MASHAHIDI WA KESI ZA PEMBEJEO WAFICHWA ZAMBIA...

Taasisi ya Kupambana na Kuzuia Rukwa (Takukuru) mkoani Rukwa imekiri kuwa  baadhi ya mashahidi muhimu  katika kesi ya wizi wa mbolea katika mfumo wa vocha zenye thamani ya zaidi ya Sh milioni 200 wamekimbilia  nchi jirani ya Zambia,  baada ya kuhongwa na baadhi ya  watuhumiwa  ili wasitoe ushahidi mahakamani  dhidi yao.

Hayo yalibainishwa jana na Kamanda wa Takukuru Mkoa wa Rukwa, Gasto Mkono alipokuwa akizungumza na waandishi wa  habari mjini  hapa  ambao walitaka kujua  kwanini  kesi  hizo zimechukua muda mrefu  huku Takukuru ikishutumiwa  na  jamii  kuwa  imehusika kuvuruga  ushahidi wa kesi  hizo .

Alisema kuwa kushindwa kupatikana kwa mashahidi hao muhimu katika kesi hizo  kumekuwa kikwazo kikubwa katika mwenendo  mzima wa mashauri  hayo mahakamani.

Akifafanua alidai kuwa zaidi ya majalada 40 yamepelekwa katika Ofisi ya Mkurugenzi wa Mashitaka (DDP) ambapo  majalada 18 yamerudi na yapo  mahakamani, lakini  tatizo kubwa  mashahidi hawapo tena tayari  kutoa  ushahidi wao  mahakamani  kwa kuwa baadhi ya washitakiwa  wengi wao  wakiwa ni mawakala ‘wamewahonga’  mashahidi  hao ambao baadhi yao  wamekimbilia nchi jirani ya Zambia  ili  wasiweze kutoa ushahidi.

“Tunafanya kazi katika mazingira  magumu, mahakamani kuna majalada 18 ya kesi  ya watuhumiwa  wa  mbolea kwa  mfumo  wa  vocha, baadhi yao  sasa wanamiliki magari ya kifahari  na hata nyumba  lakini tatizo  wanaotakiwa kutoa  ushahidi  hawako tayari kufanya  hivi  tena.

“Wapo  mashahidi  muhimu  wanaotakiwa kutoa  ushahidi wao  mahakamani, lakini  kila  tukiwafuata  wanakimbilia Zambia na kujificha hadi hapo  watakaposikia kuwa  tumerejea tulikotoka…

“Hii inatoka na baadhi ya watuhumiwa kuwahonga mashahidi  hao  muhimu. Sasa hata kama  tulikusanya  ushahidi wa kutosha  sasa tumekwama  kwa kuwa  mashahidi hawako tayari tena  kutoa  ushahidi mahakamani,“ alisema .

Aliongeza kuwa  baadhi ya maofisa watendaji wa vijiji wakati Takukuru  ilipokuwa ikikusanya  ushahidi walikiri  hawakufikishiwa mbolea za ruzuku kwa mfumo wa vocha, lakini baadaye walipotakiwa kutoa ushahidi mahakamani “waliwavua’ tuhuma hizo  washtakiwa  kwa  kukiri  walipokea  mbolea  hizo  kutoka  kwa  washitakiwa.

“Hii maana yake ni  kwamba  mawakala  ambao  baadhi yao  ni  watuhumiwa  wanadaiwa  kuwahonga  maofisa hao  watendaji wa vijiji  ili wasitoe ushahidi dhidi yao  hivyo  kutokuwepo  ushahidi wa kuwatia hatiani,“ alisema .

Kuhusu Takukuru na shutuma za kuvuruga ushahidi, Kamanda Mkono alikana shutuma hizo  kwa kuwa ni  mashahidi  wenyewe  ambao  sasa hawako tayari tena kutoa  ushahidi mahakamani  lakini pia  ililazimu Takukuru kufanya uchunguzi  wa kina  na kukusanya  vielelezo  vingi  kisha kuyatuma majalada  zaidi ya 40 kwa DPP ambapo tayari 18 yamesharejeshwa.

Alisema  kuwa  majalada  40 yalifikikwa kwa DPP kufuatia  tuhuma za ‘uchakachuaji‘ wa mbolea  ya ruzuku  katika mfumo wa vocha  zilizobainika kufujwa na baadhi ya mawakala  wakishirikiana  na  watendaji  wa vijiji  ambapo  ilimlazimu  Mkuu wa Mkoa wa Rukwa wa wakati huo, Daniel ole Njoolay kuunda kamati  ya kuchunguza  tuhuma  hizo  uliofanyika  katika msimu wa kilimo wa 2008/09 .

Kamati  hiyo  katika  uchunguzi  wake ilibainisha kuwa zaidi ya  mbolea za ruzuku katika  mfumo  wa vocha zenye thamani ya Sh  bilioni 5 zilikuwa  zimefujwa .

Hata hivyo, Kamanda Mkono  alidai kuwa Kamati  hiyo  iliyoundwa  Njoolay  ilikuwa  ya kisiasa  kwa maana  kwamba haikuwa na  mamlaka  kisheria kuwafikisha watuhumiwa mahakamani, ndiyo maana Takukuru ililazimika  kufanya tena  uchunguzi wa kina na kukusanya  vielelezo na  ushahidi  wa kutosha dhidi ya watuhumiwa.

Pia alikiri kuwa Takukuru  imeshindwa katika  kesi nyingi  walizozifikisha mahakamani  si  kwa kuwa  hawakuwa na ushahidi,  bali  changamoto kubwa  ni upande wa  jamii  yenye kusita kutoa ushahidi   mahakamani.