MCHAKATO KUMPATA RAIS MWANAMKE MWAKA 2015 WAANZA...

Anna Abdallah.

Harakati za kupata rais mwanamke zimeanza baada ya ulingo wa wanawake kutangaza kufanya ushawishi kwenye vyama vyote vya siasa wanawake wenye uwezo wapewe nafasi kugombea.

Mwenyekiti wa ulingo wa wanawake, Anna Abdalah amesema ile dhana ya kwamba chama fulani kina mtu wake, haina nafasi. 

Chini ya ulingo huo, Abadalah amesema wameanza kuzungumza chini chini na wanawake ndani ya vyama kushawishi wajitokeze kugombea urais siyo tu udiwani na ubunge.

Abdalah alisema hayo kwenye mahojiano jana na TBC 1 kwenye kipindi cha jambo juu ya ulingo wa wanawake na katiba.

Alipohojiwa kama harakati hizo ameanza kuzifanya katika CCM ambacho ni chama chake, alisema ameanza muda mrefu.

Ulingo huo unaohusisha wanawake wote nchini bila kujali itikadi zao, unaendelea kudai wanawake kuwa  sehemu ya uongozi wa juu katika vyama vya siasa.

Kwa mujibu wa Anna Abdallah, TLP pekee ndicho chama chenye nafasi ya juu ya uongozi inayoshikiliwa na mwanamke.

Vyama vingine vyote vinashutumiwa nafasi za mwenyekiti, makamu na ukatibu mkuu kushikiliwa na wanaume. 

Kutokana na hali hyo, mwanasiasa huyo mkongwe, Abdallah amesema kwa kuwa wanawake walio wengi ndio wapiga kura waaminifu, harakati zilizoanza zitashawishi kuhakikisha wanawake wanachaguliwa katika nafasi za juu kwenye vyama.

Hata hivyo alipongeza serikali kwa kujitahidi kuzingatia usawa wa kijinsia kwenye uteuzi nafasi mbalimbali.