JICHO LA TATU...

KALALA JUNIOR HUYOOO TWANGA PEPETA...

Mwimbaji mashuhuri wa muziki wa dansi hapa nchini, Kalala Junior ambaye hivi majuzi ametangaza rasmi kuachana na bendi aliyoshiriki kuianzisha na kuizindua kwa mbwembwe ya Mapacha Watatu, anasemekana kuwa katika mpango kamambe wa kurejea kwenye bendi yake ya zamani ya African Stars "Twanga Pepeta".
Habari ambazo hazijathibitishwa rasmi zimedai kuwa mwimbaji huyo ambaye ni mtoto wa mkongwe wa ucharazaji gitaa la solo, Komandoo Hamza Kalala, yuko kwenye mazungumzo ambayo ni siri kubwa licha ya taarifa kwamba kila kilichojadiliwa kitawekwa hadharani hivi karibuni.
"Kalala atatangazwa rasmi kuwa kujiunga na Twanga Pepeta wakati wowote kuanzia sasa na kwamba tayari mipango inafanywa kumkabidhi kuliongoza jahazi la bendi hiyo ambayo ilitetereka katika siku za hivi karibuni baada ya kuondokewa na baadhi ya wanamuziki wake mahiri waliojiunga na bendi ya Mashujaa Musica "Wana Kibega".
Kwa mujibu wa mtoa habari huyo, inasemekana Kalala ameahidiwa donge nono ambalo linaweza kuwa rekodi katika historia ya muziki wa dansi nchini mara atakapotia wino kujiunga na Twanga Pepeta inayomilikiwa na Asha Baraka.
Aliendelea kusema kwamba hatua hiyo inachochewa na ukweli kwamba Kalala amekuwa akikubalika na wanamuziki walioko kwenye bendi hiyo kiasi cha kushinikiza chinichini kukamilishwa kwa mpango huo.
Juhudi za kumpata Kalala mwenyewe wala Asha Baraka kufafanua hili bado zinaendelea.

GWIJI ANDY GRIFFITH AFARIKI DUNIA...

Gwiji katika televisheni, Andy Griffith amefariki dunia, kwa mujibu wa taarifa kutoka kwa rafiki wa marehemu, Bill Friday.

Griffith, amabye alijizolea umaarufu kutokana na kipindi chake cha "The Andy Griffith Show," amefariki nyumbani kwake huko Manteo mjini North Carolina leo asubuhi.

There's a famous statue of Andy and Opie -- played by Ron Howard -- in Raleigh, North Carolina.

Griffith alitunukiwa Medali ya Rais ya Uhuru mwaka 2005 na Rais George W. Bush.

VODACOM M-PESA NDANI YA VIWANJA VYA SABASABA...

Wakala wa Vodacom M-PESA akitoa huduma kwa mteja aliyetembelea katika Viwanja vya Maonesho ya Sabasaba, Dar es Salaam leo. Kampuni ya Vodacom inashiriki katika maonesho hayo kama Mdhamini Rasmi wa Mawasiliano.

HUDUMA YA TIKETI ZA MABASI SASA HADI MTAANI KWAKO...

Meneja Masoko wa Kampuni ya Selcom, Juma Mgora akiwaonyesha waandishi wa habari moja ya simu ya kutolea huduma ya kukata tiketi ya mabasi yaendayo mikoani na nchi za jirani kupitia huduma ya Selcom PayPoint. Huduma hiyo ambayo itapatikana katika maduka na sehemu mbalimbali nchini pia itawawezesha wananchi kununua tiketi kupitia mtandao wa Kampuni ya Simu za Mikononi ya Vodacom.

CRDB HUDUMA MWENDO MDUNDO SABASABA......

Ofisa Mauzo wa Benki ya CRDB, Moses Wamala (katikati) akimsikiliza mteja aliyetembelea ya banda hilo kwenye Maonesho ya 36 ya Kimataifa ya Biashara ya Dar es Salaam (Sabasaba) leo.

MADAKTARI WAANZA KUREJEA KAZINI MUHIMBILI...

Huduma katika Hospitali ya Taifa Muhimbili, Dar es Salaam, zimerejea katika hali ya kawaida baada ya madaktari kurejea kazini jana Julai mosi.　
Taarifa ya uongozi wa hospitali hiyo iliyotumwa kwa vyombo vya habari jana, ilieleza kuwa tathimini iliyofanyika kuanzia asubuhi saa mbili hadi saa 11 jioni, ilionesha kuwa katika Idara ya Tiba, madaktari bingwa 19 kati ya 21 walifika kazini na watatu wako likizo.
Kwa mujibu wa taarifa hiyo iliyotumwa na Ofisa Uhusiano Mwandamizi, Aminiel Aligaesha watumishi wa idara za masijala wote 12 walifika kazini na kliniki zote za tiba zimefanyika kama kawaida.　
Aidha, katika Idara ya Watoto, yenye madaktari bingwa 16, 14 walifika kazini na wengine wawili wako likizo ambapo pia na watumishi wa idara za masijala watatu kati ya sita, walifika kazini ambapo watatu wako likizo.　
Upande wa kliniki za kila siku zenye yenye Registrars saba, Aligaesha alisema sita kati yao walikuja kazini na mmoja yuko likizo. Aidha, madaktari bingwa　wote walikuja kazini.　
Idara ya Magonjwa ya Afya ya Akili yenye madaktari bingwa 10, tisa walifika kazini na mmoja yuko masomoni.　
Upande wa Idara ya Dharura, taarifa hiyo ilieleza kuwa watumishi wa idara za masijala 10 walikuja kazini.　
Taarifa hiyo ilieleza kuwa kuhusu huduma za upasuaji, wagonjwa wote waliolazwa wodini walionwa na baadhi ya kliniki za huduma ya upasuaji zilifanyika. Hata hivyo, upasuaji haukufanyika kwani hakukuwa na orodha ya wagonjwa waliopangwa kufanyiwa upasuaji. 　
Wakati Muhimbili wakitoa taarifa hiyo, taarifa nyingine iliyolifikia gazeti hili ilidai kuwa madaktari bingwa katika hospitali hiyo walitangaza kuanza mgomo rasmi jana hadi hapo Serikali itakapotangaza kuwarejesha madaktari wote walioko mafunzoni ambao wamefukuzwa.

