilizopo katika sekta ya usafiri wa anga Afrika na kutoa huduma zenye gharama nafuu,” alisema.

Ofisa Mkuu wa Ukaguzi wa Mamlaka ya Usafiri wa Anga Tanzania (TCAA), Abubakar Kiroge wakati wa makabidhiano alisema kuwa uchunguzi katika ndege hiyo umeshakamilika na ndege hiyo inakidhi vigezo na taratibu zote zinazotakiwa nchini Tanzania.

“Ndege hii imekidhi vigezo vya kiusalama vinavyotakiwa. Mamlaka husika sasa ipo tayari kuipatia Precision Air cheti cha kuwezesha ndege hiyo kutumika nchini Tanzania. Ukweli ni kwamba ndege hii imezingatia usalama wa abiria kwa haki ya juu,” alisema.

BUNGE LASEMA WAZIRI WA NISHATI NA KATIBU WAKE NI WAZUSHI...

Spika wa Bunge, Anne Makinda.

Waziri wa Nishati na Madini, Profesa Sospeter Muhongo na Katibu Mkuu wa wizara hiyo, Eliakim Maswi wameonywa na Spika wa Bunge, Anne Makinda kwa kitendo cha kulidhalilisha na kulifedhehesha Bunge kwa kuzusha tuhuma za uongo dhidi ya baadhi ya wabunge ambazo hata hivyo zimebainika hazina ukweli wowote.

Licha ya kuwataka kutorudia tena kuibua uzushi, Spika pia amewaonya wabunge watano akiwemo Mnadhimu wa Kambi ya Upinzani Bungeni, Tundu Lissu ambaye ni Mbunge wa Singida Mashariki kwa kitendo cha 'kushabikia’ na kuzungumza maneno ambayo hawakuwa na ushahidi nayo.

Wabunge hao waliotiwa hatiani na Kamati hiyo ndogo ya Haki, Maadili na Madaraka ya Bunge  iliyokuwa ikiongozwa na Mwenyekiti wake, Hassan Ngwilizi ni wawili kutoka CCM, Mbunge wa Mwibara, Alphaxard Kangi Lugola na Mbunge wa Nkasi Kaskazini, Ally Kessy na watatu wa Chadema ambao ni Lissu, Mbunge wa Rombo,  Joseph Selasini na Mbunge wa Ubungo, John Mnyika.

Alitoa onyo hili bungeni jana alipokuwa anasoma ripoti ya 'Kamati ya Ngwilizi’ iliyokuwa inachunguza tuhuma za baadhi ya wabunge na wajumbe wa Kamati ya Nishati na Madini kujihusisha na vitendo vya rushwa katika kutekeleza kazi zao za Kibunge.

Waliokuwa wanahusishwa ni pamoja na Mbunge wa Viti Maalumu, Sarah Msafiri Ally (CCM), Suleiman Zedi ambaye ni Mbunge wa Bukene kwa tiketi ya CCM, Munde Tambwe wa Viti Maalumu na Christopher Ole Sendeka, mbunge wa Simanjiro kwa tiketi ya CCM.

Katika ripoti yake aliyoisoma kwa saa moja, wabunge wote waliotumiwa kwa vitendo vya rushwa hawakupatikana na hatia.

Kutokana na ukweli huo, alisema suala hilo limetoa somo na mfano mzuri juu ya mazoea yasiyofaa ya wabunge kuzungumza mambo bungeni bila kufanya utafiti, na badala yake kujikuta wakiingia katika mtego wa kutuhumu watu au taasisi.

“Kwa haya yaliyotokea, kuna umuhimu wa wabunge kujizuia kusema mambo ambayo ni tetesi, na pia ni lazima wabunge wajizuie na tabia ya kutaka kusema tu kuhusu jambo lolote ili wasikie, bila ya kuwa na ukweli wa jambo lenyewe,” alisema.

Ndipo, kutokana na uchunguzi wa kuonesha kuwa tuhuma hazikuweza kuthibitishwa, na pia kwa kuwa tuhuma zenyewe zimeathiri kwa kiasi kikubwa hadhi na heshima ya Bunge kama taasisi, na pia hadhi na heshima ya wabunge waliohusishwa, aliamua kutoa uamuzi kwa mujibu wa utaratibu wa kibunge.

Alianza kwa kumkuta Maswi na hatia, akisema amelidhalilisha na kulifedhehesha Bunge kwa kuzusha tuhumza za uongo na kufanya umma wa Watanzania kuamini baadhi ya wabunge wa Kamati ya Nishati na Madini wanajihusisha na vitendo vya rushwa.

“Na kwa kufanya hivyo, ametenda kosa la kuvunja haki za Bunge, na anastahili adhabu,” alisema huku akimtaka asirudie tena kosa la kuzua tuhuma dhidi ya Bunge na Wabunge.

