WAPANGA KUJIVUA UANACHAMA CWT, KUANZISHA CHAMA KINGINE...

Makao Makuu ya Chama cha Walimu Tanzania.

Walimu wa shule za msingi wilayani Ukerewe, wanajiandaa kuanzisha chama kingine, ili wajitoe uanachama wao katika Chama cha Walimu Tanzania (CWT).

Kiongozi wa walimu hao, Mwalimu Michael Muhabi, alisema hayo jana alipokuwa akilalamikia hatua ya Polisi kuzuia mandamano yao yaliyotarajiwa kufanyika leo.
Kabla ya hapo, walimu hao ambao wako katika hatua za mwisho za kuanzisha chama kipya, waliandika barua Polisi kuomba kibali cha kuitisha maandamano, ili kufikisha kilio chao serikalini.
Barua hiyo iliyosainiwa na  Muhabi, ilitaja sababu  saba  za  kuitisha  maandamano hayo, ikiwamo ya kupinga walimu wasio wanachama   wa CWT kukatwa asilimia mbili ya  mshahara  kila mwezi kwa ajili ya kugharimia uendeshaji wa CWT.
Pamoja na kutaka fedha hizo zirejeshwe kwa walimu  husika,   pia wanapinga migomo ya walimu waliyosema haina tija na imeonekana kunufaisha viongozi wa juu wa chama hicho.
Walimu hao  walilenga  pia kushikiza Serikali  itoe tamko juu ya ukusanyaji fedha za hisa za Benki ya Walimu,  ambazo wanadai   hadi sasa hatma ya kuanzishwa kwake haijulikani hali inayowatia hofu walimu.
Mkuu wa  Polisi  wa Wilaya (OCD), Shitambi  Shilogile, alisema jana wamezuia maandamano hayo kwa kuwa walimu hao   wanaweza  kutumia njia nyingine kupata haki zao.
Shilogile alisema madai yao yanaweza kumalizwa kwa njia  nyingine ikiwamo kukutana katika meza ya mazungumzo na ikishindikana waende Mahakama ya Kazi  kwa utatuzi wa kisheria.
Katika taarifa ya Jeshi hilo  ambayo nakala yake alipewa  Kamanda wa Polisi wa Mkoa wa Mwanza, Mkuu wa Wilaya na OCD, Kamanda Shilogile alionya yeyote atakayekaidi amri ya Polisi, atachukuliwa hatua kali za kisheria.
Akizungumzia amri hiyo, Muhabi ambaye ni Mratibu wa maandamano hayo,  alitaka Polisi ifanye kazi kwa kuzingatia  taratibu na sheria.
Alisema zuio la Polisi ni kinyume cha Katiba inayotoa haki ya kuandamana. Alisema hatua hiyo ni sawa na kuahirisha tatizo. 
Mkuu wa Wilaya ya Ukerewe, Mery Tesha  aliyetakiwa kupokea maandamano  hayo, alitaka walimu  kuepuka vurugu hasa maandamano, kwa kuwa zipo njia nyingine za kudai  haki zao ikiwamo kufanya mazungumzo.
Rais wa CWT, Gratian Mkoba, akizungumza na mwandishi wa habari hii kwa simu, alisema kwa sasa hawezi kuzungumzia suala hilo hadi atakapopata  madai ya walimu hao.
Mwenyekiti wa CWT wa  Wilaya ya Ukerewe,  Pastory Kabalinde  alisema  sheria za nchi ziko wazi  kwa  wafanyakazi wanaotaka  kuanzisha  chama  na kama  wapo walimu  wenye nia hiyo hawazuiwi.