Msimamo huo wa jumuiya na madaktari bingwa ulitangazwa na wawakilishi wao mara baada ya kufanyika vikao mbalimbali hospitalini hapo.
Mwakilishi huyo, Dk Catherine Mng’ong’ alidai kama ni suala la kufukuzwa kazi, wao madaktari bingwa wako tayari lakini hawawezi kufanya kazi bila kuwepo kwa madaktari walioko mafunzoni.

LUTENI KANALI WATATU JKT KORTINI KWA UFISADI...

Askari saba wa Jeshi la Kujenga Taifa (JKT) wakiwamo Luteni Kanali watatu, wamepandishwa kizimbani katika Mahakama ya Hakimu Mkazi Kisutu, Dar es Salaam wakikabiliwa na mashitaka ya kuhamisha na kupitisha Sh bilioni 3.8 kwa ajili ya ununuzi wa mali chakavu.
Washitakiwa hao walifikishwa mahakamani hapo jana asubuhi na Taasisi ya Kuzuia na Kupambana na Rushwa (TAKUKURU), wakiwa kwenye gari aina ya Toyota Land Cruiser yenye namba za usajili T529 ASM yenye vioo vyeusi wakisindikizwa na gari lenye namba DFP 8763.
Walisomewa mashitaka saba na mawakili kutoka Takukuru, Donasian Kessy na Ben Linkolin mbele ya Hakimu Mkazi Aloye Katema.
Washitakiwa wenye cheo cha Luteni Kanali ni Mkohi Kichogo, Paul Mayavi na Felix Samillan ambaye ni Mkuu Miradi wa Suma JKT. Wengine ni Kanali Ayoub Mwakang’ata, Sajini John Laizer na Meja Peter Lushika na Meja Yohana Nyuchi.
Wakili Kessy alidai kuwa, Machi 5, 2009 katika Ukumbi wa Mikutano wa Shirika la Suma JKT, washitakiwa wakiwa wajumbe wa Bodi ya Suma JKT, walijifanya wajumbe wa Bodi ya Kampuni ya Takopa inayoundwa kwa ubia kati ya Serikali ya Korea Kusini na Suma JKT.
Alidai lengo la kujifanya wajumbe wa Bodi ya Takopa, lilikuwa kupitisha fedha kutoka kampuni hiyo kwenda Suma JKT kwa ajili ya ununuzi wa magari na mitambo ya ujenzi chakavu bila idhini ya Bodi ya Wakurugenzi wa kampuni hiyo.
Wakili Kessy alidai kuwa washitakiwa walitumia vibaya ofisi kupitisha fedha hizo kwa ajili ya ununuzi wa magari pamoja na mitambo hiyo bila kufuata kifungu cha 58 (3) cha Sheria ya Manunuzi ya Umma.
Aliendelea kudai katika mashitaka ya tatu yanayowakabili Luteni Kanali Samillan na Luteni Kanali Kichogo kuwa, Machi 16, 2009 walihamisha Sh bilioni 2.8 kupitia hundi namba 000010 kutoka akaunti ya Takopa namba 0111030331753 kwenda akaunti ya Suma JKT 01110307094 katika Benki ya Taifa ya Biashara (NBC).
Ilidaiwa kuwa Aprili 3, 2009, wakijidai wajumbe wa Bodi hiyo ya Takopa walihamisha Sh milioni 489.7, Aprili 4 walihamisha Sh milioni 269.5, Mei 4, mwaka huo walihamisha Sh milioni 350 kutoka akaunti ya Takopa kwenda akaunti ya Suma JKT bila kuzingatia Kanuni ya 156 ya Sheria ya Fedha za Umma.
Katika mashitaka ya saba yanayowakabili washitakiwa wote, ilidai kuwa kati ya Machi na Mei mwaka 2009 jijini Dar es Salaam, washitakiwa walipanga njama za kuhamisha fedha kutoka katika taasisi ya Takopa kwenda kwenye akaunti ya Suma JKT bila kufuata Kanuni 156 ya Sheria ya Fedha za Umma.
Washitakiwa wote walikana kutenda makosa hayo na upande wa mashitaka ulidai kuwa upelelezi wa kesi hiyo umekamilika na kuwa hawana pingamizi la dhamana endepo washitakiwa watakidhi masharti yatakayotolewa na Mahakama.
Hakimu Katemana aliwataka washitakiwa kuwa na wadhamini wawili wa kuaminika watakaosaini hati ya Sh milioni 25 kila mmoja. Washitakiwa walitimiza masharti na kuachiwa kwa dhamana hadi Agosti mosi, mwaka huu.
Hata hivyo, baada ya washitakiwa hao kufikishwa mahakamani hapo, hawakuwekwa mahabusu kama ilivyo kawaida kwa washitakiwa wengine, walikaa kwenye gari hadi saa 7 mchana waliposomewa mashitaka yao.

ZIRO PLUS...

CHEKA TARATIBU...