Onyo kama hilo lilitolewa kwa Kessy, Lugola, Mnyika na Selasini, wakionywa kutorudia kosa la kuzungumzia bungeni jambo wasilokuwa na uhakika nalo.

Lakini kwa licha ya kutakiwa kutorudia kuzungumza jambo asilokuwa na uhakika nalo, alionekana kuvunja Kanuni za Bunge kwa kulisemea nje ya Bunge suala la mgongano wa maslahi kwa wabunge waliotuhumiwa kujinufaisha kwa kufanya biashara na Tanesco, akiwataja kwa majina tena kwa ushahidi wa kuambiwa.

Hata hivyo, Spika alimuombea Lissu msamaha kwa wabunge Sarah Msafiri na Munde Tambwe waliokuwa wanatuhumiwa kwa rushwa na pia kujinufaisha kibiashara ndani ya Tanesco.

Naye Profesa Muhongo, amepatikana na hatia baada ya kushindwa kuthibitisha kauli yake aliyowahi kuitoa bungeni kuwa, ana ushahidi usio na shaka wa baadhi ya wabunge na wajumbe wa Kamati ya Nishati na Madini kufanya biashara na Tanesco, akisema baadhi wameingia mkataba wa kuiuzia matairi huku wakipaisha bei tofauti na ile ya kwenye mkataba.

“Kwa kuwa kauli hii aliitoa bunge tena kwa kutangaza anao ushahidi, lakini ukweli wake haukuweza kuthibitishwa, namtaka Waziri Muhongo awe mwangalifu anapotoa kauli bungeni kwa sababu kauli za mawaziri huchukuliwa kuwa ni kali za Serikali, hivyo anapotoa kauli yoyote bungeni ahakikishe ana uhakika wa jambo analolisema,” alisema.

Spika Makinda alilazimika kuunda tume aliyoipa hadidu moja tu ya rejea ambayo ni kuchunguza na kumshauri Spika iwapo tuhuma kwa baadhi ya wajumbe wa Kamai ya Nishati na Madini kujihusisha na vitendo vya rushwa ni za kweli au hapana.

Alifanya hivyo baada ya Maswi kuandika barua yenye Kumbukumbu SBA. 88/223/01/28 aliyoandika kwa Katibu wa Bunge Julai 31 mwaka huu akimtuhumu Msafiri kwamba alikwenda ofisini kwake na kuomba rushwa ya Sh milioni 50 aweze kuwagawia baadhi ya wabunge na wajumbe wa Kamati ya Nishati na Madini waweze 'kukingia kifua’ kile walichodai utendaji wake usioridhisha katika wizara hiyo.

Aidha, Maswi alimtuhumu Zedi kuomba rushwa ya Sh milioni 2 kwa kila mjumbe wa Kamati.

Wabunge wengine, Tambwe na Ole Sendeka, walihusishwa na rushwa baada ya kuonekana kuwa tishio kwa Katibu Mkuu huyo waliyembana na kumweleza lazima aachia nafasi hiyo kwa kuwajibika, kutokana na utendaji usioridhisha.

Kutokana na tuhuma hizo zilizoanza kama uvumi baadaye kuibua hoja nzito bungeni, Spika alilazimika kuvunja kamati ya nishati na madini na kuunda kamati ya kuchunguza tuhuma.

Lakini baada ya kukabidhiwa matokeo ya uchunguzi, Spika alilieleza bunge kuwa, Kamati imebaini Maswi aliibua tuhuma hizo kama njia ya kujihami dhidi ya tishio la Wabunge hao kutaka kumkwamisha ili ang’oke katika nafasi hiyo.

Sendeka aliingizwa katika tuhuma za rushwa kutokana na kuongoza `vita’ dhidi ya viongozi wakuu wa Wizara ya Nishati na Madini, akitaka hatua zichukuliwe dhidi yao kutokana na kukiuka sheria ya manunuzi, kwa kuamuru kununuliwa kwa lita milioni kumi kutoka kampuni ya Puma Energy (T) Ltd ili kuendeshea mitambo ya IPTL, wakati Tanesco ilishaingia mikataba na makampuni mengine kwa ajili hiyo pia.

Ndipo baadhi ya wabunge wakiwemo, Kessy na Kangi Lugola wakaanza kutilia shaka msimamo wake, wakiamini amehongwa na makampuni ya mafuta.

Lakini baada ya kubanwa, hakuna aliyeweza kutoa ushahidi, kama ilivyokuwa kwa Mnyika ambaye katika hotuba yake ya Kambi ya Upinzani Bungeni alisema kuwa kuna kampeni inafanywa ndani ya nje ya Bunge ili uamuzi wa Katibu Mkuu Maswi ubatilishwe kwa maslahi ya makampuni yaliyokosa Zabuni, naye alishindwa kuthibitisha.

