ZIRO PLUS...

MKANDARASI AFA KWA SHOTI YA UMEME AKIWA KAZINI...

Jengo lilipotokea tukio hilo Barabara ya Calverley.

Mkandarasi amefariki baada ya kupigwa shoti na umeme kwenye jengo la Marks & Spencer jana.
Phillip Dodd alikumbwa na janga hilo kwenye eneo la maduka la Royal Victoria Place huko Turnbridge Wells, mjini Kent.
Familia ya mgane huyo mwenye miaka 62 anayetokea Horley, Surrey, imeshataarifiwa kuhusu kifo hicho, polisi imesema.
Msemaji wa M&S alithibitisha kwamba janga hilo kweli limetokea.
Alisema: "Kulikuwa na tukio la ajali kwenye jengo hilo leo (jana) na tunapenda kuwapa pole familia ya marehemu.
"Kwa sasa tunafanyaa kila tuwezalo kusaidia huduma za dharura katika uchunguzi wao na kwamba hatuwezi kuzungumzia chochote zaidi katika hatua hii."
Polisi wa Kent walisema kifo hicho kinachukuliwa kama ajali kazini wakati maofisa wakifanyia kazi kujua mazingira yote ya kilichotokea.
Msemaji alisema: "Tuliitwa kabla ya Saa 9:30 mchana kwenye jengo hilo lililoko katika Barabara ya Calverley.
"Inaaminika mtu huyo alipigwa shoti ya umeme. Alithibitishwa kufariki eneo la tukio.
"Gari la wagonjwa lilifika na Wakuu wa Afya na Usalama wanachunguza tukio hilo.
"Kwa sasa inachukuliwa kama ajali nyingine tu hadi hapo uchunguzi kamili utakapokamilika."
Jengo hilo halikufungwa kutokana na ukweli kwamba eneo tukio lilipotokea si upande wa duka ambao una mkusanyiko wa watu, alisema msemaji huyo.

ZIRO PLUS...

CHEKA TARATIBU...

Osama bin Laden kafariki na kwenda moja kwa moja kwenye lango kuu la mbinguni na kubisha hodi. Mtume Petro akajibu kwa sauti, "Nani?" Osama akajibu, "Ni mimi Osama." Mtume Petro akauliza, "Ni mambo gani mabaya unadhani umefanya duniani?" Osama akafikiri kidogo kisha akajibu, "Nilivuta bangi, lakini hutakiwi kunihukumu sababu sikufikisha moshi kwenye mapafu. Na niliua watu, lakini si kwa mikono yangu." Baada ya muda mfupi Mtume Petro akajibu, "Sawa, tumekubaliana hivi. Tutakupeleka mahali fulani pana joto sana, lakini hatusemi 'motoni.' Utakaa hapo kwa muda usiojulikana, lakini hatusemi 'milele.' Na 'usipoteze matumaini yote' uingiapo, wala usijizuie kupumua ukingojea kupoe." Kasheshe...

JICHO LA TATU...

MWANAFUNZI ABAKWA NA KUNYONGWA HADI KIFO MKOANI MARA...

Kamanda Absalom Mwakyoma.

Watu wawili wamekufa katika matukio mawili tofauti, mkoani Mara, akiwemo mwanafunzi mmoja wa shule ya msingi aliyebakwa na kisha kunyongwa.
Inasadikiwa wauaji wake walimnyonga kwa kutumia gauni alilolivaa na kisha kumtupa.
Hayo yalisemwa na Kamanda wa polisi mkoa wa Mara, Kamishina Msaidizi Mwandamizi wa polisi, Absalom Mwakyoma, akizungumza na waandishi wa habari mjini Musoma.
Kamanda Mwakyoma alisema mwanafunzi aliyebakwa na kuuawa alikuwa anasoma darasa la sita katika shule ya msingi Makoko, iliyoko katika manispaa ya Musoma na maiti yake ilitupwa eneo la Darajani manispaa ya Musoma.
Alisema kuwa uchunguzi wa awali uliofanywa na polisi na daktari inaonesha kuwa mwanafunzi huyo alibakwa kwanza kisha akanyongwa kwa gauni lake alilokuwa amevaa.
Kwa mujibu wa wazazi wa mwanafunzi huyo, alitoweka nyumbani na siku mbili baadae mwili wake uliokotwa katika nyumba ambayo haitumiki. Kamanda Mwakyoma alisema hakuna watu anayeshikiliwa kuhusiana na tukio hilo.
Kamanda Mwakyoma amewataka wananchi kutoa ushirikiano kwa jeshi hilo, ili watu waliofanya unyama huo waweze kuchukuliwa hatua za kisheria.
Katika tukio lingine mtu aliyejulikana kwa jina la  Kizwere Ndege (47), amekufa papo hapo baada ya kugongwa na basi la Kampuni ya Bunda Express lenye namba za usajili T.810 eneo la Iramba, wilayani Butiama.
Kamanda Mwakyoma alisema marehemu aliyekuwa akitembea kwa miguu aligongwa na basi hilo lililokuwa likiendeshwa na Mkazi wa Mwanza Ramadhan Karimu na kwamba chanzo cha ajali hiyo ni mwendo kasi.

JICHO LA TATU...

WABUNGE WATAKA MAFISADI WOTE WANYONGWE...

Wabunge wa Bunge la Jamhuri ya Muungano wa Tanzania, wameelezea kukerwa kwao na vitendo vya ufisadi miongoni mwa viongozi na watumishi wa umma na kutaka Katiba ijayo itamke kuwa, adhabu yao iwe ni kunyongwa.
Aidha, wamechachamalia uchaguzi mdogo, wakitaka usiwepo kwa kuwa una gharama kubwa na hivyo kuibebesha Serikali mzigo, huku wengine wakiendelea kulia na kitendo cha Mawaziri kuwa wabunge, wakitaka mawaziri wasitokane na wabunge, lengo likiwa kuongeza uwajibikaji.
Waliyasema hayo jana mjini hapa mbele ya Tume ya Mabadiliko ya Katiba iliyoongozwa na Mwenyekiti wake, Waziri Mkuu wa zamani Jaji Joseph Warioba.
Mbali ya masuala hayo, wabunge hao pia walieleza kutofurahishwa na mfumo wa sasa wa kuwapo kwa wabunge wa Viti Maalumu, baadhi wakitaka vifutwe na wengine wakishauri wapewe nafasi ya kuanzia majimboni, lakini kwa kushindanishwa na wanawake wa vyama vingine.
Suala la umri wa Rais nalo lilichukua nafasi, wengine wakitaka umri wa kugombea uanzie miaka 35, badala ya 40 ya sasa.
Akichangia suala la ufisadi, Mbunge wa Kasulu Mjini, Moses Machali (NCCR-Mageuzi) alisema viongozi mafisadi wanastahili kunyongwa kwa kuwa nao ni wauaji na hawajui haki za binadamu, hivyo hawana sababu za kulindwa na Katiba kwa kizingizio cha haki za binadamu.
“Nashauri viongozi wa aina hii ni wauaji, wahujumu uchumi na watu wasiofaa katika jamii, hawa wanyongwe. Tusishabikie haki za binadamu wakati wenyewe hawajui haki, jiulize mtu anayepewa fedha za kununua dawa au maji ili zisaidie wengi katika jamii, anapokula fedha hizo si anataka kuua na kutesa raia wema? Kama anafanya hivi kwa nini naye asinyongwe?” alihoji.
Aidha, mchangiaji mwingine, Nyambari Nangwine ambaye ni Mbunge wa Tarime kwa tiketi ya CCM, alitaka mafisadi na watoa rushwa wanyongwe kwa kuwa ni hatari kwa umoja na mshikamano wa wananchi, kwa kuwa wanatengeneza makundi katika jamii.
Aidha, baadhi ya wabunge wamechachamalia uchaguzi mdogo, wakisema hauna maana kwa kuwa unaibebesha Serikali gharama kubwa.
Miongoni mwa waliotoa maoni hayo ni mwanasiasa mkongwe, Kapteni John Chiligati, Mbunge wa Manyoni Mashariki wa tiketi ya CCM aliyesema haamini kama uchaguzi mdogo una umuhimu wowote kulinganisha na gharama kubwa za kufanya aina hiyo ya uchaguzi.
Wengine waliosema hayo  ni Murtaza Mangungu wa Jimbo la Kilwa Kaskazini, Mwigulu Nchemba wa Iramba Mashariki ambaye pia ni Katibu wa Uchumi na Fedha wa CCM-Taifa.
“Katika Katiba mpya, nashauri kuwe na Serikali mbili kama ilivyo sasa, kuwe na wagombea wawili mmoja wa kike na mwingine wa kiume, ikitokea mmoja amefariki dunia au tatizo jingine lolote, basi mwingine aendelee kuwawakilisha wananchi na pasifanyike uchaguzi mdogo, kwani ni
gharama,” alisema.
Aidha, alisema mfumo huo utasaidia kutengeneza uwiano mzuri wa idadi ya wanawake na wanaume bungeni, huku akishauri Katiba pia itoe nafasi ya mwanamke kushika moja ya nyadhifa tatu za juu Serikali. Nafasi hizo ni Rais, Makamu wa Rais na Waziri Mkuu.
Mbali ya kukataa uchaguzi mdogo, kwa asilimia kubwa wabunge walikataa Viti Maalumu, wakiwemo mfumo wa sasa hauwapi heshima, hivyo kutaka wapewe majimbo ili wapigiwe kura na wananchi, ikiwa ni nafasi maalumu itakayoshindanisha wanawake, achilia mbali ile itakayowaniwa na wabunge wanaume majimboni.
Kuhusiana na umri wa kugombea Rais, idadi kubwa walipendekeza uanzie miaka 35, kwa kuwa katika umri huo wengi wanakuwa wameshaiva kiutendaji na pia wanakuwa na nguvu za kuwatumikia wananchi.
Mbunge wa Nkasi Kaskazini, Ally Kessy (CCM) alisema umri wa miaka 35 ni sahihi na usizidi miaka 55, akisema taifa linahitaji wagombea wenye nguvu, na si wenye umri mkubwa ambao kila kukicha hupelekwa nje kwa matibabu au uchunguzi wa afya.
Alitaka pia Katiba iwabane waliostaafu utumishi wa umma, akisema wasiruhusiwe kugombea ubunge au udiwani akisema wengi wamegeuza sehemu ya ajira, ilhali walishalipwa mafao yao, lakini wanakimbilia bungeni ambako huishia kusinzia.
Aidha, alipendekeza ukomo wa ubunge au udiwani uwe wa mihula miwili ya miaka mitano mitano.
Mbunge wa Kigoma Kaskazini, Kabwe Zitto (Chadema), Mbunge wa Nzega, Dk. Hamisi Kigwangallah (CCM), Mbunge wa Viti Maalumu, Leticia Nyerere (CCM), Agripina Buyogera wa Kasulu Vijijini (NCCR- Mageuzi), Dk. Pudenciana Kikwembe wa Viti Maalumu-CCM, nao walipendekeza umri wa kuwania urais uwe miaka 35.
Licha ya wengi kutaka wabunge wasiwe Wakuu wa Wilaya na Wakuu wa Mikoa, walisema pia kwamba sasa ni wakati mwafaka wa kuachana na mawaziri ambao ni wabunge, na badala yake wateuliwe kutoka nje ya mfumo huo, kama ambavyo wametaka majaji nao wasiteuliwe na Rais, bali wapiti mchujo maalumu utakaowashirikisha wananchi na baadhi wapitishwe na Bunge.
Mmoja wa wachangiaji hao, Deogratius Ntukamazina, Mbunge wa Ngara kwa tiketi ya CCM alisema kama wabunge watakaopata uwaziri, Katiba iwatake ama kujiuzulu au kukataa.
“Hii itasaidia uwajibikaji kwa mawaziri. Huyu wakati mwingine tunaoneakana haya hata kama tunaona mambo hayaendi vizuri,” alisema na kutaka Majaji nao washindanishwe kuwania nafasi hizo, badala ya kuteuliwa na Rais, huku akishauri kuwe na mabunge mawili, likiwamo la Seneti litakalowashirisha viongozi wastaafu, lengo likiwa kuchota busara na uzoefu wao wa uongozi.
Kuhusiana na suala la elimu, alishauri wabunge wawe na elimu ya kuanzia shahada ya kwanza na madiwani wasiwe na elimu ya chini ya kidato cha nne.
Suala la Zanzibar kutaka mafuta yaondolewe katika suala la Muungano, nalo liliibuka, na baadhi ya wanasiasa wakongwe, Steven Wassira na Chiligati wakitaka Katiba ibariki kuwa yatakapopatikana, yawe mali ya Zanzibar ili kupunguza malalamiko juu ya masuala ya muungano.
Aidha, wabunge kadhaa waliridhia muundo wa sasa wa Muungano uendelee, wengine wakitaka Serikali tatu, kama ilivyo kwa Esther Bulaya, Mbunge wa Viti Maalumu kwa tiketi ya CCM na Mbunge wa Gando, Khalifa Suleiman Khalifa (CUF) ambako kwa kiasi fulani walionekana kutofautiana na misimamo ya vyama vyao, mathalani CCM ni muumini wa Serikali mbili, muundo uliopo sasa wa Muungano.