Kila mmoja duniani anakufa na kwenda peponi. Mungu anakuja na kusema, "Nataka wanaume wasimame mistari miwili. Mstari mmoja kwa ajili ya wanaume waliowatawala wake zao duniani na mstari mwingine kwa wanaume waliokuwa wakipigwa na wake wake zao. Pia, nataka wanawake wote kuondoka na Mtakatifu Petro."
Alichosema kikafanyika. Kisha Mungu akatazama na kuona wanawake wameondoka na kubaki mistari miwili tu mbele yake. Mstari wa wanaume wanaopigwa na wake zao ulikuwa na urefu wa maili 100, wakati mstari wa wanaume wanaotawala wake zao ulikuwa na mtu mmoja tu.
Mungu akachukia na kusema, "Nyie wanaume lazima muone aibu. Nimewaumba kwa mfano wangu, na wote mmekuwa mkipigwa na wasaidizi wenu. Tazameni huyu mwanangu mmoja aliyesimama na kunifanya nisikie fahari, jifunzeni kutoka kwake!" Akamgeukia yule mmoja na kusema, "Waeleze mwanangu umewezaje kuwa peke yako kwenye huo mstari?
Yule mwanaume akasema, "Sifahamu. Mke wangu ndio kaniambia nisimame hapa."
MWENYEKITI -Mbona sijakiona nyumbani?

DEREVA WA BASI AMTAFUNA USO MWANAMKE HADHARANI...

Mafuriko ya matukio ya kuogofya ya 'mashambulio ya ulaji nyama za binadamu' yameonekana kusambaa nchini China, baada ya dereva wa basi aliyelewa kunaswa na kamera akitafuna uso wa mwanamke katika matukio kadhaa ya kutisha.
Mwanamke huyo asiyekuwa na bahati atalazimika kufanyiwa upasuaji wa kuwekewa sura bandia kurekebisha uharibifu aliofanyiwa na kichaa huyo aliyemshambulia.
Kwa mujibu wa ripoti za vyombo vya habari nchini humo, dereva huyo, aliyetambuliwa kwa jina la Dong, alikuwa akinywa kwa fujo wakati wa chakula cha mchana akiwa na rafiki zake kabla ya kutoka kwa ghafla Jumanne.
Baada ya hapo alikimbilia barabarani katika Jiji la Wenzhou, lililoko kusini-mashariki mwa China, na kusimama mbele ya gari lililokuwa likiendeshwa na mwanamke aliyetambuliwa kwa jina la Du, na kumlazimisha kusimama.
Dong alikwea kwenye boneti la gari hilo na kuanza kugonga gari hilo wakati mwanamke huyo aliyepagawa akipiga mayowe kuomba msaada.
Alipotoka kwenye gari na kujaribu kutoroka, dereva huyo wa basi akamrukia na kuanza kumgalagaza chini.
Hapo ndipo Dong akaanza kumtafuna Du usoni, akimwacha akiwa ametapakaa damu na kulia huku wapita njia wakijaribu kumnasua Dong kutoka kwa mwanamke huyo.
Mashuhuda walisema kwamba dereva wa basi amepata 'kichaa' na kufanikiwa kukabiliana na juhudi za kumpunguza nguvu.
Polisi walipowasili, walifanikiwa kumkamata Dong na kumweka chini ya ulinzi, hivyo kumaliza shambulio hilo.
Du alikimbizwa hospitali, ambako madaktari walisema anatakiwa kufanyiwa ukarabati wa pua na midomo. Tukio hilo ni mfululizo wa matukio kama hayo yaliyofanywa na watu waliochanganyikiwa kutokana na matumizi ya dawa za kulevya nchini Marekani.
Labda tukio lililovuma sana ni lile lililotokea Mei, pale Rudy Eugene alipotafuna uso wa mtu wa mitaani kabla ya kuuawa kwa risasi na polisi.

JICHO LA TATU...

AKUTWA AMEKUFA KWA KUCHOMWA KISU AKIWA DISKO...

Muuaji amekuwa akisakwa na polisi usiku wa kuamkia kufuatia kumvamia kijana mmoja katika klabu ya usiku na kumchoma kisu kwenye moyo bila mtu yeyote kugundua.
Jordan Malutshi mwenye miaka 17 kutoka London, alichomwa kisu mapema alfajiri akiwa kwenye sherehe katika Baa ya Face huko Mtaa wa Chatham, Reading, Berkshire.
Eneo lilikuwa na watu kibao waliokuwa wakijirusha miondoko ya R&B, ambako DJ wa Kituo cha Radio 1 Extra, Young Lion alikuwa akipigisha disko.
Washerehekeaji walisema hawakujua kabisa kama kuna mtu amechomwa kisu, wakiongeza kwamba hakukuwa na fujo zozote au mapigano wakati huo kabla Jordan hajauawa.
Mwanamke mmoja aligundua damu kwenye nguo yake na kumweleza mfanyakazi wa baa hiyo akiwa hajui ilikotokea.
Jordan alikutwa amelala sakafuni karibu na vyoo vya klabu hiyo muda mfupi baadaye.
Polisi waliitwa klabuni hapo majira ya Saa 9:50 alfajiri kujaribu kuokoa uhai wake eneo la tukio kabla ya kupelekwa hospitali.
Lakini alifariki kutokana na majeraha yake muda mfupi baada ya kupokelewa katika Hospitali ya Royal Berkshire, polisi wa Thames Valley wamesema.
Taarifa za uhalifu zimefikia kwenye mauaji
Mkuu wa Upelelezi Inspekta Kevin Mahon, wa vikosi vya Kitengo cha Makosa Makubwa ya Jinai, alisema: "Hili lilikuwa tukio la kipekee ambapo kijana alipoteza maisha yake bila hatia.
"Tumeunda timu ya wapelelezi inayofanya kazi kuhusiana na kesi hii na kuwajibika kufanya uchunguzi wa kina kuhusu matukio yaliyopelekea tukio hili la msiba.
"Tunajua kulikuwa na idadi kubwa ya watu kwenye Baa ya Face wakati wa tukio hilo na ninaomba yeyote aliyeshuhudia, au mwenye taarifa zozote ambazo zitatusaidia katika uchunguzi wetu kutupigia simu."
Uchunguzi wa mwili uliofanyika umegundua kifo chake kimesababishwa na jeraha katika moyo lililotokana na kuchoma na kitu chenye ncha kali.

ZIRO PLUS...

KILIMANJARO YAIBANJUA SHINYANGA COPA COCA COLA...

