HARAMBEE CBE YAINGIZA SHILINGI MILIONI 540.8

Chuo cha Elimu ya Biashara (CBE) kimekusanya zaidi ya Sh milioni 540.8 kwa ajili ya kufanya upanuzi wa chuo hicho na kuboresha miundombinu, ikiwemo kujenga vyumba vya mihadhara.

Akizungumza juzi Dar es Salaam katika hafla ya kuchangisha fedha hizo, Mkuu wa Chuo hicho Profesa Emmanuel Mjema alisema wamekuwa wakikabiliwa na changamoto mbalimbali kwa muda mrefu na hivyo kuamua kufanya utaratibu huo, ikiwa ni sehemu ya maadhimisho ya miaka 50 ya chuo hicho.

Alisema chuo hicho ambacho kililenga kukusanya Sh bilioni moja, kina uhaba wa hosteli za wanafunzi ambapo hosteli iliyopo ina uwezo wa kuchukua wanafunzi 250 tu, hivyo fedha hizo zitatumika kufanya mambo mbalimbali ikiwemo utafiti.

Mapema Mwenyekiti wa Bodi ya Uongozi wa Chuo hicho, Profesa Mathew Luhanga alisema chuo kimejitahidi kuwekeza katika kununua maeneo lakini changamoto kubwa waliyonayo ni fedha za kuendeleza maeneo hayo.

Alisema CBE ilianzishwa mwaka 1965 ikiwa na wanafunzi 25 na ikitoa kozi moja lakini hadi kufikia mwaka huu wa masomo ilikuwa na wanafunzi 14,000 ikitoa kozi sita.

Alisema katika miaka 50 ya chuo hicho wanajivunia mambo mbalimbali katika jamii ikiwemo kutoa wataalamu zaidi ya 100,000 katika fani mbalimbali ambapo pia wametoa mafunzo kwa wajasiriamali zaidi ya 5,000.

Katika hafla hiyo, Makamu wa Pili wa Rais Zanzibar, Balozi Seif Ali Idd ambae alikuwa mgeni rasmi alichangia Sh milioni tatu na kuahidi kwamba serikali itaendelea kutoa kipaumbele katika sekta ya elimu.