Pamoja na uchunguzi kuisafisha Kamati ya Nishati na Madini, mara baada ya kuahirisha Bunge Spika alisema hajairudisha kamati hiyo na badala yake itaundwa kamati nyingine katika mkutano ujao wa Bunge.

KIAMA CHA VIGOGO WANAOFICHA FEDHA USWISI KIMEWADIA...

Mwanasheria Mkuu wa Serikali, Jaji Frederick Werema.

Serikali imeahidi itatumia vyombo vyake vya ndani na nje katika kufuatilia hoja ya Mbunge wa  Kigoma Kaskazini (Chadema), Kabwe Zitto juu ya tuhuma za kuwepo kwa Watanzania walioficha fedha haramu katika benki za nje.

Uamuzi huo wa Serikali umetokana na hoja ya mbunge huyo kuwa, baadhi ya Watanzania, wakiwemo viongozi wastaafu wa Serikali, wameficha fedha nyingi haramu nje ya nchi na kwamba anayo orodha ya majina yao na ya benki walikohifadhi fedha hizo

Akijadili hoja hiyo bungeni jana, Mwanasheria Mkuu wa Serikali, Frederick Werema alisema kwa vile tayari serikali kupitia vyombo vyake vya usalama na Taasisi ya Kuzuia na Kupambana na Rushwa (TAKUKURU) imeshaanza kuzifanyia uchunguzi tuhuma hizo, baadhi ya hoja zilizowasilishwa na Zitto zinakosa mashiko.

Alisema mapendekezo mengine yaliyotolewa na Zitto yanapingana na sheria za nchi, ikiwa ni pamoja na kutoruhusiwa kwa mtu yeyote kutoa siri za benki kuhusu wateja wake na kwamba sheria hiyo imetungwa na bunge.

Werema alisisitiza kuwa, majina ya wanaotuhumiwa kuficha fedha nje ni muhimu kwa vile yanatoa nafasi kwa vyombo husika kupata mahali pa kuanzia. Alimtaka Zitto na wabunge wengine wenye ushahidi wa suala hilo kuuwasilisha kwake ama kwa Spika wa Bunge.

Werema alisema kwa kuwa Serikali imeshaanza kufanya uchunguzi wa tuhuma hizo kupitia kwenye vyombo vyake vya usalama, ni vyema iachwe iendelee na kutoa taarifa kwa bunge kuhusu matokeo ya uchunguzi huo katika kikao chake cha 11 kitakachofanyika Aprili mwakani.

Akichangia hoja hiyo, Waziri Mkuu Mizengo Pinda aliunga mkono mapendekezo yaliyotolewa na Mwanasheria Mkuu wa Serikali na kutaka vyombo vinavyohusika viachwe viendelee kufanya uchunguzi kabla ya kutoa taarifa kwa Bunge.

Pinda alisema licha ya Zitto kutoa hoja hiyo, amekuwa mwangalifu na anasita kutaja majina ya wahusika kwa sababu za msingi kwa vile anafahamu vyema ukweli na uhalali wa yaliyofanywa na watuhumiwa unahitaji ushahidi wa kutosha ili asionekane amezua jambo, ambalo hana hakika nalo.

"Tunachopaswa  kujua ni kina nani hawa Watanzania, ambao wamekwenda kuweka pesa nje ya nchi kinyume cha sheria. Kuweka pesa nje si tatizo, lakini lazima iwe ni kinyume cha sheria na huo ndio msingi wa mjadala uliopo bungeni," alisema.

Pinda alisema hana ugomvi na hoja iliyotolewa na Zitto bungeni na kuongeza kuwa, ushauri wa Mwanasheria Mkuu umelenga kuiwezesha serikali kuwa sehemu ya yale yanayohitajika kufanywa katika kupeleleza tuhuma hizo.

"Napenda kukubaliana na Mwanasheria Mkuu lakini lazima bunge lijisikie kwamba wote tumeridhika, hakuna kwamba likienda kule tutaficha, hakuna sababu za kuficha kwa sababu mtu kama ameiba ni mwizi tu," alisema.

Pinda alimtaka Zitto aisaidie serikali kwa kutaja majina ya watuhumiwa na mtu mwingine anayeweza kutoa taarifa zitakazoisaidia serikali katika uchunguzi wake na kusisitiza kuwa, kamwe majina hayo hayawezi kuchakachuliwa.

"Tukifanya hivyo, tutakuwa tumefanya jambo zuri na hatutaweza kuilaumu serikali wala bunge," alisema.

Akihitimisha mjadala huo, Spika wa Bunge, Anne Makinda alisema kwa mujibu wa kanuni za Bunge, hoja iliyowasilishwa na Zitto haiwezeshi kuundwa kwa kamati teule kwa ajili ya kujadili tuhuma hizo.