KABURI LA BINTI MFALME LA TANGU MWAKA 1930 LAVUMBULIWA MISRI...

Kaburi wa Binti Mfalme la tangu mwaka 2500 BC (Kabla ya Kristo) limevumbuliwa karibu na Cairo, Serikali ya Misri imebainisha jana.
Uvumbuzi huo umefanyika katika mji wa Abu Sir kusini mwa Cairo na timu ya wanaakiolojia kutoka Czechoslovakia.
"Tumevumbua chumba cha kusubiria kuelekea kwenye kaburi la Binti Mfalme Shert Nebti ambalo linajumuisha mihimili ya mawe ya chokaa," alisema Mohamed Ibrahim, Waziri wa mambo ya kale wa Misri.
Mihimili hiyo 'ina maandiko ya hieroglifu yakitambulisha jina la Binti Mfalme na anwani zake, ikijumuisha 'binti wa Mfalme Men Salbo na mpenzi wake alitukuzwa mbele ya Mungu kuwa mwenye nguvu zaidi," aliongeza.
Ibrahim alisema kwamba Taasisi ya Czech inayotafiti Mambo ya Kale ya Misri, inayofadhiliwa na Chuo Kikuu cha Charles cha Prague na kuongozwa na Miroslav Bartas, ndiyo iliyofanikisha uvumbuzi huo.
"Kuvumbuliwa kwa kaburi hili kumeweka alama ya mwanzo wa zama mpya katika historia ya makaburi katika Abu Sir na Saqqara," alisema Ibrahim.
Timu hiyo ya Czech pia imechimbua mlango wa nyuma huko kusini mashariki mwa chumba cha kusubiria, ambacho kinaelekea kwenye makaburi mengine manne, mawili kati ya hayo tayari yameshavumbuliwa wakati tofauti.
Makaburi mawili ni ya maofisa wa ngazi za juu wakiwamo 'mtetea sheria mkongwe' na 'mkaguzi wa wahudumu wa jumba la mfalme,' kwa mujibu wa maandiko. Yamewekwa tarehe kuanzia utawala wa tano wa kifirauni.
Uvumbuzi huo umefanyika wakati wa msimu wa uchimbuaji, ambao umeanza Oktoba, alisema Usama al-Shini, Mkurugenzi wa Baraza Kuu la Mambo ya Kale huko Giza.
Kibaraza hicho kinajumuisha majeneza manne ya mawe ya chokaa ambayo yana sanamu ya mtu, mwanaume akiwa na mtoto wake wa kiume, na wanaume wawili wakiwa na mwanamke.

CHEKA TARATIBU...

Katika mwanzo wa miaka ya 1930, mkulima mmoja na mkewe walikwenda kwenye maonesho. Mkulima alivutiwa mno na maonesho ya ndege na kumuuliza rubani inagharimu kiasi gani kkwa safari moja. Rubani akajibu, "Shilingi Laki Moja kwa dakika tatu." Mkulima akajibu kwa mshangao, "Duh, gharama kubwa sana!" Rubani akafikiria kwa sekunde chache kisha akasema, "Endapo wewe na mkeo nitawazungusha hewani kwa dakika tatu bila kupiga kelele sitawatoza chochote. Lakini mkipiga kelele itabidi mlipe Shilingi Laki Moja." Mkulima na mkewe wakakubali na safari ikaanza. Baada ya ndege kutua, Rubani akamweleza Mkulima, "Napenda kukupongeza kwa kutopiga kelele. Wewe ni mwanaume jasiri." Mkulima akajibu, "Inawezekana," Lakini napenda kukwambia ilibaki kidogo tu nipige kelele wakati mke wangu alipoanguka angani kutoka kwenye ndege!" Duh…

WAZIRI AZIFUTIA LESENI KAMPUNI ZA UAGIZAJI MAFUTA, BODI YA MAFUTA

Waziri Profesa Sospeter Muhongo.

Kufuatia kuzorota kwa upatikanaji wa bidhaa ya petroli nchini, Waziri wa Nishati na Madini, Profesa Sospeter Muhongo ametangaza kufuta leseni kwa kampuni zilizopewa kibali cha kuagiza mafuta, baada ya kubaini haziagizi bidhaa hiyo hivyo kuisababishia Serikali hasara kubwa.

Waziri pia amevunja bodi ya Kampuni iliyokuwa ikiratibu Uagizaji wa Mafuta (PIC) baada ya kubaini kuwa wajumbe wote walikuwa ni wafanyabiashara wasiokomaa kibiashara. 

Alitangaza uamuzi huo jana mbele ya waandishi wa habari katika kikao ambacho pia wafanyabiashara wa mafuta walialikwa ili kupewa uamuzi huo wa Serikali.

Uamuzi huo unatokana na maeneo mengi nchini kukosa huduma za mafuta, hali iliyosababisha usumbufu mkubwa hasa mikoani na baadhi ya maeneo katika Jiji la Dar es Salaam na hivyo kufanya wananchi wengi kuilaumu Serikali kutokana na uhaba wa bidhaa hiyo muhimu katika uchumi wa nchi.

“Kwanza kabla ya sijatoa tamko rasmi, naomba nitangulie kuwaomba radhi Watanzania kwa usumbufu waliopata wa ukosefu wa mafuta, kitendo kilichosababisha hata vyakula kupanda bei madukani pamoja na nauli,” alisema Profesa Muhongo.

Aliongeza kusema kuwa radhi hiyo anaiomba baada ya kubaini kwamba kuna uzembe umefanyika kwa makusudi huku kukiwa na mafuta ya kutosha.

Aliongeza kuwa sababu nyingine iliyosabisha kuwapo na tatizo hili ni mvutano wa kizembe uliokuwapo kati ya Mamlaka Udhibiti wa Huduma za Nishati na Maji (EWURA) na Bodi ya PIC pamoja na wafanyabiashara.

“Kutokana na mvutano huo baadhi ya wafanyabiashara waliamua kupeleka mafuta nje ya nchi na wengine kutunza kwenye maghala yao bila sababu ya msingi huku wakisingizia bei elekezi iliyotolewa na Ewura haiwapi faida,” alisema waziri huyo.

Kutokana na hali hiyo, ndipo Profesa Muhongo alisema muda umefika mwisho wa kuoneana aibu kwa wale wanaoshindwa kutimiza majukumu yao kulingana na leseni zao zinavyowaelekeza.

Alisema kuna baadhi ya kampuni zilipewa leseni ya kuagiza mafuta, lakini biashara zao zilikuwa za mfukoni na kuisababishia Serikali hasara na usumbufu, kampuni hizo ndani ya miezi sita hazikuleta mafuta nchini. 