Mlinzi wa timu ya vijana ya mkoa wa Shinyanga, Frank Zozolo (kushoto) akigombea mpira na mshambuliaji wa Kilimanjaro, Ridhiwan Yusuph katika Mechi ya Michuano ya Ubingwa wa Copa Coca-Cola kwa vijana chini ya miaka 17 iliyochezwa kwenye Uwanja wa Karume, Dar es Salaam jana. Kilimanjaro ilishinda mabao 3-0.

NHC YASAINI MIKATABA NA MABENKI UJENZI WA NYUMBA...

Mkurugenzi Mkuu wa Shirika la Nyumba la Taifa (NHC), Nehemia Mchechu.

Shirika la Nyumba la Taifa (NHC) limesaini mikataba ya mkopo wa Sh bilioni 165 kutoka kwa taasisi tisa za fedha kwa ajili ya kuendeleza ujenzi wa miradi ya ujenzi wa nyumba pamoja na ununuzi wa ardhi ya akiba.

Hafla ya kusaini mkataba huo ilifanyika leo Dar es Salaam baina ya shirika hilo  na wakurugenzi wakuu wa taasisi hizo ambapo hali hiyo ilielezwa kuwa moja ya hatua zinazofanywa na NHC katika kutafuta mitaji kwa ajili ya utekelezaji wa miradi ya ujenzi. 

Taasisi za fedha zilizotoa  mkopo huo pamoja na kiwango walichotoa kwenye mabano ni pamoja na CRDB (Sh bilioni 35), ECO Bank (Sh bilioni 2), TIB (Sh bilioni 22), BancABC  (Sh bilioni 4.2), NMB (Sh bilioni 26), CBA (Sh bilioni 24), LAPF (Sh bilioni  15), Azania (Sh bilioni saba) na Shelter Afrique (Sh bilioni 23).

Akizungumza Mkurugenzi Mkuu wa  NHC, Nehemia Mchechu alisema shirika hilo limekopa kiwango hicho cha fedha bila udhamini wowote wa serikali ambapo hali hiyo inatokanana utendaji wa kuridhisha wa shirika.

Alisema kutokana na mkopo walioupata wataanza kutekeleza mradi wa kujenga nyumba 15,000 ambazo ni kwa ajili ya watanzania wa kipato cha kati na juu lakini pia wakijikita zaidi kujenga nyumba za bei nafuu.

“Kutokana na mkopo huu shirika litajenga nyumba za bei nafuu zinazoanzia sh milioni 25 na zaidi hadi kufikia sh milioni 200,” alisema Mchechu na kuongeza kuwa lengo ni kuhakikisha na imani na watanzania.

Alisema mkopo walioupata mrejesho wake ni wa aina tofautitofauti kwani upo ambao ni wa miaka minne na hadi miaka 10 nakwamba utekelezaji wa ujenzi umeanza kutekelezwa katika maeneo  mbalimbali nchini kama mikoa ya Dar es Salaam,Kigoma,Arusha na Dodoma.

Kuhusu ujenzi wa nyumba nafuu alisema upembuzi yakinifu unaendelea nchi nzima kuzitambua wilaya ambako miradi hiyo ya nyumba za bei nafuu itaanzia.

Hata hivyo alisema NHC inahitaji fedha zaidi kwa ajili ya kujenga miji mipya katika maeneo yaliyokwishatambuliwa ambayo ni Mateves-Burka (Arusha), Kawe(Dar es salaam), Usa River (Arusha) na Temeke 

Akizungumza katika hafla hiyo, Waziri wa Ardhi, Nyumba na Maendeleo ya Makazi, Profesa Anna Tibaijuka alisema maendeleo ya miji huhitaji fedha nyingi ndio maana NHC imeona ianze na kujenga nyumba ili watanzania wasihangaike.

Alisema mikopo hiyo inalipika na lengo kubwa ni kuhakikisha nyumba zitakazojengwa zitakuwa za bei nafuu ambapo itasaidia shirika hilo kutekeleza miradi yake ya ujenzi ukiwemo ule wa kujenga nyumba 15,000 ifikapo mwaka 2015.

PPF YAELIMISHA VIJANA MAONESHO YA SABASABA KUHUSU MAFAO...

Ofisa Msaidizi Mwandamizi wa Utayarishaji Mafao wa Mfuko wa PPF, Defrosa Shio akitoa maelezo jana ya shughuli mbalimbali za mfuko huo kwa baadhi ya vijana wa Shirika Lisilo la Kiserikali linalojishughulisha na Uzuiaji wa Matumizi ya Dawa za Kulevya, hasa kwa vijana (IOGT) kwenye Maonesho ya  36 ya Biashara ya Kimataifa kwenye Viwanja vya Mwalimu Nyerere, Dar es Salaam leo.

RAIS KIKWETE AZUNGUMZIA MGOMO WA MADAKTARI...

Rais Jakaya Kikwete jana amesema katika hotuba yake ya kila mwisho wa mwezi kwa Taifa kwamba kama kuna daktari anaona kuwa hawezi kufanya kazi serikalini bila ya kulipwa mshahara Sh milioni 7.7 awe huru kuacha kazi na kwenda kwa muajiri anayeweza kumlipa kiasi hicho.

Rais Kikwete aliweka bayana kuwa Serikali haina uwezo wa kulipa mshahara na posho hiyo kwa daktari anayeanza kazi kutoka shuleni na zaidi ya hapo kwa madaktari wengine.

Kutokana na ukweli huo, aliwatakia kila la heri wasioweza kufanya kazi serikalini, lakini akaongeza kuwa “hana sababu ya kugoma ili ashinikize kulipwa mshahara huo. Asisumbuke, hatalipwa mshahara huo.” 