Makinda alisema hiyo haina maana kwamba hoja ya Zitto imetupwa, isipokuwa serikali imeamua kuzifanyia kazi kwa kuendeleza uchunguzi wake na kutoa taarifa kwa bunge katika kikao chake cha 11.

Katika hoja yake, Zitto alisema viongozi mbali mbali wastaafu wa serikali wanahusika kuficha mabilioni ya pesa katika benki za nje, hasa Uswisi na kutaka wachunguzwe na kuchukuliwa hatua za kisheria.

Mbali na hilo, Zitto alipendekeza iwe marufuku kwa kiongozi yeyote wa umma au mume au mke wake au mtoto wake kuwa na akaunti nje ya nchi isipokuwa kwa sababu maalumu na kwa kibali rasmi kutoka kwa Rais wa Jamhuri ya Muungano.

Zitto pia alitaka serikali kuwasiliana na Benki ya Dunia kupitia kitengo cha ‘Assets Recovery Unit’ ili mabilioni ya fedha na mali ambazo zimetoroshwa nje ya nchi kwenda Uswisi, Dubai, Mauritius na maeneo mengine ziweze kurejeshwa.

Wakichangia hoja hiyo juzi, Werema na Waziri wa Nchi, Ofisi ya Waziri Mkuu, Sera na Uratibu, William Lukuvi walimtaka Zitto awataje kwa majina Watanzania wanaotuhumiwa kuficha fedha haramu nje ya nchi ili waweze kuchukuliwa hatua za kisheria.

Kwa upande wake, Lukuvi alisema kama Zitto anayo majina, anapaswa kuyaweka hadharani ili serikali iweze kuendesha uchunguzi wa uhakika na hatimaye kuwabaini wahusika na kuwachukulia hatua.

Akijadili hoja hiyo, Luhaga Mpina (Kisesa -CCM) alisema hoja hiyo imeletwa kwa wakati mwafaka, lakini alimtaka Zitto aache kuzunguka, badala yake ayaweke hadharani majina ya watuhumiwa ili sheria  ichukue mkondo wake.

Alisema hoja ya Zitto kutaka iundwe tume maalumu kwa ajili ya kuchunguza tuhuma hizo, haina maana iwapo ataendelea kuficha majina yao. Alisema jambo la msingi ni taasisi husika kuanza kuwachunguza mara moja wahusika wa tuhuma hizo wanaofahamika kwa majina.

"Ningekuwa Zitto, ningekabidhi leo hii hii hati zote kuhusu wahusika wa tuhuma hizo ili hatua zianze kuchukuliwa," alisema Mpina na kumtaka Zitto akabidhi hati hizo kwenye meza ya Spika iwapo anazo.

Naye Christopher Ole Sendeka (Simanjiro-CCM) alisema wapo wafanyabiashara halali wanaohifadhi fedha zao nje ya nchi kihalali, lakini wengine ni mafisadi na wanapaswa kuchukuliwa hatua za kisheria.

Alisema haiwezekani ziwepo tuhuma kubwa na nzito kwa watu wenye dhamana kubwa ya nchi halafu Serikali ikakaa kimya. Alisema aliwahi kutoa hoja bungeni kutaka watu hao watajwe majina, lakini anashangaa kuona hadi sasa kimya.

Ole Sendeka alitaka hoja iliyowasilishwa na Zitto isifanyiwe marekebisho kama alivyopendekeza Mwanasheria Mkuu, badala yake iungwe mkono kwa bunge kuunda kamati teule kwa ajili ya kuchunguza tuhuma hizo.

Alisema haiwezekani watu waendelee kutajirika ghafla baada ya kuwa hohehahe kwa miaka mingi na iwapo viongozi wa zamani na wa sasa wa serikali ama watoto wa vigogo wanahusika, hatua zichukuliwe bila kujali nyadhifa zao.

Mbunge wa Arumeru Mashariki, Joshua Nassari (Chadema) aliomba mwongozo wa mwenyekiti na kusema haoni sababu kwa nini Zitto ashinikizwe kutaka majina kwa sasa wakati ameeleza wazi kwenye hoja yake kuwa, atakuwa tayari kufanya hivyo baada ya kuundwa kwa kamati teule kwa ajili ya kuchunguza tuhuma hizo.

Naye Mbunge wa Mwibara, Kangi Lugora (CCM) alisema bunge halipaswi kumng'ang'ania Zitto ataje majina ya watuhumiwa, badala yake iundwe kamati teule kwa ajili ya kuchunguza tuhuma hizo na wahusika wachukuliwe hatua kali.