Kwa hali hiyo, Waziri Muhongo alisema, “hivyo naiagiza Ewura kuzifutia leseni kampuni hizo haraka na wampelekee taarifa siku ya Jumatatu mchana na hatua zaidi zichukuliwe.

Kuhusu Bodi ya PIC inayoongozwa na Mbunge wa Kwimba, Shaniff Mansour, Profesa Mulongo alisema ameifumua na kwamba ataisuka upya na amefanya hivyo baada ya kubaini bodi yote ilikuwa ya wafanyabiashara na kazi kubwa iliyokuwa ikifanyika ni kulinda biashara yao.

“Sasa Bodi mpya itayoundwa itakuwa ya kisasa na itakuwa na mjumbe mmoja mmoja kutoka idara husika na mwenyekiti atatoka wizarani,” alisema Profesa Muhongo.

Wajumbe wengine watatoka Mamlaka ya Mapato Tanzania (TRA), Mamlaka ya Usimamizi wa Bandari

Tanzania (TPA) na Kampuni ya Kimataifa ya Kuhudumia Makontena Tanzania (TICTS), PIC, na Ewura.

Profesa Muhongo alisema Bodi hiyo itaanza kazi Jumanne ijayo na endapo tatizo litajirudia, kama ni upande wa Serikali itawajibika na watendaji watafukuzwa kazi na kama ni upande mwingine utawajibishwa na Serikali.

“Taifa haliwezi kupata msukosuko kwa sababu ya watu wachache, kama kuna mtu anaona kasi hii hawezi kwenda nayo kwa kutimiza majukumu aseme wazi,” alisema Profesa Muhongo.

Hatua hiyo imekuja baada ya Katibu Mkuu wa wizara yake, Eliakim Maswi kuitaka Ewura kuhakikisha inapeleka mafuta mikoani agizo ambalo bado halijapunguza kero ya bidhaa hiyo.

Katikati ya wiki, PIC iliihakikishia Serikali kuwa kuna mafuta ya kutosha na upungufu huo umetokana na kampuni mama kukataa kuuza mafuta yao kwa vituo ambavyo havina kampuni zinazoagiza mafuta nje ya nchi.

Katika kujitahidi kupunguza uhaba wa mafuta uliopo nchini, Mamlaka ya Udhibiti wa Huduma za Nishati na Maji (Ewura), imesema imekubaliana kupunguza asilimia 50 ya mafuta yaliyokuwa yasafirishwe kwenda nje ya nchi na kuamua yatumike nchini. 

Akizungumza na waandishi wa habari ofisini kwake Dar es Salaam jana, Meneja wa Mawasiliano wa Ewura, Titus Kaguo alisema wamefikia uamuzi huo ili kukabiliana na tatizo la uhaba wa mafuta uliopo kwa sasa. 

Kaguo alisema kiwango cha mafuta yaliyopo kwa sasa kwa dizeli kuna lita zaidi ya milioni 38 ambayo yatatosha kwa muda wa siku 10, petroli zaidi ya milioni 16 kwa siku tisa, jet 1 lita milioni 11 kwa siku 25 na mafuta ya taa lita 558,180 kwa siku tatu. 

Aidha, alisema kuna meli zinazotarajiwa kuingia nchini kati ya Novemba 7 mpaka 9, kwa ajili ya kuleta mafuta ambayo ni zaidi ya lita milioni 50 hivyo kupunguza tatizo hilo. 

MHARIRI KAMPUNI YA BUSINESS TIMES APIGWA RISASI NA MAJAMBAZI...

Mnaku Mbani Lukanga akiwa amelala kitandani katika Hospitali ya Muhimbili.

Habari zilizotufikia hivi punde zinasema kwamba Mnaku Mbani Lukanga, Mhariri wa magazeti yanayomilikiwa na kampuni ya Business Times amepigwa risasi usiku huu na watu wanaoshukiwa kuwa ni majambazi.
Kwa mujibu wa taarifa hizo, Mnaku amekimbizwa katika Hospitali ya Taifa ya Muhimbili, Dar es Salaam kwa matibabu kufuatia majeraha ya risasi aliyopata katika tukio hilo.
Kwa mujibu wa vyanzo vya habari, inasemekana kuwa alivamiwa na watu asiowafahamu akiwa njiani kuelekea nyumbani kwake Mbagala akitokea ofizi za magazeti hayo zilizoko katika Mtaa wa Lugoda, Gerezani na kumnyang'anya funguo za gari lake.
Baada ya kumnyang'anya funguo, mtu mwingine aliyekuwa na bunduki akafyatua risasi iliyopiga mdomoni na kutokea shavuni ambapo meno matatu yameng'oka.
Haikuweza kufahamika mara moja endapo kuna upotevu wa vitu wala thamani ya uharibifu wa mali zozote za Mnaku.
Tunaendelea kufuatilia taarifa zaidi kuhusu tukio hilo kwa Kamanda wa polisi kuweza kupata taarifa zaidi.

POLISI WAKAMATA KILO 1,640 ZA BANGI INAYOPELEKWA UINGEREZA...

Waingereza wawili ni miongoni mwa watu 51 waliokamatwa wakati polisi walipovunja kundi kubwa la kimataifa la usafirishaji dawa za kulevya na kuifanya Uingereza kufurika kwa mihadarati.
Polisi wa Hispania wamekamata kilo 1,640 za bangi zenye thamani ya Pauni za Uingereza milioni 5 pamoja na boti nne ziendazo kasi, magari 17, malori na pikipiki zinazotumika kusambazia dawa hizo.
Polisi walisema mtandao huo unaundwa na Wahispania, Wamorocco, Warusi, Waingereza, Wajerumani, Waholanzi na Waromania.
Wanatuhumiwa kufanya magendo ya bandi zenye thamani ya mamilioni ya Pauni kutoka Afrika kwenda Ulaya.
Maofisa wenye silaha wamepekua vifaa 11 na kompyuta zilizokamatwa, simu za mikononi na mashine zinazotumika kufungia dawa hizo.
Waingereza hao wawili walikamatwa mjini Coin karibu na Malaga.
Wizara ya Mambo ya Ndani ya Hispania imesema kwenye taarifa yake kwamba: "Mtandao huu ulisafirisha dawa hizo kwa kutumia boti ziendazo kasi kutoka Morocco, na kupakua kwenye fukwe mbalimbali katika pwani ya Hispania kisha baadaye kuzificha ndani ya magari kwa ajili ya kusafirishwa kwenda nchi nyingine za Ulaya.
"Dawa hizo zilizokuwa zikielekea Uingereza zilifungwa kwenye ghala huko Coin, Malaga, ambako polisi waligundua chumba cha siri, kilichofichwa nyuma ya makabati, wakitumia mgandamizo wa hewa kwenye utomvu wa bangi hiyo."
Dawa hizo za kulevya zilikamatwa katika vitongoji vya Malaga, Seville, Alicante, Girona, Barcelona na Cadiz.
Polisi hawakutoa taarifa zozote zaidi kuhusu Waingereza hao wawili walio chini ya ulinzi.

CHEKA TARATIBU...

Mhudumu wa ndege kamfuata Mzee wa Kisukuma na kumtaka kuhama sehemu alipokaa katika daraja la kwanza na kwenda daraja la kawaida anakostahili. Mzee wa Kisukuma akagoma akijitetea yeye ni maarufu na kwamba hatoki pale mpaka afike Mwanza. Baada ya karibu nusu saa ya mabishano bila mafanikio, Mhudumu akamwita Bosi wake amsaidie kuongea na yule mzee. Bosi akamfuata yule mzee na kumnong'oneza. Haraka sana yule mzee akainuka na kwenda kukaa sehemu anapotakiwa. Kwa mshangao Mhudumu akamuuliza Bosi wake katumia mbinu gani kumhamisha yule mzee kirahisi vile. Bosi akajibu, "Nimemweleza tu kwamba sehemu aliyokaa haiendi Mwanza!" Kasheshe...

MAMA AMUUA MWANAE KWA KUSHINDWA KUHIFADHI AYA ZA QUR'AN...

KUSHOTO: Yaseen Ali enzi za uhai wake. KULIA: Mwili wa Yaseen ukipelekwa kuzikwa.

