MAHAKAMA KUU YATUPA PINGAMIZI LA DK. SLAA...

Dk Willibrod Slaaa na aliyekuwa mkewe, Rose Kamili.

Mahakama Kuu Kanda ya Dar es Salaam, imetupilia mbali pingamizi lililowekwa na Katibu Mkuu wa Chadema, Dk Willibrod Slaa, katika kesi iliyofunguliwa na aliyekuwa mkewe, Rose Kamili akipinga ndoa kati ya mumewe huyo na mchumba wake wa siku nyingi, Josephine Mushumbusi.

Jaji Lawrence Kaduri anayesikiliza kesi hiyo akisoma uamuzi jana, alisema Kamili alikuwa sahihi kuwasilisha kesi hiyo mahakamani na hivyo anatupilia mbali pingamizi la Dk Slaa na kupanga kesi hiyo itajwe tena Desemba 6. 

Dk Slaa katika pingamizi lake alikuwa akidai kuwa Kamili hakuwa mkewe halali na hivyo hakupaswa kufungua kesi mahakamani. 

Aidha, alidai pia kuwa suala la ndoa halikupaswa kuwasilishwa mahakamani kama la madai, bali kwa kutumia hati ya kuitwa mahakamani ikiambatanishwa na kiapo cha mdai. 

Kiongozi huyo wa Chadema na Josephine walipanga kufunga ndoa Julai 21 mwaka huu wilayani Karatu mkoani Arusha, lakini Kamili aliwasilisha pingamizi mahakamani kupinga ndoa hiyo. 

Kamili katika kesi hiyo anadai fidia ya Sh milioni 550 za gharama ya malezi ya familia na usumbufu aliopata kwa kutelekezwa na mumewe. Kesi hiyo ilifunguliwa na kusajiliwa kwa namba 5 mwaka huu. 

Kwa mujibu wa hati ya madai, Kamili anadai yeye na Dk Slaa ni wanandoa na Josephine ndiye alisababisha Dk Slaa atelekeze familia, akidai walifunga ndoa mwaka 1985 na Juni 18, 1987 wakajaliwa mtoto wa kwanza wa kike Emiliana na wa pili Septemba 23, 1988 Linus, na maisha yao awali yalikuwa ya upendo. 

Anadai kuwa kabla ya hapo, Dk Slaa alikuwa padri, lakini kwa ridhaa yake aliacha kazi hiyo ili aishi na familia yake na kutimiza majukumu yake katika ndoa hiyo. 

Aidha, alidai kuwa kuanzia hapo yeye na mdaiwa waliishi nyumba moja baada ya Dk  Slaa kuacha utumishi wa Mungu kama mke na mume na walitambuliwa kuwa wanandoa, kwa sababu taratibu zote za ndoa zilifuatwa na familia zote mbili ambazo zinatambua hilo.