"Zitto kaleta ufunguo wa kuanzia. Akaunti zinajulikana zilipo, wanaozimiliki wanajulikana. Waziri Membe (Benard Membe-Waziri wa Mambo ya Nje na Ushirikiano wa Kimataifa) alishatamka wazi kwamba, anayajua majina ya watu hao, awataje," alisema.

Wakati Lugora alipotaja jina la Membe, waziri huyo alionekana akigonga meza kuunga mkono hoja hiyo huku akitingisha kichwa kuonyesha kwamba anaiafiki hoja hiyo.

Mbunge huyo alisema kwa sasa wananchi wamechoka kuendelea kusikiliza wimbo wa mafisadi kwa sababu hawawezi kuondoka kwa kuimbiwa wimbo huo.

Alisema katika hatua za awali, uchunguzi unaweza kufanyika bila ya wahusika kutajwa majina.

Waziri Mkuu Mizengo Pinda wiki iliyopita alisema tayari serikali imeshaanza kuchunguza tuhuma hizo na kuongeza kuwa, uchunguzi huo hauwezi kufanyika kwa kipindi kifupi. Alisema uchunguzi

utakapokamilika, serikali itatoa taarifa.

CCM YAANZA VIKAO VYAKE VYA MWISHO DODOMA LEO...

Mwenyekiti wa CCM Taifa, Rais Jakaya Kikwete.

CCM leo imeanza vikao vyake vya mwisho kuelekea katika Mkutano Mkuu wa Nane wa chama hicho ambao mwishoni utahitimisha kupanga safu za viongozi  watakaokiongoza kwa miaka mitano ijayo.

Mwenyekiti wa CCM Taifa, Rais Jakaya Kikwete alitua hapa jana saa 8.40 mchana, tayari kuongoza vikao hivyo vinavyoanza leo kwa kutanguliwa na Kamati Kuu asubuhi na baadaye Halmashauri Kuu ya Taifa.

Kazi kubwa ya leo ya Kamati Kuu na NEC ni kupokea taarifa ya maandalizi ya Mkutano Mkuu utakaoanza kesho na pia kufanya uteuzi wa jina la atakayegombea uenyekiti na mawili ya Makamu Mwenyekiti kwa Tanzania Bara na Tanzania Zanzibar.

Kwa mujibu wa Katibu wa Itikadi na Uenezi ya NEC, Nape Nnauye, majina hayo ndiyo yatakayopelekwa katika Mkutano Mkuu kwa ajili ya kupigiwa kura.

“Kesho (leo) kutakuwa na vikao vya Kamati Kuu asubuhi na kufuatiwa na Halmashauri Kuu ya Taifa. Kazi yao kubwa itakuwa kupokea taarifa ya maandalizi ya Mkutano Mkuu na uteuzi wa wagombea wa uenyekiti na makamu wake,” alisema Nape.

Alisema Mkutano Mkuu utakaofanyika kwa siku tatu kuanzia kesho ukiwa na kaulimbiu ya “Umoja, Amani na Maendeleo, Tuko imara, tunajenga nchi yetu,” utahudhuriwa na wajumbe 2,214 ambao ni wajumbe halali na kutakuwa na waalikwa 700.

“Kwa ujumla, ndani ya ukumbi wa Mkutano Mkuu tunategemea kuwa na watu zaidi ya 3,000, na nje kutakuwa na watu zaidi ya 4,000.

“Hawa wanajumuisha waalikwa wa ndani na nje, watu maarufu na pia nje ya ukumbi kutakuwa na burudani na mamalishe wengi. Pia kutakuwa na luninga kubwa ya kuonesha matukio yote ya ndani ya ukumbi,” alisema.

Katibu huyo wa Itikadi na Uenezi, alisema mkutano huo unatarajiwa kuoneshwa moja kwa moja katika vituo vya televisheni vya Star TV na TBC na kwa watu wa nje ya nchi, wataufuatilia kupitia mitandao ya kijamii ambako CCM itaweka mkutano huo.

Alisema kabla ya kuanza kwa Mkutano Mkuu kesho kwenye Ukumbi wa Kizota, asubuhi Mwenyekiti Rais Jakaya Kikwete ataweka jiwe la msingi la ujenzi wa Ukumbi wa mikutano wa chama hicho utakaojengwa eneo la Makulu katika Manispaa ya Dodoma.

Tayari wajumbe wamekwisha anza kuwasili mjini Dodoma na maandalizi yanaonekana kwa mji huu mkuu wa Tanzania kupambwa na bendera za kijani na Makao Makuu ya CCM katika Barabara ya Nyerere yalikuwa yakisafishwa kwa kupakwa rangi mpya.

Rais Kikwete anayetarajiwa kupewa nafasi nyingine ya kuongoza chama hicho, aliwasili akitokea Dar es Salaam akiwa na mkewe Mama Salma Kikwete.