Mama amempiga vibaya kwa fimbo hadi kufa mtoto wake wa kiume mwenye miaka saba kisha kuchoma moto mwili wake sababu alikuwa mzito kushika kichwani aya za Qur'an Tukufu, mahakama ilielezwa.
Sara Ege mwenye miaka 32, anadaiwa kumpiga mtoto wake Yaseen Ali 'kama mbwa' kwa kushindwa kuelewa aya kutoka kwenye maandiko hayo matakatifu, kabla ya kuuchoma moto mwili wake katika nyumba yao iliyoko mjini Cardiff katika harakati za kuficha uovu wake huo alioufanya.
Kifo cha kijana huyo kinaaminika kuwa janga kufuatia moto kwenye nyumba huko Pontcanna, hadi hapo uchunguzi wa mwili ulipogundua Yaseen alikufa kabla ya moto kulipuka, Mahakama ya Cardiff imeelezwa.
Sara pia anatuhumiwa kwa kumtesa mtoto wake huyo wa kiume kwa miezi kadhaa kuelekea kifo chake, akidaiwa kumpiga kwa nyundo na kumfungia bandani kwa kuwa mzito katika kuelewa masomo ya Kiislamu.
Kesi hiyo katika Mahakama ya Cardiff imeelezwa jinsi mhitimu huyo wa Chuo Kikuu na mumewe, Yousuf Ege walimwingiza Yaseen katika madarasa ya juu kwenye msikiti wa jirani na kutarajia angekuja kuwa Hafiz - neno la Kiislamu linalotumiwa kwa mtu ambaye ameshika vilivyo aya za Qur'an kichwani.
Katika video iliyorekodiwa ya mahojiano na polisi, Sara aliwaeleza maofisa alimwekea malengo mtoto wake huyo wa miaka saba kuweza kushika kurasa 35 katika miezi mitatu.
Lakini mahakama ilielezwa Yaseen mwenye kupenda ucheshi alipendelea kucheza na marafiki zake na kuzorota kwenye masomo yake.
"Nilizidi kuchanganyikiwa zaidi na zaidi," Sara alisema katika mahojiano hayo.
"Kama akishindwa kusoma vizuri nilipanda  mno na jazba - Nilimpiga.
"Lakini Yaseen hakuwa mahiri - baada ya mwaka wa mafunzo aliweza kushika sura moja tu."
Aliendelea: "Nilijawa na uchafu wote huu kichwani mwangu, kama sikuweza kuzingatia, nilipandwa na hasira mno, nilimgombeza Yaseen wakati wote.
"Nilizidi kupata wazimu - Nilitumia fimbo kumtandika nayo."
Mahakama ilielezwa jinzi Sara alivyompiga Yaseen kwa nyundo, na kandambili na pia kumshindilia ngumi mfululizo.
Pia anatuhumiwa kumfungia katika banda, kumfunga kwenye mlango, na kumlazimisha kufanya kushapu.
Mahakama ilielezwa kwamba miezi kadhaa baada ya kifo cha Yaseen, Sara alimweleza daktari alielekezwa na Shetani kumuua mtoto wake huyo wa kiume - na kwamba alikuwa akijisikia vizuri kwa asilimia mia moja baada ya kifo chake.
Maelezo aliyojirekodi yaliyopatikana yanasema: "Ni kama kuna kitu kimeachilia. Kwa miezi mitatu au minne sikuwa katika hali ya kawaida."
Polisi na vikosi vya uokoaji viliitwa kwenye nyumba hiyo huko Pontcanna, mjini Cardiff, Julai 2010 baada ya moto kuchomoza katika ghorofa ya juu.
Yaseen alivutwa kutoka kwenye moto na askari wa uokoaji Rhodri Morgan aliieleza mahakama jinsi alivyomhudumia akiamini pengine anaweza kuokoa maisha yake.
Alisema: "Nilikuwa nikimkandamiza kifua chake kurejesha mapigo ya moyo, lakini nililazimika kutoa mikono yangu sababu ngozi yake ilikuwa ya moto sana.
"Nilipokuwa nikifanya hivyo vipande vya ngozi yake na mafuta yalikuwa yakichuruzika kutoka miguuni mwake - ilikuwa kama kipande cha karatasi kilichoungua na kukunjamana."
Mafuta ya kuchomea nyama walikutwa katika nguo za Sara wakati alipokamatwa baada ya uchunguzi wa mwili kugundua kwamba Yaseen alikufa kabla ya moto kulipuka.
Alikana kumuua Yaseen na kuuchoma mwili wake kufika kile alichokuwa amefanya.
Mumewe  anakanusha kusababisha au kuruhusu kifo cha mtoto huyo kwa kutozuia vipigo hivyo vya mkewe.
Baba wa Yaseen, ambaye alimpelekea mtoto huyo wa miaka saba kwenye msikiti kwa ajili ya mafunzo ya Qur'an kabla na baada ya kuanza shule, amesema hakuwahi kumuona mkewe akiinua mkono kumpiga mtoto wao. Kesi hiyo inaendelea.

JICHO LA TATU...

MWANAMKE AAMBIWA AKATOLEWE INZI, AKAISHIA KUBAKWA MOROGORO...

Kamanda wa Polisi, Faustine Shilogile.

Polisi mkoani Morogoro inamsaka mtu aliyembaka mwanamke baada ya kudai kwamba amemeza nzi na kwamba atapata matatizo makubwa iwapo hatamtoa mdudu huyo.
Kamanda wa Polisi mkoani Morogoro Faustine Shilogile aliwaambia waandishi wa habari jana ofisini kwake, kuwa tukio hilo ni la Oktoba 30 jioni katika  maeneo ya Mazimbu mkoani hapa.
 Alisema kuwa mtuhumiwa huyo alikutana na mwanamke huyo na  kumlaghai hivyo na kumtaka waende vichakani ili amtapishe  na kwamba baada ya kufanyiwa tendo hilo mtu huyo akatokomea kusikojulikana.
Kamanda huyo alisema kuwa mtu huyo ambaye hakuweza kufahamika jina lake hajakamatwa na polisi wanaendelea na uchunguzi zaidi.
Hata hivyo, kamanda  alihadharisha jamii dhidi ya  matapeli wenye tabia hizo ambao polisi  inawachunguza watiwe mbaroni.
Wakati huo huo  Mohamed  Juma amefariki dunia baada ya kudondoshwa na dereva wa bodaboda ambaye alitoweka   na kumwacha akiwa na majeraha makubwa sehemu za kichwani.
Kamanda huyo alisema watu wawili Aziz Zuber na mwingine aliyejulikana kwa jina moja la Amani  walimkuta mtu huyo akiwa na hali mbaya barabarani katika eneo la Kinole.
Walimchukua na kumpeleka hospitali ya mkoa.  Alisema kuwa wakati watu hao wakifuatilia karatasi ya kutibiwa ya polisi PF 3, waliporudi hospitalini walikuta majeruhi huyo amefariki.

BINTI WA MIAKA 15 AFARIKI WAKATI AKITOLEWA MIMBA MWANZA...

Sehemu ya Jiji la Mwanza.

Polisi mkoani Mwanza inamshikilia Mganga wa Zahanati ya Kiloleli katika Kata ya Nyamanoro wilayani Ilemela, Dk Lameck Msafiri kwa kusababisha kifo cha mtoto wa miaka 15 wakati akimtoa mimba.
Kaimu Kamanda wa Polisi Mkoa wa Mwanza, Lily Matola alisema Msafiri alisababisha kifo cha mtoto huyo juzi saa 3 usiku.
Kwa mujibu wa Kamanda Matola, mimba ya mtoto huyo ilikuwa ya miezi minne na kabla ya kufariki, alikuwa akiishi na wazazi wake katika eneo la Kilimahewa, jijini hapa.
Matola alisema Dk Msafiri anashikiliwa kwa mahojiano zaidi na upelelezi ukikamilika atafikishwa mahakamani.
Wakati huo huo, wanafunzi 30 wa Shule ya Msingi Lake B pamoja na mwalimu wao wamenusurika kufa baada ya kujeruhiwa na radi kali iliyopiga juzi saa 4 asubuhi wakati wakiwa darasani.
Kamanda Matola alisema ajali hiyo ilitokea wakati wanafunzi hao wa darasa la pili wakiwa darasani pamoja na mwalimu wao. Alisema walijeruhiwa na kukimbizwa katika Hospitali ya Mkoa ya Sekou Toure kwa matibabu.
Alisema mwanafunzi Felix Revocatus (8) hali yake sio nzuri na amelazwa hospitalini hapo huku wengine wakitibiwa na kuruhusiwa.
Katika tukio jingine, mvua kubwa inayoendelea kunyesha jijini Mwanza imesababisha kifo cha mtoto wa miezi mitatu, Ashfat Abdsalama baaada ya mtoto huyo pamoja na wazazi wake kuangukiwa na ukuta wa nyumba wanayoishi wakati wakiwa ndani.
Akifafanua Kamanda Matola, alisema juzi saa 4 asubuhi katika eneo la Kirumba Mlimani B, Abdsalama Hussein (30) na mkewe Nardia Geresheni (25) pamoja na mtoto wao, walidondokewa na ukuta wa nyumba baada ya ukuta huo kudondokewa na jiwe.
Alisema majeruhi hao walipelekwa katika Hospitali ya Rufaa ya Bugando kwa matibabu, lakini baadaye mtoto huyo alifariki dunia na hali za baba na mama pia sio nzuri.

ZUNGU ASHINDA UCHAGUZI CCM LICHA YA MADAI YA RUSHWA...

Mheshimiwa Mussa Azzan Zungu.