 “Isitoshe, hana sababu ya kuendelea kuwa na mgogoro na mwajiri ambaye hana uwezo wa kumlipa anachokitaka. Huna sababu ya kumpa usumbufu mwajiri wa kukuandikia barua ya kujieleza au kukuachisha kazi. Kwa nini upate usumbufu wa kupata barua hizo na kuzijibu. Kwa nini upate usumbufu wa kuachishwa kazi na kutakiwa kuondoka kwenye nyumba ya Serikali ndani ya saa 24,” alihoji. 
Rais Kikwete pia aliwaonya madaktari hao kwa kuingia katika mgogoro na Mahakama ambayo iliwapa amri kurudi kazini wakaikataa na mgogoro mwingine na waajiri wao isivyostahili.  
 “Wagonjwa wanateseka na wengine kupoteza maisha kwa mgomo huu usiokuwa halali kisheria ambao pia haustahili kuwepo hata kwa mujibu wa maadili ya udaktari. Viongozi wa MAT na wenzao wanawaingiza madaktari katika mgogoro na Mahakama na waajiri wao isivyostahili. 
 “Ni vyema viongozi wa madaktari na madaktari wakatambua kuwa wanashiriki katika mgomo usiokuwa halali ambao pia kiongozi wao mkuu amekana Mahakamani kuwa hahusiki nao. Madaktari lazima watambue pia kwamba ajira zao wanaziweka hatarini.  
 “Ni vyema watambue kuwa wanashiriki katika mgomo usiokuwa halali ...mfanyakazi ana kinga ya kutofukuzwa kazi na mwajiri kwa kushiriki mgomo unaokubalika kisheria. Huu siyo.  
 “Watapoteza ajira, hawana pa kukimbilia, hawana cha kuwalinda. Kwa madaktari walio mafunzoni, wanahatarisha maisha yao kwani hawatapata cheti cha kudumu wakishiriki mgomo usiokuwa halali.   Lazima watafakari sana kwa hayo wafanyayo,” alihadharisha Rais Kikwete.  
Tofauti na madai ya madaktari yaliyochapishwa katika mabango waliyoyabeba jana kuwa wanagoma kwa kuwa katika hospitali za Serikali hakuna vitendea kazi, Rais Kikwete aliweka wazi kuwa kiini ni maslahi makubwa wanayoyadai ambayo Serikali haina uwezo wa kuwapa. 
Alibainisha kuwa madaktari hao wanataka walipwe mshahara wa Sh milioni 3.5 kwa mwezi kwa daktari anayeanza kazi kutoka chuoni. Pia wanataka posho za kila mwezi ikiwamo asilimia 10 ya mshahara huo iwe posho ya kuitwa kazini ambayo ni Sh 350,000, asilimia 30 ya mshahara huo iwe posho ya kufanya kazi katika mazingira hatarishi ambayo ni Sh 1,050,000. 
Posho nyingine wanazodai katika mlolongo huo wa maslahi ni kupatiwa nyumba grade A au asilimia 30 ya mshahara iwe posho ya makazi ambayo ni Sh 1,050,000 na posho ya kufanya kazi katika mazingira magumu ambayo ni asilimia 40 ya mshahara huo sawa na Sh milioni 1.4. 
Madaktari hao pia wanataka posho ya usafiri asilimia 10 ya mshahara sawa na Sh 350,000 ambapo vikijumlishwa vyote, kima cha chini cha mshahara na posho kwa daktari anayeanza kazi leo, itakuwa Sh milioni 7.7. 
Madai mengine ambayo hawakuyaweka katika kiwango cha fedha ni pamoja na kupatiwa kadi ya kijani ya Mfuko wa Taifa wa Bima ya Afya (NHIF) na kuchukuliwa hatua za kinidhamu kwa watendaji wakuu wa Wizara ya Afya na Ustawi wa Jamii. 
Mengine ni viongozi wa kisiasa kulazimisha kupewa rufaa nje ya nchi, madaktari waliofukuzwa warudishwe kazini, huduma za afya ziboreshwe nchini na kuongeza posho ya uchunguzi wa maiti ambayo nayo hawakueleza ni kwa kiasi gani. 
Rais aliweka wazi mambo waliyofikia muafaka na madaktari hao kuwa ni pamoja na usafiri wa kwenda na kurudi kazini ambapo Serikali ilitaka madaktari watumie fursa ya utaratibu uliopo ili wakopeshwe magari, pikipiki, samani na matengenezo ya magari.  
Pia ilikubalika na utekelezaji ukaanza kuwapatia madaktari kadi ya kijani ya NHIF na katika hatua za kinidhamu dhidi ya watendaji wakuu wa Wizara, uongozi wa juu wa wizara ulibadilishwa na sasa kuna uongozi mpya.  
Hata hivyo, pamoja na Serikali kubadilisha uongozi huo, Rais Kikwete alisema Waziri mpya wa Afya na Ustawi wa Jamii, Dk Husein Mwinyi alipowataka madaktari hao waonane kuzungumzia hoja zao, walikataa kumuona kwa madai kuwa hawaoni sababu kwa vile wamezungumza na Kamati yake kwa miezi mitatu bila mafanikio. 
 “Muafaka haukufikiwa baina ya Serikali na madaktari kuhusu mshahara wa kuanzia kazi wa daktari.  Madaktari wanataka uwe Sh milioni 3.5 wakati Serikali inasema kiasi hicho hatukiwezi... Madaktari wamekataa katakata na wameng’ang’ania Sh milioni 3.5,” alisema Rais Kikwete. 
Suala lingine walilotofautiana ni posho ya kuitwa kazini ambapo Serikali iliongeza tangu Februari 2012  kutoka Sh 10,000 hadi Sh 25,000 kwa daktari bingwa, Sh 20,000 kwa dakari mwenye usajili wa kudumu  na Sh 15,000 kwa madaktari walio katika mafunzo. 
 “Madaktari kwa upande wao hawakukubali uamuzi huo wa Serikali na kusisitiza walipwe asilimia 10 ya mshahara. Ugumu wa kukubali pendekezo la madaktari ni kuwa sharti la malipo haya ni mtu kuitwa kazini.  
“Ukitaka ilipwe kiwango cha mshahara ina maana kuwa hata kama daktari hakupangwa kuitwa au alipangwa na hakutokea aendelee kulipwa. Hili haliwezi kuwa sahihi, linaweza kuwafanya baadhi ya madaktari kutotimiza wajibu wao kwa vile wana hakika mwisho wa mwezi malipo yako pale pale,” alisema Rais Kikwete. 
Rais Kikwete aliahidi kuwa Serikali itaendelea kuboresha mishahara na maslahi ya wafanyakazi na kuongeza kuwa nia hiyo Serikali imeitekeleza kwa vitendo. 
Alikiri kuwa mishahara haitoshi, lakini akasema lazima uwezo wa kufanya hivyo uwepo na kuonesha alipoingia madarakani mwaka 2004/2005, mshahara wa kuanzia wa daktari ulikuwa Sh 178,700. 
Kwa mujibu wa Rais Kikwete, mwaka uliofuata 2005/ 2006, ulipanda na kufikia Sh 403,120 na ukaendelea kupandishwa mwaka hadi mwaka mpaka kufikia Sh  957,700 kwa sasa kiasi ambacho ni mara mbili ya mishahara ya watumishi wa taaluma nyingine wenye shahada ya kwanza wanaoanza kazi na Sh 446,100. 
“Hata hizo huduma za afya tunazosema ni duni tuziboreshe, hatutaweza kuziboresha kama tutatumia sehemu kubwa ya pesa za Serikali kuwalipa mishahara wafanyakazi. Hivi sasa matumizi ya mishahara ni asilimia 48 ya Bajeti ya Serikali. Kiwango hicho ni kikubwa mno,” alisema Rais Kikwete na kuongeza: 
“Uwiano mzuri ni kuwa na matumizi ya mishahara yasiyozidi asilimia 35 ya bajeti na asilimia 65 zitumike kugharimia huduma na shughuli nyingine za maendeleo ya wananchi na taifa.  Sisi tumezidi kwa asilimia 13.  Hivyo, hatuna budi tukubali kujinyima kwa manufaa ya walio wengi.”  
Aidha, Rais Kikwete alieleza masikitiko yake makubwa na kuhuzunishwa na kitendo cha kinyama alichofanyiwa Dk Steven Ulimboka, akisema ni kinyume kabisa na mila na desturi zetu. 
“Nimeelekeza vyombo vyetu vya ulinzi na usalama kufanya uchunguzi wa kina ili ukweli ujulikane.  Nimesema kuwa ningependa ukweli huo ujulikane mapema ili tuondoe wingu baya la kutiliana shaka na kulaumiana kunakoendelea hivi sasa,” alisema na kuongeza.” 
“Natambua kuwa Serikali nayo inatajwa katika orodha ya wanaotiliwa shaka. Mimi nimeshangazwa sana na hisia hizo kwani siioni sababu ya Serikali kufanya hivyo. Kwa nini Serikali imdhuru Dk Ulimboka? Na, kuhusu mgomo, Mahakama Kuu imekwishatoa amri ya kusitisha mgomo. Anayekaidi amri ya Mahakama ananunua ugomvi na mhimili huo wa dola ambao wenyewe una mamlaka ya kumtia adabu mtu huyo. 
“Hivi baada ya kufika hapo Serikali iwe na ugomvi na Dk Steven Ulimboka kwa sababu ipi na jambo lipi hata iamue kumdhuru? Kama kuna mtu wa Serikali kafanya, itakuwa kwa sababu zake binafsi na siyo za Serikali au kwa kutumwa na Serikali.” 