Akiwa amevalia nguo rasmi za chama hicho tawala, suruali nyeusi, shati la kijani na kofia ya kijani, alilakikiwa na Makamu wake Bara, Pius Msekwa, Nape, Mwenyekiti wa CCM Mkoa, Adam Kimbisa na Mkuu wa Mkoa, Dk Rehema Nchimbi.

Akizungumzia kuhusu taarifa za kuwapo mpango wa kutaka Kikwete asiendelee kushika kofia mbili, urais na uenyekiti wa CCM, Nape alisema taarifa hizo zitakuwa za ovyo kwa demokrasia ndani ya chama.

“Hata sisi tunayasikia hayo, lakini hoja hizo zitakuwa za ovyo kwa demokrasia ya chama chetu. Hazina mashiko na ni hoja zinazosukumwa na watu wenye uroho na uchu wa madaraka,” alisema Nape.

Zimekuwapo taarifa na kudaiwa pia kusambazwa kwa vipeperushi hapa kutoka kwa baadhi ya wanachama wa CCM wakitaka Rais Kikwete asiendelee na wadhifa wa uenyekiti wa chama, wakidai apate muda wa kuisimamia vyema Serikali kutekeleza Ilani ya Uchaguzi ya chama hicho.

Wanadai kwa vuguvugu la sasa la upinzani nchini, mwanachama mwingine apewe jukumu la kuongoza chama hicho na kukabiliana na upinzani; hoja inayopingwa na wanachama wengi. 

Katika nafasi ya Makamu Mwenyekiti, kwa Bara Msekwa atakuwa anaandoka katika wadhifa huo kwa sababu atakuwa mmoja wa watu watakaounda Baraza la Wazee la chama hicho tawala.

Wengine ni marais wastaafu Ali Hassan Mwinyi, Benjamin Mkapa, Salmin Amour Juma na Abeid Amaan Karume. Pia yumo John Malecela.

Nafasi ya Msekwa inatajwa baadhi ya watu wanaoweza kuishika akiwamo kada maarufu Abdulrahaman Kinana aliyeng’atuka hivi karibuni.

Kwa Zanzibar, Rais Dk Ali Mohamed Shein hakuna shaka sasa atakamata umakamu mwenyekiti baada ya kuwa Karume ‘ameung’ang’ania’ tangu alipoondoka madarakani mwaka 2010.

Lakini uhondo mwingine katika Mkutano Mkuu utakuwa katika nafasi za ujumbe wa NEC ambako kwa Bara, vigogo 31 wanawania nafasi 10.

Miongoni mwao wamo mawaziri kadhaa na wajumbe wanaounda Sekretarieti ya sasa  wakiongozwa na Katibu Mkuu Wilson Mukama.

Wengine ni John Chiligati (Naibu Katibu Mkuu), Mwigulu Nchemba (Fedha na Uchumi), January Makamba (Siasa na Uhusiano wa Kimataifa).

Pia wamo Bernard Membe, Shy-Rose Bhanji, William Lukuvi, Dk Mathayo David, William Malecela, Hiza Tambwe, Stephen Wasira, Ruth Msafiri, Martine Shigella, Assumpta Mshama, Dk Fenella Mukangara.

Katika Kundi la Zanzibar, wamo vigogo kama Kidawa Hamid Saleh, Samia Suluhu Hassan, Abdisalam Issa Khatib, Muhammed Seif Khatib, Dk Hussein Ali Mwinyi, Omar Yussuf Mzee, Mouldine Castico, Shamsi Vuai Nahodha, Profesa Makame Mnyaa Mbarawa.

Nape ambaye hakuwania nafasi yoyote katika uchaguzi huo wa ndani ulioanza mapema mwaka huu, ameelezea sababu za kufanya hivyo.

“Niliona ingekuwa vizuri kama wajumbe wote wa Sekretarieti tusingegombea ili kusimamia vyema mchakato kwani isingekuwa vizuri kuwa mchezaji na refa wakati mmoja,” alisema Nape na kuongeza:

“Niliona ingekuwa vyema niwe sehemu ya wasimamizi na kutumia muda mwingi kwa kazi hii kuliko kuwa mgombea.”

Mwanasiasa huyo machachari kijana anatajwa katika duru za siasa kama mmoja wa wanaoweza kumrithi Mukama wakati Sekretarieti mpya itakapoundwa kati ya Jumanne jioni au Jumatano asubuhi. 

HII NDIO SOUND TRACK YA FILAMU MPYA YA SKYFALL YA JAMES BOND...

KUFURU ALIZOFANYA JAMES BOND KWENYE FILAMU MPYA YA "SKYFALL"...

O.J. SIMPSON AJA KIVINGINE KUJARIBU KUTOKA GEREZANI...