Pamoja na kukamatwa kwa tuhuma za kudaiwa kukutwa akitoa rushwa ili kupata uongozi, Mbunge wa Ilala, Mussa Azzan Zungu ameibuka kidedea katika nafasi ya Ujumbe wa Halmashauri Kuu ya Taifa (NEC) ya CCM kupitia Jumuiya ya Wazazi.
Jumanne wiki hii, Zungu alikamatwa na Taasisi ya Kupambana na Kuzuia Rushwa (Takukuru) akiwa na wapambe wake watatu akidaiwa kutoa rushwa kwa wajumbe wa Mkutano Mkuu wa Jumuiya ya Wazazi, ili wamchague awe Mjumbe wa NEC.
Hata hivyo, Kamanda wa Takukuru Mkoa wa Dodoma, Eunice Mmari alimwachia Mbunge huyo wa Ilala na Mwenyekiti wa Bunge, kwa dhamana na kuongeza kuwa uchunguzi wa tuhuma hizo unaendelea na ukikamilika, atafikishwa mahakamani.
Saa chache baada ya kuachiwa kwa dhamana hiyo, Zungu alikuwa ndani ya ukumbi wa uchaguzi ambako aliibuka kidedea NEC kwa kupata kura 402, akiwa nyuma ya Naibu Waziri wa Kilimo, Chakula na Ushirika, Adam Malima aliyepata kura 531 na Mbunge wa Bukoba Vijijini, Jasson Rweikiza aliyepata kura 448.
Miongoni mwa walioshindwa ni Said Bwanamdogo, Dk Salim Chikago, Menrad Kigola, Paulo Kirigini, Murtaza Mangungu, Stella Manyanya, Vita Kawawa, Pricilla Mbwaga, Clementina Mollel, Bernard Murunya, Thobias Mwilapwa, Esther Nyawazwa, Dk Charles Tizeba na Jeremia Wambura.
Kwa nafasi hiyo ya ujumbe wa NEC Zanzibar nafasi mbili walioshinda ni Naibu Waziri wa Mambo ya Ndani, Pereira Ame Silima aliyepata kura 479 na Fatma Abeid Haji alipata kura 415.
Nafasi ya ujumbe wa Baraza Kuu Tanzania Bara walioshinda ni Dk Godbertha Kinyondo, Saumu Mohamed Bendera, Deogratias Rutta, Masudi Bwire na Juliana Chintika; wakati kwa Zanzibar ni Yasmini Yusfal Alloo (229),  Khamis Suleiman Dadi (221), Bakari Hamad Khamis (332),  Ali Haji Ali (192) na Haji Mwita (192).
Nafasi ya uwakilishi wa Mkutano Mkuu katika Jumuiya ya Wanawake aliyeshinda ni Godlever Kamala na uwakilishi katika Mkutano Mkuu wa Jumuiya ya Vijana (UVCCM) ni William Malecela aliyepata kura 574 na kuwashinda Talib Ali Talib aliyepata kura 217 na Namelok Sokoine aliyepata kura 107.
Akitangaza matokeo ya uchaguzi huo usiku wa kuamkia jana, Msimamizi Mkuu wa uchaguzi huo, Steven Wasira alisema Abdalah Bulembo alishinda nafasi ya Mwenyekiti kwa kupata kura 677 na kuwaacha Martha Mlata aliyepata kura 192 huku John Barongo akiambulia kura 42.
Nafasi ya Makamu Mwenyekiti ilikwenda kwa Dogo Idd Mabrouk aliyetetea kiti chake baada ya kupata kura 417 na kuwashinda wagombea wenzake Ally Issa Ally na Hassan Rajab Hatibu.
Wakati tuhuma za Zungu zikichunguzwa, Mwenyekiti wa CCM Taifa, Rais Jakaya Kikwete amesema dawa ya wala rushwa ndani ya chama hicho kwa sasa inatafutwa ili kukomesha tabia ya kuuza na kununua kura.
Akifunga mkutano huo jana, Rais Kikwete alisema lazima awaambie ukweli kuwa chama kinatukanwa kwa sababu ya watu wanaoendekeza tabia ya kununua na kuuza kura.
“Wanaofanya hivyo wanajijua na wengine wako humu humu ndani, lakini dawa ya wala rushwa ndani ya chama inatafutwa,” alisema Rais Kikwete huku akishangiliwa na wajumbe.
Aliwataka kujua jema na baya na sura inayojengeka sasa si nzuri sana kwani vitendo vya rushwa vimekichafua sana chama na sasa jitihada zinafanyika ili kuhakikisha rushwa inadhibitiwa katika chama.
Pia Rais Kikwete alimpongeza Mwenyekiti mpya Bulembo kwa kuchaguliwa kushika wadhifa huo na Dogo Idd Mabrouk kwa kuchaguliwa tena kuwa Makamu Mwenyekiti.
Hata hivyo, Mwenyekiti huyo alisema tathimini iliyofanyika tangu 1995 inaonesha kuwa jumuiya hiyo haijaonesha kama ilichangia ushindi wa CCM katika Uchaguzi Mkuu.
“Kati ya jumuiya tatu; wanawake na Vijana wanaongoza, Wazazi hapana, ukweli ndiyo huo, kaeni chini mjiulize, cha muhimu ni kujiuliza mtakuwaje tofauti na kuona mtafanya nini …lakini lazima mjue ukweli, wazazi sio sana nisipowaambiwa mimi  hakuna wa kuwaambia,” alisema.
Wagombea wa nafasi ya uenyekiti walioshindwa Barongo na Mlata juzi usiku walisusa kusaini karatasi ya matokeo.
Wakati mshindi wa nafasi hiyo, Bulembo alipopewa nafasi ya kujieleza alisema anasikitishwa na kitendo cha wenzie kugoma kuweka saini kwenye matokeo hayo.
Mwenyekiti wa muda wa mkutano huo, Mary Chatanda alipowaita wagombea hao kwenye saa tano usiku ili kuzungumza maneno machache, wagombea wote hawakutokea kwa kuwa walishaondoka ukumbini.

SHEKHE PONDA NA WENZAKE WAKWAMA TENA MAHAKAMANI...

Baadhi ya wafuasi wa Katibu wa Jumuiya na Taasisi za Kiislamu, Shekhe Ponda Issa Ponda  wakibishana na Polisi nje ya Mahakama ya Hakimu Mkazi Kisutu, Dar es Salaam wakati Ponda na wenzake walipofikishwa mahakamani hapo jana.

Mkurugenzi wa Mashitaka (DPP), Dk Eliezer Feleshi ameendelea kuzuia dhamana ya Katibu wa Jumuiya na Taasisi za Kiislamu, Shekhe Ponda Issa Ponda anayekabiliwa na mashitaka ya uchochezi na wizi wa mali zenye thamani ya Sh milioni 59.
Kesi hiyo ilitajwa jana katika Mahakama ya Hakimu Mkazi Kisutu, Dar es Salaam kwa mara ya pili kwa ajili ya washitakiwa Shekhe Ponda na wafuasi wake 49 kupewa masharti ya dhamana.
Washitakiwa hao walifikishwa mahakamani hapo saa 12:30 alfajiri wakiwa chini ya ulinzi mkali wa Polisi, wakisindikizwa na magari manane ya Polisi, farasi, mbwa pamoja na gari la maji ya kuwasha huku askari wengine wakiwa wamevaa mavazi rasmi ya kujikinga na silaha.
Waliingizwa kwenye chumba cha mahakama saa 2:00 asubuhi huku nje ya kukiwa na ulinzi mkali wa askari, mbwa pamoja na kamera ya CCTV iliyokuwa imefungwa katika ukuta wa mahakama ili kuhakikisha hakuna mtu anayeingia na silaha.
Kila mtu aliyeingia katika eneo la mahakama alihojiwa na kukaguliwa na Polisi ambapo wafuasi wengi wa Shekhe Ponda waliofika kusikiliza kesi hiyo walizuiwa kuingia katika eneo hilo kwa kuhofia wangesababisha vurugu.
Wakili wa Serikali, Tumaini Kweka alidai upelelezi wa kesi hiyo umekamilika na kumuomba Hakimu Victoria Nongwa anayesikiliza kesi hiyo kutoa uamuzi wa maombi ya dhamana kwa washitakiwa.
Hakimu Nongwa alisema dhamana ipo wazi kwa mshitakiwa wa pili hadi wa 50 endapo watatimiza masharti ya kuwa na mdhamini anayefanya kazi katika taasisi inayofahamika, atakayesaini hati ya Sh milioni moja.
Hata hivyo, alisema Shekhe Ponda ataendelea kubaki rumande kwa kuwa Mkurugenzi wa Mashitaka aliwasilisha mahakamani hapo hati ya kuzuia asipewe dhamana, hivyo hawawezi kutoa dhamana hadi DPP atakapowasilisha hati ya kuiondoa hati ya kuzuia dhamana.
DPP aliwasilisha hati hiyo chini ya kifungu cha 84 (4) cha Sheria ya Mwenendo wa  Makosa ya Jinai ya mwaka 2002, inayompa mamlaka DPP kufunga dhamana kwa mshitakiwa anayekabiliwa na makosa yanayodhaminika.
Kwa kifungu hicho, Mahakama inafungwa mikono na hivyo haina mamlaka ya kuipinga hati hiyo hadi DPP atakapoiondoa hati hiyo mahakamani.
Katika hati hiyo, DPP ametaja sababu mbili za kuzuia dhamana hiyo; ya kwanza kwa ajili ya usalama na sababu ya pili ni maslahi ya Jamhuri.
Katika kesi hiyo, washitakiwa hao akiwamo Zaida Yusuf mwenye umri wa miaka 100, wanatetewa na Wakili wa Kujitegemea, Nassor Mansoor.
Wote wanakabiliwa na mashitaka matano ambapo Oktoba 12 mwaka huu, katika eneo la Chang’ombe Markasi wanadaiwa kula  njama na kuingia kwa nguvu katika kiwanja kinachomilikiwa Kampuni ya Agri Tanzania Ltd  kwa nia ya kujimilikisha kiwanja hicho isivyo halali.
Aidha, inadaiwa kati ya Oktoba 12 na 16, mwaka huu, Chang’ombe Markaz pasipo uhalali, washitakiwa wote katika hali iliyokuwa ikichangia uvunjifu wa amani, walijimilikisha kwa nguvu ardhi ya kampuni hiyo.
Pia wanadaiwa waliiba vifaa na malighafi, matofali 1,500, nondo na  tani 36 za kokoto mali zote zina thamani ya Sh milioni 59.7.
Katika mashitaka ya uchochezi yanayomkabili Shekhe Ponda peke yake, inadaiwa katika eneo hilo la Chang’ombe Markaz akijiita Katibu wa Jumuiya na Taasisi za Kiislamu, aliwashawishi wafuasi wake ambao ni washitakiwa hao kutenda makosa hayo.
Kesi imeahirishwa hadi Novemba 15, mwaka huu watakaposomewa maelezo ya awali.
Wakati huo huo, kundi la wafuasi wa Shekhe Ponda waliozuiwa kuingia mahakamani, walisikika wakilalamika kuwa Waislamu duniani kote wanakandamizwa na hata hapa nchini pia na kushauriana waondoke kwa kuwa mahakama ni ya dini ya Kikristo, waliyodai inathaminiwa. 

MJASIRIAMALI BILIONEA KIZMBANI KWA TUHUMA ZA KUBAKA MSICHANA UFUKWENI...

KUSHOTO: Bilionea Greg Cox. KULIA: Ufukwe wa Bondi ambao Cox anadaiwa kufanya shambulio la ubakaji katika maeneo la jirani na hapo.

