REPOA YANG’ARA KWA UTAFITI DUNIANI

Taasisi inayoshughulika na mambo ya Utafiti wa Kupunguza Umasikini (Repoa) ni miongoni mwa taasisi nne za Tanzania ambazo zimeorodheshwa kwenye ripoti ya dunia kuwa ni taasisi zinazofanya vizuri katika masuala ya utafiti, ufuatiliaji na ushauri.

Ripoti hiyo ambayo imetayarishwa na wataalamu kutoka Chuo Kikuu cha Pennsylavania, imezitaja taasisi nyingine kuwa ni Taasisi ya Utafiti ya Uchumi na Jamii (ESRF), Taasisi inayoshughulika na Utafiti wa Mambo ya Teknolojia (ATPS) na Tume ya Sayansi na Teknolojia (Costech).

Kwenye ripoti hiyo ambayo imezigawa taasisi hizo kwenye kanda, kwenye nchi za kusini mwa Jangwa la Sahara ambako kumeorodheshwa taasisi  65 zinazoshughulika na utafiti wa uchumi na 46 zinazoshughulika na sayansi na teknolojia, Repoa imeshika nafasi ya 18 kwenye kundi la taasisi za mambo ya uchumi.

ESRF kwenye kundi hilo imeshika nafasi ya 42 na ATPS imeshika nafasi ya 51 huku Costech imewekwa kwenye kundi la taasisi za mambo ya sayansi na teknolojia ambako imeshika nafasi ya 44. Katika ukanda wa Afrika Mashariki, Repoa imeshika nafasi ya tatu.

Mpango huo unahusisha taasisi zinazoshughulika na utafiti  kwa ajili ya kutumika kutunga sera mbalimbali za nchi na umebatizwa jina  la Think Tanks & Civil Societies Program umefanywa na taasisi ya Lauder ya Chuo Kikuu cha Pennsylavania na umehusisha 6,600 na unalenga kuzitathmini zinafanya nini na msaada wake kwa nchi husika.

Kwa mujibu wa ripoti hiyo ya dunia, waandaaji wamehojiana na watu 20,000 wakiwemo waandishi wa habari, watunga sera, watu wa kawaida na wahisani.

Akizungumza wakati wa uzinduzi wa ripoti hiyo kwa hapa nchini, Mkurugenzi Mtendaji wa Repoa Profesa Samuel Wangwe alisema  taasisi za utafiti na ushauri zimeongezeka duniani; lakini kwa miaka ya hivi karibuni baadhi ya taasisi hizo zimepungua kutokana na baadhi yake kusimamisha shughuli zake.

"Lakini mahitaji ya taasisi hizi yameongezeka kwa vile watu wanaotaka  kupata taarifa nje ya mfumo wa serikali umeongezeka, kwa hiyo kazi iliyoko mbele yetu bado ni kubwa," alisema.

Profesa Wangwe (pichani) alisema pamoja na mahitaji hayo, taasisi hizo za utafiti zinakabiliwa na ukosefu wa fedha kutokana na serikali kutozifadhili na hivyo kutegemea fedha za wahisani. Alisema kuna haja ya Serikali kuzitambua taasisi hizo kama ilivyo kwa nchi ya Botswana.