O.J. Simpson katika nyakati tofauti mahakamani.

Jaji wa Nevada amekubali kumruhusu O.J. Simpson kuthibitisha kwa mara ya kwanza kuhusiana na ushiriki wake katika ujambazi wa kutumia silaha huko Las Vegas ambao ulimsababisha hukumu ya kifungo cha muda mrefu jela.
Shauri hilo limepangwa kusikilizwa Mei 13, mwakani na linaweza kuibua ushahidi mpya kwamba hukumu yake ikapitiwa upya.
Nyota huyo wa zamani wa mpira wa miguu anatarajiwa kuthibitisha kwamba aliwakilishwa vibaya na mwanasheria wake na kwamba anatakiwa kushitakiwa upya kwa msaada wa jopo lililo bora zaidi.
Mwaka 2008, Simpson alihukumiwa kutumikia kifungo cha kati ya miaka tisa na 33 gerezani, baada ya kutiwa hatiani kwa kosa la kuongoza watu watano katika tukio la ujambazi wa kutumia silaha.
Simpson alikuwa akituhumiwa kuwapora wafanyabiashara wawili wa michezo na dalali wao katika Hoteli ya Las Vegas and Casino.
Simpson alisisitiza kwamba alikuwa akijaribu kurejesha baadhi ya vitu vyake binafsi ambavyo viliibwa baada ya kuachiliwa mwaka 1995 katika tuhuma za mauaji ya aliyekuwa mkewe, Nicole Brown Simpson, na rafiki yake, Ronald Goldman.
Pia alieleza kwamba hakuwa akifahamu mtu aliyepeleka bunduki usiku huo wa tukio.
Pingamizi la Simpson linadai kwamba mwanasheria wake, Yale Galanter, hakutakiwa kuruhusiwa kumwakilisha. Si tu kwamba Galanter alifahamu kuhusu tukio la 2007 kabla halijatokea, alibishana, alishiriki kusaidia Simpson kulipanga.
Mwanasheria huyo, hatahivyo, alikanusha kwamba alikuwa na ufahamu wowote kabla ya tukio na alimweleza jaji kwamba 'hakuwapo eneo hilo' na 'hakuwa na chochote cha kufanya' kukabiliana nalo.
Pingamizi hilo pia linasema kwamba Galanter alificha taarifa, ambazo zingeweza kumfanya Simpson apate hukumu ya muda mfupi zaidi. Kwa uhakika zaidi, Simpson anadai kwamba Galanter hakumweleza makubaliano ya kabla ya hukumu kwamba ingeweza kumfunga kwa miaka miwili hadi mitano.
Simpson alisema kama angelijua kuhusu makubaliano hayo, basi angekuwa ameshaafikiana nalo kutumikia.
Tangu kesi hiyo, Galanter amekumbana na mashambulio kutoka pande zote. Kwa kuongezea kwenye madai yaliyozushwa dhidi yake na Simpson, Galanter pia anashitakiwa na mwanasheria mwenzake wa zamani, Gabriel Grasso kwa kuvunja mkataba.
Katika kulipa kisasi, Galanter amefungua mashitaka ya upotoshaji dhidi ya Grasso, mwanasheria wake na wanasheria wa zamani wa Simpson katika kesi ya pingamizi.
Simpson amemuweka kando kabisa Grasso kwenye pingamizi lake.

ZIRO PLUS...

MWIMBAJI USHER RAYMOND AFANYA 'USWAHILI' KITUO CHA KUPIGIA KURA MAREKANI...

KUSHOTO: Mwimbaji Usher Raymond akipiga kura Uchaguzi wa Marekani. KULIA: Usher akiwa mbele kabisa ya foleni ya kupiga kura mjini Atlanta.