Bilionea kijana wa zamani wa shule za jamii amepandishwa kizimbani nchini Australia kwa madai ya kubaka msichana mdogo kwenye ufukwe wa Bondi.
Mjasiriamali huyo Greg Cox mwenye miaka 32, anatuhumiwa kwa shambulio la ngono dhidi ya msichana wa miaka 21 anayetoka Bermuda katika baa moja iliyoko kwenye ufukwe huo Januari mwaka huu.
Cox, mkazi wa Battetsea, South London, hakukanusha kufanya mapenzi na msichana huyo lakini alisisitiza kwamba wote walishiriki kikamilifu tendo hilo.
Akisimama mahakamani Septemba, wanasheria wake waliweka pingamizi bila mafanikio kuzuia jina lake lisiandikwe kwenye vyombo vya habari kujaribu kulinda rekodi yake nzuri ya nyuma na mafanikio yake katika shughuli zake.
Walijenga hoja kwamba ukweli kuwa ametoka katika familia inayofahamika sana na kuhudhuria shule ya bweni - Millfield karibu na Glastonbury, Somerset - sambamba na kuibuka katika jamii ya wafanyabiashara wa Uingereza, angeweza kuathirika na 'usumbufu asiostahili' kutokana na mashitaka hayo.
Katika kikao cha jana cha usikilizwaji hatia, kilichokaa kuamua kama kuna ushahidi wa kutosha kumshitaki, Wakili wa Cox, Graham Turnbul, alisema kulikuwa na 'kutofautiana' katika taarifa za matukio ambazo mdaiwa kuathirika amekabidhi polisi.
Alidai kuwa, uchunguzi wa kina wa madai yake unaweza kufumbua na kulikuwa na nafasi ya kutosha mashitaka dhidi ya Cox yangeweza kutupiliwa mbali.
Kama haitoshi, Hakimu Greg Walsh aliamua 'kesi haiwezi kuwa bila ushahidi thabiti' na nafasi ya Cox kushitakiwa kwa haki isingeweza kufanyiwa upendeleo.
Mfanyabiashara huyo - ambaye anaendesha kampuni ya kutoa mikopo kwa wateja wenye mitaji midogo - anatumia muda wake mwingi kuzunguka duniani kwa starehe au mikutano ya kujitangaza kibiashara.
Katika miaka ya hivi karibuni amekuwa mkurugenzi katika makampuni kadhaa na alikuwa akiishi kwenye ghorofa lenye thamani ya Pauni za Uingereza milioni moja lililoko Battersea, huko South London.
Anasemekana alikutana na msichana huyo anayetuhumiwa kumbaka katika klabu ya usiku ya Bucket List iliyoko karibu kabisa na Bondi.
Shambulio hilo inadaiwa lilitokea Januari 22 kati ya Saa 5:10 na Saa 5:30 usiku. Cox amekana madai yote dhidi yake.
Kwa mujibu wa Gazeti la Sunday Telegraph la mjini Sydney, Cox amekuwa akiishi kwenye nyumba za kifahari zilizoko ufukweni katika kitongoji cha Bronte, maili chache kutoka Bondi.
Anasemekana kuwa amekuwa akipunga upepo kwenye kisiwa cha Hamilton, nje ya Pwani ya Queensland, na kuhudhuria matukio ya michezo ya kuelea baharini kwenye kitongoji cha Manly mjini Sydney.
Wanasheria wake jana wameomba kurekebisha masharti kwa ajili ya dhamana yake ili kumwezesha kurejea Uingereza kutazama fursa za biashara yake.
Lakini hakimu ameamua kwamba ni juu ya Mahakama ya Wilaya kuamua kama Cox aruhusiwe kurejea nyumbani kabla ya kesi, ambayo kuna uwezekano kufanyika kabla ya Mei, mwakani.
Kwenye mtandao wa kampuni ya Quintessential, ameelezewa kama mjasiriamali mwenye uzoefu wa zaidi ya miaka 12 akiendesha kampuni yake mwenyewe 'tangu mwanzo hadi kufikia mapato ya Pauni za Uingereza milioni 40'.
Imeelezwa Cox na wenzake walikuwa Sydney kuhudhuria mkutano wa masoko ya digitali uliofanyika kwenye ukumbi wa Darling Harbour, Januari mwaka huu.
Malengo yake, Cox amesema katika ukurasa wake binafsi wa tovuti, kwamba 'rahisi mno - kuwa bora katika kila nifanyacho'.
Pia anamiliki kampuni yenye makao yake London inayoitwa Cloud9 Media.
Kampuni yake ya Quintessential Finance imejijengea heshima kubwa katika mahusiano na washirika wake wa kibiashara, ikitoa mialiko kusherehekea mjini Las Vegas na kuwasiliana kupitia mtandao wa Twitter.

MKURUGENZI MTENDAJI ALIYESIMAMISHWA TANESCO ATIMULIWA KAZI...

William Mhando.

Hatimaye Bodi ya Wakurugenzi ya Shirika la Umeme Tanzania (TANESCO), imetangaza kumwachisha kazi aliyekuwa Mkurugenzi Mtendaji wa shirika hilo, William Mhando kuanzia Oktoba 29, mwaka huu.
Kwa mujibu wa Bodi hiyo, Mhando ameachishwa kazi kwa sababu ya kukiuka taratibu za shirika na matumizi mabaya ya madaraka.
Taarifa iliyotolewa jana na Mwenyekiti wa Bodi ya Wakurugenzi ya Tanesco, Robert Mboma, ilieleza kuwa hatua hiyo imefikiwa baada ya uchunguzi uliofanywa na Mdhibiti na Mkaguzi Mkuu wa Hesabu za Serikali (CAG), kubaini tuhuma zilizoelekezwa kwa Mhando kuwa ni za kweli.
“Kufuatia tuhuma mbalimbali za ukiukwaji wa taratibu za Shirika ikiwemo matumizi mabaya ya mamlaka, mnamo tarehe 16, Julai 2012, Bodi ya Wakurugenzi ya Shirika la Umeme Tanzania, Shirika liliamua kumsimamisha kazi pamoja na maofisa wengine waandamizi, Mkurugenzi Mtendaji, Mhandisi William Geoffrey Mhando kwa nia ya kupisha uchunguzi huru na wa haki ili kubaini ukweli wa tuhuma hizo.
“Baada ya hapo, Ofisi ya Mdhibiti na Mkaguzi Mkuu wa Hesabu za Mashirika ya Umma ilifanya uchunguzi ili kubaini ukweli juu ya tuhuma zilizokuwa zinamkabili Mhandisi William Geoffrey Mhando ambapo katika uchunguzi huo, Mdhibiti na Mkaguzi Mkuu wa Hesabu za Mashirika ya Umma, aligundua kuwepo kwa ushahidi wa dhahiri wa ukiukwaji wa taratibu za Shirika na matumizi mabaya ya madaraka dhidi ya Mkurugenzi Mtendaji, Mhandisi William Geoffrey Mhando,” ilieleza taarifa ya Mwenyekiti wa Bodi.
Taarifa hiyo ilifafanua kuwa baada ya kupokea taarifa ya Mdhibiti na Mkaguzi Mkuu wa Hesabu za Serikali, Bodi ya Tanesco iliteua jopo la watu watatu ili kusikiliza utetezi wa Mhando dhidi ya tuhuma mbalimbali zilizoibuliwa na CAG.
“Baada ya kusikiliza, jopo hilo lilimkuta Mhandisi William Geoffrey Mhando na hatia dhidi ya makosa yanayohusiana na ukiukwaji wa taratibu za Shirika ikiwemo mgongano wa maslahi,” ilieleza taarifa hiyo.
Ilieleza kwamba pamoja na yote hayo, Bodi ilikutana Oktoba 29, mwaka huu, na kujiridhisha kuwa Mkurugenzi Mtendaji huyo wa Tanesco alifanya makosa yanayohusiana na kuingia kwenye mikataba yenye mgongano wa kimaslahi kinyume na taratibu za shirika.
“Hivyo basi, kufuatia hayo, Bodi ya Wakurugenzi ya TANESCO iliamua kumwachisha kazi Mhandisi William Geoffrey Mhando kuanzia tarehe 29.10.2012,” ilieleza taarifa hiyo ya Mwenyekiti Mboma.
Mapema wiki hii, Jumatatu na Jumanne, Tanesco ilikuwa imeita vyombo vya habari ofisini kwake kwa ajili ya kuzungumza na vyombo vya habari, lakini ikaahirisha mara zote huku habari zikianza kuvuja kwamba kulikuwa na maamuzi mazito kuhusu hatima ya Mkurugenzi Mtendaji Mhando.
Wakati wa Bunge la Bajeti, Mbunge wa Kuteuliwa, James Mbatia (NCCR-Mageuzi), alimtuhumu Mhando kutumia madaraka yake vibaya kwa kutoa kazi kwa Kampuni ya Santa Clara ambayo inadaiwa kuwa ya mkewe mkurugenzi huyo, jambo ambalo lina mgongano wa maslahi.
Aidha, Waziri wa Nishati na Madini, Profesa Sospeter Muhongo aliituhumu Tanesco chini ya uongozi wa Mhando, kwa kununua nguzo za umeme mkoani Iringa na kisha kuzipeleka Mombasa nchini Kenya, kabla ya kuziingiza tena nchini, na kuuzwa kwa Tanesco kwa bei ya Afrika Kusini.
Pia chini ya uongozi wa Mhando, Tanesco inatuhumiwa kuagiza vipuri kutoka nje ya nchi, lakini mzigo ulipofikishwa nchini, iligundulika kwamba lilikuwa ni kasha la misumari.
Mbali ya Mhando, wengine waliokuwa wamesimamishwa kupisha uchunguzi wa CAG ni Naibu Mkurugenzi Mtendaji wa Huduma za Shirika, Robert Shemhilu, Ofisa Mkuu wa Fedha, Lusekelo Kassanga na Meneja Mwandamizi katika Ununuzi, Harun Mattambo. Hatima yao haikuelezwa katika taarifa ya jana.