CHEKA TARATIBU...

Wakati mwingine wanawake wanawahisia vibaya waume zao kupita kiasi. Wakati Adam akichelewa kurudi kwa siku chache, Eva anakasirika sana. "Unakula raha na wanawake wengine mitaani," analalamika Eva.
Adam anajibu, "Umekosa cha kuongea we mwanamke. Wewe ni mwanamke pekee duniani." Mzozo uliendelea hadi Adam akapitiwa na usingizi ndipo aliposhituliwa pale alihisi mtu akimpapasa kifuani mwake.
Alikuwa Eva. Ndipo Adam akauliza, "Unafanya nini?"
Eva akajibu kwa upoole, "Nahesabu mbavu zako!" Kaazi kwelikweli...

HISPANIA MABINGWA ULAYA, KOCHA WAO AWEKA REKODI MPYA...

Licha ya kuiwezesha timu yake ya taifa ya Hispania kutetea Ubingwa wake wa Kombe la Mataifa ya Ulaya 'Euro 2012' kwa kuibwaga Italia kwa mabao 4-0, kocha Vicente Del Bosque ameandika rekodi mpya duniani.
Del Bosque amekuwa kocha wa kwanza kuweza kutwaa vikombe vikubwa vya soka duniani.
Ametwaa Kombe la Ligi ya Mabingwa Ulaya, Kombe la Dunia na sasa Kombe la Mataifa ya Ulaya.

ZIRO PLUS...

AANGUKA NA KUFA KORTINI BAADA YA UONGO WAKE KUGUNDULIKA...