Wapigakura mjini Atlanta walipandwa na jazba baada ya Usher Raymond kuvushwa mbele katika foleni na kuwapita watu wengi waliokuwa wametangulia kwenye misululu mirefu siku ya uchaguzi wa Marekani.
Mwanamuziki huyo maarufu anadaiwa kupewa upendeleo maalumu na maofisa wanaosimamia upigaji kura, ambapo aliruhusiwa kuipita foleni ndefu, na wapigakura wenzake hawakufurahishwa na hatua hiyo, kwa mujibu wa vyanzo vya habari.
Hatahivyo, maofisa wa uchaguzi walisisitiza kuwa Usher aliruhusiwa kusimama mbele ya mstari kuepusha ghasia kutoka kwa umati uliokuwepo mahali hapo.
Walisema katika taarifa kwamba meneja wa kituo hicho cha kupigia kura 'alielekezwa kuhakikisha kwamba uwepo wa (Usher) usiwe chanzo cha uvunjifu wa amani kwa kuchukua hatua muhimu za kumvusha mbele ya foleni wakati wa zoezi hilo haraka iwezekanavyo.
"Hakukuwa na sababu nyingine yoyote kwa uamuzi wa kumpa upendeleo, ila ni kuepusha vurugu wakati wa zoezi la upigaji kura."
Waliongeza kwamba mwimbaji huyo wa timu ya Climax alikaa mbele kuwataarifu kwamba angeweza kufika hapo kwa ajili ya kupiga kura.
Usher alituma katika mtandano wa Twitter picha yake alipokuwa kwenye kituo cha kupigia kura, akiweka wazi kwamba alikuwa akimuunga mkono Obama.
Aliandika: "Nimepiga kura kwa ajili ya KUSONGA MBELE."
Wakati huohuo, Usher hivi karibuni alitawala vichwa vya habari kwa kutumia Dola za Marekani 12,000 kwa ajili ya kununua mbwa mwingine.
Alikuwa mzabuni wa juu kabisa kwenye mnada wa mbwa huyo katika maonesho ya Pencils of Promise Gala mjini New York mwezi uliopita, ambapo mbwa huyo alinadiwa kwa ajili ya kuchangia fedha za hisani, ambapo zitatumika kujenga shule huko Laos, Nicaragua, Guatemala na Ghana.
Licha ya Usher kufanikiwa kununua mbwa huyo, lakini hapo kabla alikuwa katika wakati mgumu kutoka kwa mzabuni mwenzake nyota wa 'Gossip Girl', Jessica Szohr ambapo alifikia ofa ya Dola za Marekani 11,000 kufuatia ofa ya mwanzo ya Usher mwenye miaka 34 ya Dola za Marekani 10,000.
Utashi wa Usher kununua mbwa huyo uliendelea zaidi na kuongeza dau hadi kufikia Dola hizo 12,000 kabla ya kutupa mikono yake juu katika kusherehekea baada ya kutaarifiwa kwamba mbwa huyo sasa ni mali yake.

ZIRO PLUS...

CHEKA TARATIBU...

Jamaa mmoja Mchagga baada ya kufanyiwa oparesheni ya macho akawa anajaribu kukwepa kulipa kwa kujibu, "Bado sioni". Daktari akamwita nesi na kumuuliza huyu ni nani? Mchagga akajibu, "Bado sioni". Daktari akatoa bunda la noti za Shilingi elfu kumi na kumnyooshea kisha akasema, "Nimeshika nini?" Mchagga akaruka na kusema, "Yesuu, hizo ni pesa! Dokta unataka kunipa kweli?" Duh...

JICHO LA TATU...

HATIMAYE SHILINGI MILIONI 50 ZA EBSS ZAPATA MWENYEWE...

Hivi ndivyo hali ilivyokuwa usiku wa kuamkia leo ndani ya ukumbi wa Diamond Jubilee pale kijana Walter Chilambo alivyotangazwa mshindi wa EBSS 2012 na kunyakua kitita cha Shilingi milioni 50 taslim!

Mshiriki wa Epiq Bongo Star Search (EBSS) 2012, Walter Chilambo kutoka Dar es Salaam akiwa ameshika mkoba wenye fedha taslim Shilingi milioni 50 alizozawadiwa kwa kuibuka mshindi wa shindano hilo na kuwabwaga wenzake wanne (Nshoma, Nsami, Wababa, Salma) katika kinyang'anyiro kilichofanyika kwenye Ukumbi wa Diamond Jubilee, Dar es Salaam, usiku wa kuamkia leo. Dalili za Walter kuzoa mamilioni hayo zilianza kuonekana mapema kwa jinsi alivyokuwa makini kwenye kuchagua na kuimba nyimbo mbalimbali. Baada ya kubaki washiriki wawili, ilijulikana bayana mshindi hasa kwa kuzingatia kuvurunda kwa mpinzani wake mshiriki kutoka Zanzibar, Salma Yusuph ambaye alichagua wimbo ambao kwa hakika ulikuwa umepooza mno kiasi cha kuruhusu mkoba huo akabidhiwe Walter, ambaye katika mashindano ya mwaka huu ameibuka kuwa kipenzi cha akina dada kutokana na sauti yake nyororo. Kila la Kheri Walter katika safari yako ya kimuziki.

CHEKA TARATIBU...

Kuna makabila kwa mbwembwe hayawezekani! Jamaa mmoja Mhaya ambaye ni mhudumu wa mochwari kapewa nafasi ya kujitambulisha katika moja ya vikao vya harusi ya rafiki yake. "Naitwa Muganyizi. Nafanya kazi Hospitali ya Taifa Muhimbili. Kitaaluma mimi ni Mtaalamu ninayehudumia wagonjwa ambao madaktari bingwa wameshindwa kuokoa maisha yao!" Kasheshe...