SERIKALI YAIAGIZA EWURA KUADHIBU VITUO VINAVYOGOMA KUUZA MAFUTA...

Baadhi ya wakazi wa Dar es Salaam wakisubiria kununua petroli katika moja ya vituo vichache vilivyokuwa wazi kufuatia kuadimika kwa bidhaa hiyo nchini.

Serikali imeagiza Mamlaka ya Udhibiti wa Nishati na Maji (Ewura), kuchukua hatua za kisheria dhidi ya kampuni zote zitakazokaidi kuuza mafuta kwa sasa, hali iliyosababisha usumbufu mkubwa kwa wananchi.
Katibu Mkuu wa Wizara ya Nishati na Madini, Eliakim Maswi alitoa tamko hilo jana Dar es Salaam baada ya kupokea taarifa ya Ewura na Kampuni inayoratibu uagizaji wa mafuta wa pamoja (PIC) iliyoonesha kuwa kuna akiba ya mafuta inayotosha kutumika kati ya siku 10 na 14.
“Hatuwezi kuona wananchi wanateseka wakati kuna mafuta ya kutosha nchini, wale ambao hawataki kuuza chukueni hatua haraka,” alisema Maswi.
Awali, Mkurugenzi wa Petroli wa Ewura, Godwin Samwel alipoulizwa sababu za kukosekana kwa nishati hiyo, ambako ilielezwa kuwa jana baadhi ya mikoa haikuwa na nishati hiyo kabisa, alijitetea kuwa ni kweli mafuta yapo.
Samwel alifafanua kuwa uhaba huo umetokana na kampuni kubwa kuamua kuuza mafuta hayo kwa vituo vya kampuni zao na kuvikatalia vituo ambavyo havina kampuni kubwa kununua mafuta hayo, hali ambayo imezua kizaazaa cha mafuta nchini huku mikoani hali ikiwa mbaya zaidi.
“Ndio maana utakuta vituo vingine vina mafuta na vingine havina,” alisema Samwel na kutaja sababu nyingine ya  upungufu huo kuwa ni kuwepo meli zinazopakua mafuta ya kwenda nje ya nchi na migodini kwa muda mrefu katika boya la KOJ wakati meli zenye mafuta ya ndani zikisubiri.
Naye Mwenyekiti wa Bodi ya PIC, Shaniff Mansour alisema hadi juzi jioni kiasi cha mafuta kilichopo nchini kilikuwa dizeli lita milioni 34.1, petroli lita milioni 20.6, jet 1 lita milioni 15.6 na mafuta ya taa lita milioni 5.2.
Mansour alisema kiasi hicho cha mafuta kinatosha kutumika ndani ya siku 10 na akaongeza kuwa kuanzia jana meli nyingine yenye mzigo wa mafuta imeanza kupakua mafuta katika boya la KOJ ambako dizeli ni tani 23, 700 na petroli ni tani 14, 800 hali inayozidi kuongeza upatikanaji wa bidhaa hiyo.
Mansour pia alisema mafuta ambayo yako nchini yakisubiri kusafirishwa nje (Transit) ya nchi ni mengi zaidi kuliko mafuta ya ndani na akataja kuwa mafuta ya nje; dizeli ni lita milioni 46.6, petroli lita milioni 31.3 na jet 1 ni milioni 4.9 na mafuta ya taa ni lita milioni 1.2.
Kutokana na hali hiyo, mbali na kuwabana wanaosusa kuuza mafuta, Maswi aliagiza Serikali ichukue nusu ya mafuta yanayosafirishwa nje ya nchi ili yatumike hapa nchini.
“Naagiza kampuni ziuze mafuta mikoani na hata vituo ambavyo havina kampuni mama viuziwe mafuta kupunguza tatizo hili,” alisema Maswi na kuitaka Ewura kuhakikisha magari ya mikoani yanapakia mafuta kwenye maghala yalikohifadhiwa mafuta. Aliisisitizia Ewura kuwa kampuni ambayo haitaki kuuza mafuta ichukuliwe hatua haraka.
Alitaka pia agizo la kuuza mafuta yaliyokuwa yanasafirishwa nje lianze kutekelezwa haraka na akashangaa kuwa haijawahi kutokea mafuta yanayosafirishwa nje yawe mengi kuliko yanayotumika ndani ya nchi.

PEDESHEE PAPAA MSOFE ALALAMIKIA KESI YAKE KUCHELEWESHWA...

Marijani Msofe 'Papaa Msofe' alipokuwa akiingia mahakamani kusikiliza kesi yake.

Upande wa utetezi katika kesi ya mauaji inayomkabili mfanyabiashara maarufu Dar es Salaam, Marijani Msofe (50) maarufu Papaa Msofe, umeulalamikia upande wa mashitaka kuchelewesha upelelezi wa kesi hiyo.
Wakili wa Msofe, Richard Rweyongeza alidai hayo jana mbele ya Hakimu Agness Mchome wa Mahakama ya Hakimu Mkazi Kisutu. Alidai tangu mteja wake alipokamatwa, polisi wamelala na hawafanyi kazi yoyote na kwamba ndiyo maana upelelezi wa kesi hiyo unachelewa.
Alidai kuwa mshitakiwa alikamatwa mwaka mmoja baada ya kufanyika kwa tukio hilo, lakini mpaka sasa upelelezi haujakamilika.
Hakimu Mchome alisema ili kuepusha maneno na malalamiko kila jambo linalofanyika liwe wazi kwa mahakama kwa sababu kutoa taarifa kunaonesha uwajibikaji.
Akikubali hoja za Wakili Rweyongeza, Hakimu aliamuru upande wa mashitaka kukamilisha upelelezi wa kesi hiyo. Kesi hiyo itatajwa tena Novemba 13 mwaka huu.
Inadaiwa kuwa Novemba 6 mwaka jana katika eneo la Magomeni, Msofe alimuua  Onesphory Kitoli jambo ambalo ni kinyume na kifungu cha 196 cha Sheria ya Kanuni ya Adhabu ya mwaka 2002.
Kwa mara ya kwanza Msofe alifikishwa mahakamani hapo Agosti 10 mwaka huu, hata hivyo hakuruhusiwa kujibu mashitaka kwa kuwa mahakama hiyo haina mamlaka ya kusikiliza kesi hiyo isipokuwa Mahakama Kuu.
Shauri hilo limefunguliwa mahakamani hapo katika hatua ya upelelezi na baadaye itahamishiwa Mahakama Kuu kwa ajili ya kuanza kusikilizwa.

MBUNGE MUSSA AZZAN ZUNGU WA CCM ATIWA MBARONI KWA RUSHWA...

Mheshimiwa Mussa Azzan Zungu.

Mbunge wa Ilala kupitia Chama Cha Mapinduzi (CCM), Mussa Azzan Zungu ni miongoni mwa watu waliotiwa mbaroni mkoani hapa na Taasisi ya Kuzuia na Kupambana na Rushwa (TAKUKURU) baada ya kubambwa wakigawa fedha kwa wajumbe wa Mkutano Mkuu wa Taifa wa Jumuiya ya Wazazi ya CCM.
Zungu, ambaye alikuwa mgombea wa nafasi ya Mjumbe wa Halmashauri Kuu ya Taifa (NEC) kupitia jumuiya hiyo katika uchaguzi uliofanyika jana, alikamatwa katika Hoteli ya Golden Crown akiwa na wapambe wake watatu usiku wa kuamkia juzi, akidai kutoa rushwa kwa wajumbe ili wampigie kura.
Katika mkutano wake na waandishi wa habari jana, Kamanda wa Takukuru Mkoa wa Dodoma, Eunice Mmari alisema Zungu ameachiwa kwa dhamana huku uchunguzi ukiendelea na atafikishwa mahakamani baada ya uchunguzi huo kukamilika.
Mmari aliwataja waliokamatwa wakiwa na Zungu kuwa ni Yahya Danga, Busolo Pazi na Frank Magati.
Akielezea tukio hilo, Mmari alisema waliweka mtego kwenye hoteli hiyo na Zungu alikwenda kwenye bustani ambako kulikuwa na wajumbe na wakati huo alikuwa ndani ya gari ndogo aina ya Mark II na alikuwa akizungumza kwa kuwashawishi wajumbe ili wamchague huku gari nyingine aina ya Prado likiwa karibu na hapo.
Kamanda huyo alidai Prado lilikuwa na fedha za kugawia wajumbe na baada ya wachunguzi wa Takukuru kuvamia gari la Zungu, Prado ilitoweka haraka na hivyo hawakukamata fedha hizo kama ushahidi.
“Zungu alikuwa na wapambe watatu na mmoja wa wapambe hao alikuwa akitaja kiwango cha kuwalipa wajumbe, tunaendelea na uchunguzi, ukikamilika wote watafikishwa mahakamani,” alisema Mmari.
Pia Mmari alisema Mwenyekiti wa Jumuiya ya Wazazi Mkoa wa Mbeya, Fatuma Kasenga na Mjumbe wa Mkutano Mkuu wa Wazazi Taifa, alikamatwa usiku wa kuamkia jana akiwa analipia baadhi ya wajumbe  wa mkutano huo chakula na vinywaji.
“Inaaminika kuwa huo ulikuwa ni ushawishi wa wajumbe hao, mmoja wa wagombea katika uchaguzi huo alikamatwa katika nyumba ya kulala wageni ya Kitoli iliyopo eneo la Barabara ya Iringa,” alisema.
Zungu alikuwa Mwenyekiti wa Wazazi Mkoa wa Dar es Salaam katika miaka mitano iliyopita, na pia ni Makamu Mwenyekiti wa Kamati ya Kudumu ya Bunge ya Mambo ya Nje, Ulinzi na Usalama. Hakupatikana jana kuzungumzia suala hili, kwani simu zake zote za mkononi hakuwa anazipokea.
Kamanda Mmari alisema Takukuru imekuwa ikifuatilia vitendo vya rushwa katika uchaguzi huo.
Alisema mtuhumiwa mwingine ambaye wanaendelea kumfanyia uchunguzi ni aliyekuwa akigombea nafasi ya Mjumbe wa Baraza Kuu la Wazazi Taifa na Mjumbe wa Mkutano Mkuu wa CCM Taifa, Dk Damas Mukasa ambaye alikamatwa Oktoba 8, mwaka huu nje ya Ukumbi wa Kilimani mjini hapa kwa kosa la kutoa rushwa kwa wajumbe wa Mkutano Mkuu ili wampigie kura.
Mmari alisema wajumbe wawili wa mkutano huo walikamatwa kwa kosa la kupokea rushwa kutoka kwa Dk Mukasa ambaye alitumia mbinu ya kutoa fedha hizo kupitia kwa wauza nguo waliokuwa wakifanya biashara nje ya ukumbi huo wa mkutano.
Aidha, Mmari aliwatahadharisha wajumbe wa Mkutano Mkuu kuwa makini kwani Takukuru wamejipanga kuhakikisha wanakamata wale wanaojihusisha na vitendo vya rushwa.
Alisema baadhi ya changamoto wanazokabiliana nazo ni wajumbe kushirikiana na wagombea na wapambe wao katika vitendo vya rushwa na hivyo kukosa ushirikiano; tabia ya wananchi kuona vitendo vya rushwa vikiendelea bila kuchukua hatua zozote huku baadhi ya vitendo vya rushwa vikifanyika ndani ya nyumba za wajumbe usiku wa manane, kulingana na wingi wa wajumbe inakuwa shida maofisa kuwapo kila eneo.
Hivi karibuni, wakati akifunga Mkutano Mkuu wa UWT, Mwenyekiti wa CCM Taifa, Rais Jakaya Kikwete alielezea kukerwa na rushwa katika uchaguzi wa CCM na kushangazwa na hatua ya wanawake nao kujihusisha na vitendo vya rushwa.
Katika kufungua Mkutano Mkuu wa Jumuiya ya Umoja wa Vijana (UVCCM), Rais Kikwete alirejea pia suala hilo la rushwa na kuwataka vijana hao kuiondolea aibu CCM kwa kuchagua viongozi wasiotoa rushwa.
Lakini licha ya kauli zake kumekuwapo na kelele kutoka kwa umma, na wanachama na wapenzi wa CCM wakitaka matokeo ya uchaguzi wa UWT Taifa na UVCCM Taifa yafutwe.
Katika hatua nyingine, matokeo ya awali ya kura katika uchaguzi wa Wazazi Taifa yanaonesha kuwa kada maarufu wa chama hicho, Abdallah Bulembo ndiye aliyekuwa akiongoza dhidi ya wapinzani wake, Katibu wa CCM wa Mkoa mstaafu John Barongo na Mbunge wa Viti Maalumu, Martha Mlata.