Chumba cha mahakama kiliingia hofu pale mwanaume ambaye muda mfupi uliopita alitiwa hatiani kwa uchomaji nyumba yake yenye thamani ya Dola za Marekani milioni 3.5 kuanguka na kufariki mbele yao.
Michael Marin mwenye miaka 53 alikutwa na hatia ya uchomaji mali kwa makusudi na baraza la wazee wa mahakama kwenye Mahakama Kuu ya Maricopa County. alionekana kushitushwa na kufumba macho yake wakati hukumu ikisomwa kabla ya kuweka kitu mdomoni na kuosha kwa kimiminika kilichokuwa ndani ya chupa ya maji ya plastiki.
Katika video ya kushitua iliyopigwa kwenye chumba cha mahakama, kisha alianguka sakafuni dakika chache baadaye katika misukosuko. Marin alikimbizwa hospitalini mjini Phoenix, Arizona, ambako alitangazwa kufariki dunia.
Wakati mashitaka dhidi ya Marin yalipoanza Mei, waendesha mashitaka walisema anaweza kukabiliwa na kifungo cha miaka 16 jela kama akikutwa na hatia.
Marin alichoma nyumba yake iliyoko Phoenix Julai 5, 2009 baada ya kushindwa kuiuza katika mnada wa hadhara.
Wachunguzi wa Kitengo cha Moto wamegundua kwamba moto huo uliwashwa kwa kukusudia baada ya kukuta vitu kadhaa vikiwa mahali pake wakati moto huo ukisambaa katika nyumba hiyo yenye eneo la Futi za Mraba 6,600 pamoja na gereji nne.
Marin baadaye aliziambia mamlaka husika kwamba aliokoka kutoka kwenye moto huo baada ya kukwea kwa kamba kutoka ghorofa ya pili na kuvalia suti maalumu ya kuogelea.
Hakuna aliyejeruhiwa kwenye moto huo lakini mashitaka yanamhusisha na uchomaji mali kwa makusudi na hivyo kukabiliwa na kifungo cha miaka hiyo gerezani mjini Arizona.
Waendesha mashitaka wamedai Marin alichoma nyumba yake katika kukata tamaa sababu hakuweza tean kulipia mkopo wake wa nyumba.
Uchunguzi kuhusu matumizi ya dawa za kulevya utafuatia dhidi ya mwili wa mtu huyo mwenye miaka 53 sambamba na chupa ya maji aliyokunywa.
Marin, baba wa watoto wanne na babu wa wajukuu wawili, alisoma kwenye Shule ya Sheria ya Yale. Alikuwa mfanyabiashara wa mitaani ambaye alikuwa akiuza michoro ya msanii Pablo Picasso na kujipambanua magazetini kama "Msakaji Msisimko Makini" baada ya kupanda Mlima Everest na safari zake kwenye misitu minene ya kusini-mashariki mwa Asia.

ZIRO PLUS...

ALIYEDAI MKE WA USHER RAYMONDS AISHIA WODI YA VICHAA...

Mwanamke aliyekamatwa mbele ya nyumba ya Usher Raymonds wikiendi iliyopita baadaye alipelekwa kwenye wodi ya wenye matatizo ya akili kwa uchunguzi zaidi...baada ya kusisitiza kuwa alikuwa mke halali wa mwimbaji huyo, hii ni kwa mujibu wa vyanzo vya habari vya kisheria.
Awali ilivujishwa kuwa, Darshelle Jones-Rakestraw alikamatwa nje ya nyumba ya Usher iliyoko Georgia Jumapili iliyopita baada ya kukaidi agizo lililomtaka kukaa mbali na mali za mwimbaji huyo.
Polisi walitoa tahadhari siku moja kabla, pale Darshelle alipoonekana nyumbani kwa Usher kwa mara ya kwanza...na mtu mmoja kwenye nyumba hiyo akalazimika kuita polisi.
Sasa, imepatikana ripoti kutoka polisi ikielezea taarifa zaidi za tukio hilo, ikidai wakati polisi walipowasili Jumapili kufuatia simu iliyopigwa na mtu mmoja, walimkuta Darshelle mbele akiwa anaperuzi kwa kutumia iPad yake.
Kwa mujibu wa ripoti, Usher alimuona mwanamke huyo kwenye kamera yake na kuwaita polisi yeye mwenyewe.
Mara walipomtambua, polisi walimuweka Darshelle chini ya ulinzi kwa kupuuza katazo la kuingia hapo, lakini kwa mujibu wa ripoti alikuwa kwenye hali kama ya wazimu...askari jela walikataa kumpokea.
Kwa mujibu wa nyaraka, Darshelle aliendelea kusisitiza kuwa ni mke wa Usher na kuwa anafahamu yote kuhusu maamuzi yake, jambo ambalo ni maongezi ya kiwendawazimu...sababu Usher bado hajaoa.
Kufuatia hayo, polisi wamedai Darshelle alipelekwa Hospitali ya Emory Johns Creek ambako alipokelewa kwa ajili ya kuchekiwa akili.
Aliachia muda mfupi baadaye...akiwa na nakala ya mashitaka dhidi yake. Darshelle anatarajiwa kufikishwa mahakamani mwezi ujao.

MAMA AKOSA RAHA KUPANGIWA HOTELI ALIMOFIA WHITNEY HOUSTON...

Cissy Houston hakuwa mwenye furaha wikiendi hii pale alipopanga chumba kwenye hoteli ambako binti yake, Whitney Houston alifia...lakini alipata wasaa wa kutembelea chumba alimofia binti yake huyo wakati fulani, imeelezwa.
Mama mzazi wa Whitney yuko mjini Los Angeles wikiendi hii kwa ajili ya Tuzo za BET (ambapo Whitney atatunukiwa) na imeelezwa kwamba alikosa raha pale alipopangishiwa kwenye Hoteli ya Beverly Hilton, hoteli ile ile ambayo Whitney alifariki dunia Februari mwaka huu.
Vyanzo vya habari vimesema Cissy alitaka kutembelea chumba namba 434 kwa kuhitimisha na amepanga kuwasiliana na uongozi wa hoteli hiyo wikiendi hii...lakini kwamba anataka kufanya hivyo kwa wakati wake mwenyewe.
Kwa mujibu wa vyanzo, mapokezi ya Cissy yalihamishiwa Regent Beverly Wilshire badala yake.

ZIRO PLUS...

CHEKA TARATIBU...

Mwanachuo mmoja kaingia kwenye chumba cha mtihani wa Filosofia.
Juu kabisa kwenye karatasi ya mtihani kuliwa na maandishi yaliyosomeka: "Je, hili ni Swali? - Jadili."
Baada ya kufikiri kwa muda akaandika: "Ikiwa hili ni Swali, basi hili ni Jibu!"
Unaambiwa majibu yalipotoka akawa peke yake aliyepata alama 'A'. Shule raha bwana...

