KATIBU CCM AANGUKA NA KUPOTEZA FAHAMU WAKATI WA KUHESABU KURA ZAKE...

Katibu wa CCM Uchumi aliyemaliza muda wake wilayani Liwale mkoani Lindi, Said Lihomba amedondoka chini na kupoteza fahamu huku akitokwa na povu mdomoni, wakati akihesabu kura zake juzi katika uchaguzi wa ndani wa CCM.
Lihomba alikumbwa na maswahibu hayo akiwa ndani ya chumba cha kuhesabia kura, baada ya kukataa kuchagua mwakilishi wa kumuhesabia kura na kuamua kwenda mwenyewe.
Awali kabla ya kutokewa na hali hiyo, Msimamizi wa Uchaguzi huo wilayani Liwale, Farida Kikoleka　aliwataka wagombea wa nafasi mbalimbali baada ya kupigwa kura, kutoa mwakilishi au kwenda wao wenyewe kuhakikisha kura　 zao katika　 chumba cha
Kuhesibia kura.
Kauli　 hiyo ya Farida, ilisababisha wagombea wote wa nafasi hiyo, akiwemo Lihomba kwenda wenyewe kuhakikisha kura zao　wakati zikihesabiwa. Wagombea wengine ni Mdai　 Mahela na Amidu Likwawatu.
Hata hivyo wakati wakihakiki kura zao, Lihomba aliyekuwa akipata kura chache huku Likwawatu akiongoza kwa kura nyingi, alianguka ghafla chini.
Kutokana na hali hiyo, wasimamizi wa uchaguzi huo, Farida na Mathew Makwinywa waliamuru Lihomba atolewe katika chumba hicho na kumkimbiza hospitalini　 kwa ajili ya　matibabu.
Baada ya kumaliza kuhesabu kura, Farida alimtangaza Likwawatu kuwa mshindi wa nafasi hiyo baada ya kupata kura 58 na kufuatiwa na Mahela aliyepata kura 43 huku
Lihomba aliyekuwa hospitalini akiambulia kura 10.