HIVI NDIVYO CHELSEA WALIVYOWATOA NISHAI MAN UNITED...

CHEKA TARATIBU...

Kijana mmoja kagombana na babake kuhusu masuala fulani ya familia. Baada ya kufikiri sana namna ya kumkomesha baba yake kufuatia kushindwa cha kumfanya, kijana akaenda kwenye geti la makaburi ya Kinondoni na kubandika picha ya baba yake kisha chini akaandika "COMING SOON!" Duh...

KIMBUNGA SANDY CHAFUKUA MAKABURI NA KUACHA MAJENEZA NJE...

Baada ya kuwa imesawazisha karibu eneo lote linalozingira Jiji la New York na Pwani ya Mashariki huku ikifanya uharibifu mkubwa katika eneo hilo Jumatatu usiku, kimbunga cha Sandy kimeondosha udongo na kusababisha majeneza kuchomoza kutoka kwenye makaburi yalimofukiwa.
Kwenye makaburi mjini Crisfield, Maryland, majeneza mawili, moja la shaba na jingine fedha, yalichomoza kutoka ardhini kufuatia mafuriko ya maji yaliyopita kasi kubwa yaliyosababishwa na kimbunga cha Sandy kuchimba udongo.
Yalikuwa na nguvu kubwa kiasi cha kubomoa kuta za saruji zilizokuwa zimefunika makaburi hayo.
Kimbunga kikubwa kilichosababisha uharibifu mkubwa kuwahi kutokea katika miongo kadhaa kimeikumba miji ya Marekani yenye wakazi wengi zaidi na kuathiri watu na viumbe huku ikikata mawasiliano ya kisasa na kuwaacha mamilioni ya watu bila nishati ya umeme na maelfu waliokimbia nyumba zao zilizoharibiwa na mafuriko wakijiuliza lini, na kama maisha yao yatarejea katika hali ya kawaida.
Kimbunga cha Sandy kimeua takribani watu 50, wengi wakipoteza maisha kutokana na kuangukiwa na miti, na bado hakijaisha. Kimeshambulia nchi kavu maeneo yote ya Pennsylvania kuelekea magharibi mwa New York kumwaga sehemu kubwa ya maji yake na kwamba ilitarajiwa kusababisha uharibifu mkubwa juzi usiku.
Meya wa Mji wa New York Michael Bloomberg alisema anatathmini uharibifu katika jiji lake.
Zaidi ya wakazi milioni 8.2 wamekosa huduma ya umeme katika majimbo 17 kuelekea magharibi hadi Michigan.
Karibu milioni mbili kati ya hao walikuwa New York, ambako sehemu kubwa walikosa umeme na mitaa yote iliishia kuzingirwa na maji - kama ilivyotokea kwenye njia saba za treni za chini kwa chini ya kati ya Manhattan na Brooklyn kwa upande mmoja.
Soko la Hisa la New York lilifungwa kwa siku ya pili kutokana na hali ya hewa, hii ikiwa ni mara ya kwanza kutokea tangu dhoruba kali ya theluji mwaka 1888.

JICHO LA TATU...

KAMBA ZA PAZIA ZAMNYONGA BINTI MTOTO WA BILIONEA...

KUSHOTO: Bilionea wa Norway, Morten Hoegh. KULIA: Mapazia kama haya ndiyo yamechukua uhai wa mtoto Alexandra.

Binti mwenye miaka miwili wa mmoja wa matajiri Uingereza amekufa baada ya kukutwa akiwa katundikwa kwenye kamba za pazia ndani ya kitanda chake kidogo.
Alexandra Lucy Hoegh aligunduliwa na mama yake aliyejawa hofu Dana, ambaye alikimbia nje ya nyumba yao ya familia yenye thamani ya Pauni za Uingereza milioni 12 iliyoko Notting Hill akipiga kelele: "Jamani nisaidieni, mtoto hapumui".
Mtoto huyo ni binti wa tajiri wa meli na mafuta mwenye asili ya Norway, Morten Hoegh, ambaye anaendesha kampuni yake yenye utajiri wa mabilioni ya Pauni kati ya miji ya London na Oslo.
Madaktari walifika eneo la tukio huko magharibi mwa London lakini mtoto huyo akafariki wakiwa njiani kumpeleka hospitali Jumatatu.
Kifo chake kimeangazia hatari iliyoko katika mapazia ya kamba, huku mtoto huyo akiwa ni mmoja kati ya takribani watoto kumi waliokufa kwa namna hiyo tangu mwaka 2010.
Polisi amesema Alexandra anawezekana kuwa alisokotwa kwenye kamba na kupata matatizo ya moyo, akiongezea kuwa wanachukulia kifo chake kuwa cha kawaida.
Mama yake mwenye miaka 37, Dana, ambaye anatokea Marekani, alipelekwa hospitali kwa matibabu kutokana na mshituko.
Morten mwenye miaka 39, ni mwenyekiti wa kampuni tajiri ya usafirishaji mafuta na gesi yenye makao yake makuu Norway ya Hoegh LNG.
Anatambulika kuwa ni mmoja kati ya watu matajiri zaidi nchini Uingereza mwenye utajiri unaokadiriwa kufikia Pauni za Uingereza milioni 175 na kuorodheshwa kwenye Listi ya Matajiri katika gazeti la Sunday Times.
Wawili hao pia wana mtoto wa kiume mwenye miaka sita, Morten na binti wa miaka mitano Henrietta.
Jirani mmoja ameeleza: "Hakujua (Dana) la kufanya. Hakika ni janga.
"Mama huyo alitoka nje akipiga kelele mtaani.
"Alisema mtoto alikuwa anakufa na kwamba alikuwa akihitaji msaada kuokoa maisha ya mtoto huyo. Gari la wagonjwa liliwasili na madaktari walikimbilia ndani."
Mkazi mwingine alisema: "Ni tukio la kuhuzunisha. Ingeweza kuwa rahisi kujilaumu mwenyewe, lakini kwa huzuni ajali hutokea.
"Nilisikia vurumai kubwa.
"Nilipotoka mlangoni kulikuwa na gari la wagonjwa nje."
Rafiki wa familia hiyo alisema: "Dana na Morten ni wanandoa wa kushangaza.
"Alexandra alikuwa binti mzuri mno kuwahi kukutana naye.
"Hakika siwezi kuamini hiki kilichotokea."
Takwimu za kushitusha zinaonesha kumekuwa na vifo takribani 22 vinavyosababishwa na mapazia ya kamba tangu mwaka 1999, nusu ya matukio hayo yakiwa yametokea tangu kuanza kwa mwaka 2010.
Takwimu hizo zinashawishi wanaharakati wa usalama kushinikiza kupigwa marufuku mapazia ya aina hiyo.
Wataalamu wa Usalama wamesema kwamba karibu watoto wawili kwa mwaka wanakufa kutokana na mapazia hayo ya kamba nchini Uingereza.
Sheila Merrill, meneja usalama majumbani kutoka Taasisi ya Kuzuia Ajali alisema: "Ushauri wetu ni kutundika kamba za mapazia hayo juu mbali sehemu wasiyofikia watoto wadogo au kukata kitanzi hivyo kuning'inia katika ncha mbili."