ZIRO PLUS...

WAFANYABIASHARA YA DAWA ZA KULEVYA WACHINJANA KAMA KUKU MEXICO...

KUSHOTO: Tajiri Miguel Angel Trevino Morales. JUU: Wafuasi wa kundi la Zetas wakiwa wamekamatwa. CHINI: Wafuasi wa kundi la Gulf wakiwa wamepangwa mstari kabla ya kuchinjwa kama walivyonaswa kwenye video.

Video ya kutisha inayoonesha wafuasi wa kundi la dawa za kulevya la Mexico wakikatwa vichwa na kundi la wapinzani wao imesambazwa kwenye mtandao wa intaneti katika uovu wa hivi karibuni katika mapambano dhidi ya biashara ya dawa hizo.
Video hiyo ambayo imesambazwa kwenye blog ya Mundonarco.com inayomilikiwa na muungano wa kudhibiti biashara hiyo, inaonesha wafuasi waliofichwa sura zao wa Kundi la Gulf wakiwa wamesimama nyuma ya wafuasi wa Zetas waliokuwa vifua wazi ambao wamechorwa alama nyeusi ya 'Zs' kwenye vifua vyao.
Wanaume waliofichwa sura walikuwa wameshikilia mapanga na kuwazaba vibao wafungwa wao, ambao wanapiga magoti chini mbele yao huku kila mmoja akijitambulisha jina lake kwenye kamera.
Walipoulizwa nani kawatuma, kila mmoja alijibu 'Z-40'.
40 ni jina alilopewa Miguel Angel Trevino Morales, kiongozi wa pili kwa ukubwa katika kundi la Zeta.
Mtu aliyepiga picha hizo za video aliwaambia: "Mmejikuta hapa sababu mlikuja kutufanya vibaya. Kaa tayari, wanaume."
Kisha kamera inawaonesha wanaume watatu kati yao wakianza taratibu kuwakabili huku wakiwakatakata shingo zao kwa mapanga.
Huku watu hao wakipiga kelele za kuomba msamaha, mpigapicha za video hiyo alisema: "Hivi ndivyo watu wenu wote wachafu mtakavyoishia."
Baada ya zoezi hilo kukamilika, baada ya takribani dakika mbili za kupokea maumivu makali, watu walioficha sura zao walinyanyua juu vichwa kadhaa kama vikombe vyao vya ubingwa.
Majaliwa ya watu watatu tu kati ya watano yameoneshwa bayana.
Mundonarco.com imeeleza video hiyo ilirekodiwa kwenye mjini Rio Bravo, Mexico kando ya mpaka wa Marekani.
Kundi la Zetas lilianzishwa na askari wa zamani waliojiengua kwenye jeshi la Mexico mwaka 1998 kufanya kazi kama wauaji wa kukodiwa kwa ajili ya wasafirishaji wa dawa za kulevya.
Tangu wakati huo wamejenga himaya yao ya biashara ya dawa za kulevya, ikipanuka kwa kasi kubwa katika Mexico yote na kujiingiza katika utekaji nyara, uporaji wa kutumia nguvu na wizi wa mafuta ghafi.
Juni 10, mwaka huu miili iliyokatwa viungo ya wanaume 11 na wanawake watatu ilikutwa katika mji maarufu kwa kilimo cha miwa wa Ciudad Mante uliopo Kusini mwa Jimbo la Tamaulipas ambao unapakana na Texas.
Tamaulipas umekuwa mmoja wa miji iliyoshamiri kwa mapambano makali ya umwagaji damu katika vita ya dawa za kulevya nchini Mexico.
Siku tano tu kabla, Polisi wa Mexico walikuta miili saba iliyokatwa viungo kwenye jimbo la pwani ya Pacific la Sinaloa, sambamba na ujumbe ukishutumu mamlaka husika kushirikiana na Tajiri wa dawa hizo, Joaquin 'El Chapo' Guzman, mtu anayesakwa kwa udi na uvumba nchini humo.
Miili hiyo ilikuwa imepangwa kwenye magunia 13 meusi mapema Juni 5 na kutupwa kwenye njia ya watembea kwa miguu katika eneo la makazi ya watu, mamlaka zimesema.
Guzman, ambaye kwa kipindi kirefu ametambulika kama kigogo wa dawa za kulevya mwenye nguvu zaidi Mexico, alihusishwa mwaka huu katika orodha ya Forbes ya watu matajiri zaidi duniani, akiwa na utajiri unaokadiriwa kufikia Dola za Marekani bilioni 1.
Alitoroka gereza la Mexico mwaka 2001 kwa kutumia lori la usafi akiwa kajitwisha Dola za Marekani milioni 7 kichwani mwake.
Januari, Los Zetas lilisambazwa video ikionesha kunyongwa wafuasi wawili wa kundi la Gulf na mwezi uliopita miili 49 iliyochinjwa ikiwa imetupwa kando ya barabara kuu kutoka kundi hilo hilo.
Serikali ya Marekani imetoa ofa ya Dola za Marekani milioni 5 kwa yeyote atakayetoa taarifa zitakazowezesha kukamatwa 40.
Kwa ujumla, karibu watu 55,000 wamekufa katika matukio yanayohusiana na vurugu za dawa za kulevya na zaidi ya 5,000 hawajulikani waliko nchini Mexico tangu Rais Felipe Calderon alipoingia madarakani Desemba mwaka 2006.
Wiki iliyopita, Ikulu ilitahadharisha wasafiri wa Marekani kwenye Mexico kuchukua tahadhari ya kuwako mashambulio ya kulipa kisasi kufuatia kukamatwa kwa wanaodaiwa kuwa washirika wa kundi la dawa za kulevya la Zetas ndani ya Marekani.

JICHO LA TATU...